2 Samuel 2 - Bible in Tzotzil de Chenalhó with Deuterocanon

I'och ta ajvalilal ta Judá li Davide

¹ C'alal jech ic'ot ta pasele, li Davide jech lic sjac'be li Muc'ul Diose: —¿Me xu' chibat ta junuc lum te ta yosilal Judae? —xut. —Xu' chabat —xi li Muc'ul Diose. Jech la sjac' noxtoc li Davide: —¿Bu lumal xu' chibat? —xut. —Batan te ta Hebrón —xi li Muc'ul Diose.

² Jech te ibatic xchi'uc xchibal yajnil li Davide; ja' li Ahinoam liquem ta lum Jezreele xchi'uc li Abigail yajnil anima Nabal te ta Carmele.

³ Laj yic'an batel noxtoc li svinictac ti te ono'ox xchi'inoje; laj yic' batel xchi'uc yajnil xnich'nabic, te ic'ot naquiicuc ta Hebrón xchi'uc ta bic'tal lumetic yu'un.

⁴ Italic scotol li viniquetic ta Judae; te la smalbeic aceite ta sjol sventa ch-och ta ajvalilal ta Judá banamil li Davide. Te lic yalbeic David ti ja' la smuquic Saúl li jabes-galaadetique.

⁵ Li Davide la stac batel j'almantaletic ta Jabes-Galaad, jech bat yalbeic: “Ac'o yac'boxuc bendición li Muc'ul Diose yu'un laj ac'uxubinic li Saule, ja' li ajvalil cu'untique, yu'un laj amucbeic li sbec'tale.

⁶ Jech ac'o xc'uxubinoxuc ec li Muc'ul Diose; ac'o lec yiloxuc. Jech ec li vu'une, lec chaquiloxuc ta sventa ti jech laj apasique.

⁷ Pero tsotsanic me; oyuc me lec stsatsal avo'ntonic. Ac'o me icham xa li Saúl, ja' li ajvalil cu'untique, pero li judaetique laj xa smalbicun aceite ta jol sventa vu'un chi'och ta ajvalilal yu'unic”, xut batel li Davide.

La spasic pleito Israel xchi'uc Judá

⁸ Pero li Abner xnich'on Nere, ja' li mero banquilal jpasmantal yu'un yajsoldadotac Saule, laj yic' batel ta Mahanaim li Is-boset, xnich'on anima Saule.

⁹ Te c'ot stic' ta ajvalilal yu'un lum Galaad, Gesuri, Jezreel, Efraín, Benjamín, xchi'uc ta sventa scotol Israel.

¹⁰ C'alal i'och ta ajvalilal ta sventa Israel banamil li Is-boset xnich'on Saule, yich'oj xa'ox cha'vinic (40) jabil. Chib no'ox jabil i'abtej. Li Davide ja' xa no'ox la sventain ec li jchop liquemic ta Judae.

¹¹ Li Davide o'lol xvaxquibal jabil i'abtej ta Hebrón banamil ta stojol li jchop liquemic ta Judae.

¹² Li Abnere iloc' batel ta Mahanaim; ibat ta Gabaón xchi'uc li yajsoldadotac Is-bosete.

¹³ Jech ec li Joab yol Sarviae iloq'uic batel ta Hebrón xchi'uc li yajsoldadotac Davide. Te la sta sbaic xchi'uc Abner ta nopol stanqueal vo' ta Gabaón, te la sva'an sbaic ta jujujot xocon.

¹⁴ Li Abnere jech laj yalbe li Joabe: —Ac'o loc'uc tal scontrainuncutic li queremetic avu'unique —xut. —Lec oy —xi li Joabe.

¹⁵ Co'ol yepal la sloq'ues sviniquic ta jujujot. Lajchab (12) iloc' yu'unic li benjaminetique, ja' li svinictac Is-bosete; lajchab (12) iloc' svinic ec li Davide.

¹⁶ Ta jujuntal lic stsacbe sba sjolic; la xenbe sbaic ta xoconic li yespadaique. Jech scotolic te ichamic o. Ja' yu'un Helcat-hazurim la sbiin li banamile.

¹⁷ Toj tsots pleito la spasic li jun c'ac'al le'e. Li Abner xchi'uc scotol li soldadoetic ta Israele tsalbil ic'otic yu'un li yajsoldadotac Davide.

¹⁸ Te oyic yoxibal li yalab Sarviae, ja' li Joab, Abisai, xchi'uc Asaele. Li Asaele bats'i tsots x'anilaj jech chac c'u cha'al te'tical chij.

¹⁹ La snuts batel ta anil li Abnere, jech muc xa c'uxi xut la spoj sba.

²⁰ C'alal la sq'uel batel spat li Abnere, jech laj yal: —¿Me vo'ot Asael? —xut. —Vu'un —xi li Asaele.

²¹ Li Abnere jech laj yal: —Avocoluc mu xa xanutsun. Ja' lec ja' tsaco junuc li jvinictaque; te xavich'be o li c'usitic yich'oje —xut. Ta sventa ti mu xlaj yo'nton o ta nutsvanej li Asaele,

²² jech laj yal yan velta li Abnere: —Mu xa xanutsun. ¿Me yu'un chac'an ti chajmilot oe? ¿C'u x'elan xu' chbat to cac' ta q'uelel jsat ta stojol li abanquil Joabe? —xut.

²³ Pero li Asaele muc xch'un. Ja' yu'un li Abnere la spajbe ochel ta xch'ut li xchac slanzae; toj loq'uel c'alal ta spat. Te no'ox iyal ta lum li Asaele; icham o. Scotol li boch'otic te chjelovic yo' bu telele, te chva'iic tsq'uelic.

²⁴ Pero li Joab xchi'uc Abisaie te to la snutsic o batel li Abnere. Xch'ay xa c'ac'al ic'otic ta unin vits Ama te ta stuq'uil Gía ta sbelal xocol banamil ta Gabaón.

²⁵ Li benjaminetique te la stsob sbaic xchi'uquic li Abnere. Jun no'ox laj yac' sba scotol li soldadoetique; te bat smac yav snaic ta sjol li unin vitse.

²⁶ Li Abnere laj yapta li Joabe: —¿Me mu'yuc chlaj avo'ntonic o ta milvanej? ¿Me mu xana' ti xu' ta jta tsots jvocoltic o ta sventae? ¿C'usi to ora chavalbe avinictac ti ac'o xa lajuc yo'ntonic ta snutsel li achi'ilique? —xut.

²⁷ Itac'ov li Joabe: —Jamal chacalbot ta stojol Dios, ti manchuc jech laj avale, chajnutsotcutic o batel achi'uc achi'iltac c'alal to tsacub oc'om ti jechuque —xut.

²⁸ Li Joabe lic sjupan xcachu, jech ipajic ta anil scotol li svinictaque. Muc xa snutsic batel li israeletique; muc xa spasic o pleito.

²⁹ Li Abner xchi'uc svinictaque ixanovic batel sbejel ac'ubal ta stenlejaltic yu'un Arabá. Te ijelovic batel ta Jordán; la xtuch'ic jelovel scotol li Bitrone; te ic'otic ta Mahanaim.

³⁰ Jech ec li Joabe isutic batel ta snutsel li Abnere; la stsob scotol li svinictaque, te laj yil ti ch'ojol balunlajunebe, xchi'uc ti mu'yuc te oy noxtoc li Asaele.

³¹ Pero li svinictac Davide ja' la smilic oxib ciento xchi'uc oxvinic (360) li benjaminetique xchi'uc li svinictac Abnere.

³² Ts'acal to laj yich'beic batel ta Belén sbec'tal li Asaele; te la smuquic ta smuquinal stot. Li Joab xchi'uc svinictaque sbejel ac'ubal ixanovic batel. C'alal isacube, te xa'ox oyic ta Hebrón.