2 Samuel 15 - Bible in Tzotzil de Chenalhó with Deuterocanon

Li Absalone lic scontrain sbaic xchi'uc li Davide

¹ C'alal i'ech' jayibuc c'ac'ale, li Absalone la xchapan scareta sventa pleito, xchi'uc ca'etic xchi'uc lajuneb yoxvinic viniquetic (50) sventa ba'yucbe chbatic yu'un.

² Ta yoc'omal sob ilic li Absalone; te bat sva'an sba ta jot xocon be ta yochebal lum. Scotol li boch'otic oy sc'opique bat sc'anic chapanel ta stojol li ajvalile. Li Absalone ta sjac'be: “¿Bu alumal?”, xut. “Vu'un oyun ta jchop sts'unubal li Israele”, me xie,

³ jech chalbe: “Li ava'yeje toj lec, oy smelol. Pero mu'yuc boch'o te comen yu'un ajvalil ti xu' chaya'ibot ac'opique”, xut.

⁴ Jech to laj yal li Absalone: “Ti vu'cun quich'oj cabtel ta ajvalilal li' ta cosilaltique, ta jchapanoxuc c'alal oy pleito, c'alal oy c'op avu'unic ti jechuque”, xut.

⁵ C'alal oy boch'o chnopaj batel chbat sc'opan li Absalone, li Absalone laj yac' sc'ob, la smey, la sts'uts'.

⁶ Ja' jech la spasbe scotol li boch'otic chbat ox sc'anic chapanel ta stojol li ajvalile. Ja' jech la slo'labe yo'nton israeletic li Absalone.

⁷ C'alal i'ech' chanib jabile, li Absalone jech laj yalbe li ajvalile: —Ajvalil, avocoluc ac'un batel ta Hebrón, yu'un chbat jpas li c'usi caloj ta stojol Muc'ul Diose.

⁸ Yu'un c'alal te to'ox nacalun ta Gezure, laj cal ti chitun yu'un Muc'ul Dios ti me chac' sutcun tal li' ta Jerusalene —xut.

⁹ Itac'ov li ajvalile: —Lec oy, junuc avo'nton batan —xut. Jech ibat ta Hebrón li Absalone.

¹⁰ Li Absalone ta ora no'ox la stac batel j'almantaletic ta scotol li jaychop israeletique, jech laj yal batel: “C'alal me laj ava'yic laj yich' jupanel oq'uesetique, jech xavalic: ‘Ja' xa i'och ta ajvalilal te ta Hebrón li Absalone’, chianic”, xut.

¹¹ Jech noxtoc laj yic' batel chib ciento (200) viniquetic te ta Jerusalén. Li viniquetique jun no'ox yo'nton ibatic; mu'yuc ya'yojic c'usi chc'ot ta pasel.

¹² Jech noxtoc li Absalone la stac ta iq'uel jun jbijubtasvanej yu'un li Davide, Ahitofel sbi. Te nacal ta slumal ta Gilo. Ja' la xchi'in ti c'alal laj yac'be smoton Diose. Ta sventa ti la xchi'in li Ahitofele jech i'ayin o lec stsatsal li Absalone, jech i'epaj o li svinictaque.

Ijatov loq'uel ta Jerusalén li Davide

¹³ Oy jun boch'o ibat yalbe David ti ep xa israeletic chbatic ta stojol li Absalone.

¹⁴ Ja' yu'un li Davide jech laj yalbe scotol li j'abteletic yu'un te xchi'uc ta Jerusalene: —Jatovcutic batel ta ora, naca me ts'acal mu xa xu' cu'untic chijatovutic loq'uel ta stojol li Absalone. Cac'tic persa ta ora, naca me ja' laj yac'beic yipal li stuquique, jech xu' li' chistautic, xu' chispasbutic li c'usi chopole, xchi'uc xu' tsmil comel ta espada scotol li jchi'iltactic li' ta lume —xi.

¹⁵ Itac'ovic: —Vu'uncutic li avaj'abteluncutique, ta jpascutic scotol li c'usi chavalbuncutique —xiic.

¹⁶ Ja' yu'un li ajvalile iloc' batel; la xchi'in batel scotol li yuts' yalaltaque xchi'uc li xchi'iltac ta abtele. Ja' xa no'ox la scomtsan lajuneb yan antsetic yu'un sventa chchabiic li na bu tspas mantale.

¹⁷ Jech iloq'uic batel li ajvalile xchi'uc li boch'otic la xchi'in batele. C'alal nom xa'ox oyic batele, te c'ot sva'an sbaic.

¹⁸ Te la sva'an sbaic ta xocon ajvalil scotol li yaj'abteltaque, xchi'uc scotol li ceretetic, peletetic, xchi'uc li vaquib ciento (600) getetic ti ba'yucbeic batel yu'un li ajvalile, ti iliquic tal ta yacanic c'alal ta Gate.

¹⁹ Li ajvalile jech laj yalbe li Itai liquem tal ta Gate: —¿C'u yu'un ti tal achi'inuncutic ec li vo'ote? Ja' lec ti chasut batele, ja' xachi'in li ach' ajvalile. Yu'un li vo'ote yan alumal; jatovenot loq'uel tal ta alumal.

²⁰ Xchi'uc ja' to no'ox lavul volje. Mu smeloluc ti chaquic'ot batel ta anil yu'un chbat achi'inune, yu'un li vu'une mu jna' c'uxi chibat ec. Ja' lec sutan batel, ic'o sutel scotol li achi'iltaque. Muc'ul Dios chayac'boxuc bendición, xchi'uc ja' chaxchi'inoxuc o scotol c'ac'al —xut.

²¹ Itac'ov li Itaie: —Ajvalil, ta xcal ta jamal ta stojol Muc'ul Dios xchi'uc ta atojol ec, me cuxulun, o me te chicham batel, te ono'ox chajchi'inot batel buyuc no'ox chabat —xi.

²² Itac'ov li Davide: —Lec oy, batic cha'e —xut. Jech ibat xchi'in David li Itaie. Ibat xchi'uc scotol xchi'iltac, xchi'uc yuts' yalaltac.

²³ Scotol li israeletique bats'i tsots i'oq'uic. Li ajvalile ijelovic batel ta jot bevo' Cedrón xchi'uc scotol li xchi'iltaque. Scotol li xchi'iltaque ijelovic batel ta ba'yucbe ta sbelal xocol banamil.

²⁴ Te ibat ec li Sadoque xchi'uc scotol li levietic ti yich'ojbeic batel xcaxail smantal Diose. Te to la scotanic li caxae, ja' to ti c'alal iloq'uic xa batel ta lum scotol li israeletique; ts'acal te ic'ot ec li Abiatare.

²⁵ Pero li ajvalile jech laj yalbe li pale Sadoque: —Ich'o sutel ta lum li caxae, yu'un me laj to xc'uxubinun li Muc'ul Diose, ta xiyac'un sutel tal li'i. Jech li' to ta xvul jq'uel li caxae xchi'uc li yav bu oye.

²⁶ Pero me chiyalbun ti mu'yuc chixc'uxubinune, lec oy, ac'o spasbun li c'usi tsc'an yo'ntone —xut.

²⁷ Li ajvalile jech laj yalbe noxtoc li Sadoque: —Vo'ot li j'alc'opote, junuc avo'nton sutanic batel ta lum achi'uc li Abiatare xchi'uc li anich'nabique, ja' li anich'on Ahimaas xchi'uc li Jonatán xnich'on Abiatare.

²⁸ Li vu'une li' to chicom ta stenlejaltic ta xocol banamile, ja' to me laj ca'ay ava'yejic c'usi chc'ot ta pasele —xut.

²⁹ Li Sadoc xchi'uc Abiatare laj yich'ic sutel ta Jerusalén li xcaxail smantal Diose; te icomic o.

³⁰ Li Davide imuy batel ta muyebaltic te ta Olivatic. Te x'oc'olet muyel, xpixoj batel sjol, xchi'uc jeche' xbixbun batel yacan. Scotol li xchi'iltac bat xchi'ine xpixojic batel sjolic ec, xchi'uc x'oc'oletic batel.

³¹ C'alal laj ya'ay David ti ja' xchi'il ta liquesej c'op Ahitofel li Absalone, li Davide la sc'anbe vocol Muc'ul Dios ti ac'o ch'ayuc ta be c'usi xchapanoj li Ahitofele.

³² C'alal ic'ot ta jolvits li David sventa chich' ta muc' Diose, te ital nupatuc yu'un Husai arquita vinic. Li'em batel sc'u', yac'oj lum ta sjol.

³³ Li Davide jech laj yalbe: —Me chtal achi'inune, ja' no'ox chtal avac'bun quicats.

³⁴ Pero me chasut batel ta Jerusalene, me jech chbat avalbe li Absalone: ‘Ajvalil, li vu'une ta xicom ta avaj'abtel jech chac c'u cha'al comenun to'ox ta yaj'abtel li atote’, me xavute, jech xu' te chalajesbe o sc'oplal c'usi xchapanoj li Ahitofele.

³⁵ Ja' no'ox venta te achi'inoj li pale Sadoc xchi'uc Abiatare, xu' te chavalbe scotol li c'usitic chava'ay ta stojol ajvalile.

³⁶ Jech noxtoc li xnich'nabique, ja' li Ahimaas xchi'uc Jonatane, te oyic ec. Ja' yu'un avocoluc ja' xavalbeic scotol li c'usi chava'ye; xu' ja' xa chiyalbicun ec —xut.

³⁷ Li Husai ti lec sc'opan sbaic xchi'uc Davide te ic'ot ta Jerusalén ti c'alal ja' to no'ox ch-och batel ta lum li Absalone.