2 Samuel 22 - Bible in Tzotzil de Chenalhó with Deuterocanon

Sq'ueoj David c'alal itsalvan ta pleito

¹ Li q'ueoj li'i ja' la sq'uejinta ta stojol Muc'ul Dios li David c'alal icoltaat loq'uel ta sc'ob yajcontrataque xchi'uc ta sc'ob li Saule.

² Jech chal li sq'ueoje: “Muc'ul Dios, vo'ot jchabivanejot cu'un, vo'ot jpojobbailot, jcoltavanejot cu'un.

³ Dios cu'un, vo'ot jnac'ubbailot; vo'ot jmacot. Ta avu'el chacoltaun; vo'ot lec toyol jnac'ubbailot, lec toyol jpojobbailot. Jcoltavanejot cu'un, yu'un laj acoltaun ta uts'intael.

⁴ Muc'ul Dios, vo'ot no'ox tsc'an cha'ich'at ta muc'. C'alal chajc'opanote, chacoltaun ta sventa cajcontratac.

⁵ “La sventainun o li lajele; lixi' yu'un li yoc jcuchvanej uc'ume.

⁶ La xpech'un ta snucul xch'ojon li yavil animaetique; yacbilun licom yu'un li lajele.

⁷ C'alal oyun ta tsots vocole, la jc'opan li Muc'ul Diose; la jc'anbe vocol li Dios cu'une. Laj ya'ibun jc'op c'alal to ta ch'ulna yu'un; ic'ot ta xchiquin li coq'uel cavanele.

⁸ “Jech tsots inic li banamile: inic c'alal ta yibel li vinajele; iyuq'uilanat ta sc'ac'al yo'nton li Diose.

⁹ Yu'un iloc' ch'ayil ta sni'; iloc' c'oc' ta ye sventa chchic'van; iloc' tsanajtic ac'al ta ye.

¹⁰ La stsulesbe jutuc li spoc'al vinajele, jech iyal tal. Oy ep pimil ic'al toc te ta yolon yacan.

¹¹ Icaji ta jcot querubín, ivil batel; ta ic' ivil batel xchi'uc li xiq'ue.

¹² Ja' sna ic'ot li pimil ic'al toc te joyibtabil yu'une, ja' li pimil ic'al toc xcuchoj ya'lele.

¹³ Ta tsots xojobal itsan li ac'aletic te x'u'pte-u'ptee.

¹⁴ “Li Muc'ul Dios te oy ta vinajele ic'opoj yalel tal c'alal ta vinajel jech chac c'u cha'al xbac' chauc.

¹⁵ La st'iles yalel tal li sflechae; laj yac' yalel tal li sacsevule, jech tanpuc ijatovic batel ta anil li cajcontrae.

¹⁶ Toj vinajel ic'ot li slumal yut natil nabe; toj jamel ic'ot li snacleb banamile, ta scoj ti tsots ic'opanatic yu'un Muc'ul Diose, ta scoj ti tsots la xjuch'ta batele.

¹⁷ “Li Diose laj yac'bun tal sc'ob c'alal to ta toyol; ja' la snitun o loq'uel ta muc'ta nab.

¹⁸ La scoltaun loq'uel ta sc'ob li cajcontra ti tsots xu' yu'unique, ti mu'yuc jtu ta satique, ti xjelov to xaq'uic jech chac c'u cha'al vu'une.

¹⁹ Chtal ox yac'bicun ti c'alal ja'o oy jvocole, pero ja' la scoltaun li Muc'ul Diose,

²⁰ jech licol loq'uel. La scoltaun yu'un toj c'uxun ta yo'nton.

²¹ Li Muc'ul Diose laj yac'bun jmoton ta sventa ti lec c'usi la jpase, ta sventa ti lec yabtel li jc'obe.

²² Yu'un ja' no'ox la jtam o li be yu'une; mu'yuc bu la jmuc o ta co'nton li Muc'ul Dios cu'une.

²³ Oy ta co'nton scotol li c'usitic yaloje; mu'yuc bu la jbajbe li smantaltaque.

²⁴ Tuc' la jpas jba ta stojol; la jq'uel jba ta sventa li c'usitic chopole.

²⁵ Ja' yu'un laj yac'bun jmoton ta sventa ti tuc' co'ntone, ta sventa ti lec laj yil li cabtele.

²⁶ “Dios, jun avo'nton ta stojol li boch'o jun yo'nton ta atojole; tuc' c'usi chapasbe li boch'o tuc' tspas ta atojole.

²⁷ Lec chavil ec li boch'o lec chayilote; yan li boch'o chopolique tsots c'usi chapas ta stojolic.

²⁸ Ja' chacolta li boch'o biq'uit chac' sbae; yan li boch'o toyol chac' sbae chavac' asat ta stojol yu'un ac'o bic'tajicuc.

²⁹ Muc'ul Dios, vo'ot jluz c'otemot; Dios cu'un, vo'ot chavac'bun axojobal ta ic' osil.

³⁰ Vo'ot ta aventa ta jtsal li cajcontrae; vo'ot ta aventa ta jbitubta jelovel li coraltonetic yu'un slumalique.

³¹ “Li Diose lec tuc' li be yu'une. Li c'usitic yaloje, jbel sc'oplal chc'ot ta pasel. Li Muc'ul Diose lec chchabi li boch'otic nabalic o ta stojole.

³² Mu'yuc yan Dios jech chac c'u cha'al li Muc'ul Diose; mu'yuc yan Dios ti xu' yu'un chixchabiutique.

³³ Li Diose ja' mero jnac'ubbail, yu'un toj ech'em svu'el; ja' chac' ti lec tuc' chbat li c'usi ta jpase.

³⁴ Ja' chisabaltasbun cacan jech chac c'u cha'al te'tical chij; ja' chistec'anbun lec cacan ta muyebaltic.

³⁵ Ja' chixchanubtasun ta sventa pleito; ja' chiyac'bun jtsatsal ta xotbinel li st'ilesubil flecha pasbil ta broncee.

³⁶ “Vo'ot chachabiun, chacoltaun ta sventa yutsil avo'nton lec ibat scotol li c'usi la jpase.

³⁷ C'un no'ox xanubal laj ca'ay ta aventa; mu'yuc xjaxbuj cacan avu'un.

³⁸ “La jnuts batel li cajcontrae, jech la jtsal comel; ja' to lisut tal ti c'alal icham comel scotol cu'une.

³⁹ La jcules scotol; biq'uitic la jpas comel. Muc xa stotsic, te no'ox mochajtic icomic ta yolon cacan.

⁴⁰ Vo'ot laj avac'bun jtsatsal ta paspleito; laj abic'tajesbun ta jtojol li cajcontrataque.

⁴¹ Laj avac' jatovicuc loq'uel ta jtojol, jech ivu' cu'un la jcules li boch'otic chilintaicune.

⁴² Laj to sc'anic coltael, pero mu'yuc boch'o icoltaatic yu'un. Laj to sc'opanicot, pero muc xatuc'ulanbe sc'opic.

⁴³ La jcules scotol jech chac c'u cha'al pucuc; la jpech'ilan ta teq'uel jech chac c'u cha'al ach'eltic ta xoral.

⁴⁴ Laj acoltaun ta sventa li c'opetic ta jlumale. Laj achabiun yu'un jech vu'un laj avac'bun jventain li jlumale; lic tunicuc cu'un li yanlumetic ti mu xcotquinane.

⁴⁵ C'alal laj ya'ibicun jc'oplale, la xch'unbicun jmantal; li yanlumetique laj yich'icun ta muc'.

⁴⁶ Li yanlumetique ilaj stsatsalic; chniquic xa loq'uel tal ti bu snac'oj sbaique.

⁴⁷ “¡Ich'biluc ta muc' li Muc'ul Diose!, ¡Ac'o ich'atuc ta muc' li jchabivanej cu'une! Ac'o muq'uibuc sc'oplal li Diose, ja' li jcoltavanej cu'une.

⁴⁸ Ja' li Dios ti laj yac' jsutesbe spacol li jvocole, xchi'uc ti laj yac'bun jventain li yantic lumetique.

⁴⁹ Ja' ti la scoltaun ta sc'ob cajcontrataque; ti solel stoyoj sbaic ta jtojole. Muc'ul Dios, vo'ot laj acoltaun loq'uel ta sc'ob li jsa'c'op cristianoetique.

⁵⁰ Ja' yu'un chcal alequilal ta stojol li muc'tic lumetique; li' ta jq'uejinta slequilal li abie.

⁵¹ Laj avac' tsalvanuc li ajvalil at'ujoje, yu'un lec ono'ox ac'anoj li Davide xchi'uc li smomnich'nabtaque”, xi li q'ueoj la sq'uejinta Davide.