2 Samuel 14 - Bible in Tzotzil de Chenalhó with Deuterocanon

Li Joabe tsc'an chic' sutel li Absalone

¹ Li Joab yol Sarviae la sna' ti ep cht'ab ta yo'nton Absalón li ajvalile.

² Jech la stac ta iq'uel jun ants te nacal ta Tecoa; ja' jun ants ti toj manya snopel c'usi tspase. Jech laj yalbe: “Avocoluc cuyo aba ti ep chavat avo'ntone. Lapo li c'u'il sventa me'nale; mu xa xavac' amuil poxil, yu'un jech ac'o vinajuc ti ep xa c'ac'al chavat avo'nton ta sventa ti oy boch'o chamen avu'un yilele.

³ Ja'o xabat ta stojol li ajvalile, jech xc'ot avalbe jech chac c'u cha'al chacalbote”, xut. Te la xcha'albe lec batel li c'usi chc'ot yale.

⁴ Jech ibat li antse; te ic'ot ta stojol li ajvalile, c'ot spatan sba ta banamil yu'un chich' ta muc'. Jech laj yalbe: —Ajvalil, avocoluc coltaun —xut.

⁵ —¿C'usi apas? —xi li ajvalile. Itac'ov li antse: —Vu'un me'on antsun, yu'un icham li jmalale.

⁶ Oy chib jqueremetic, pero la scontrain sbaic ta te'tic. Ta sventa ti mu'yuc boch'o xvoc'atique, te laj yac'be sbaic, jech te icham o li june.

⁷ Pero li' ta orae chiscontrainicun li cuts' calaltaque. Tsc'anic ti ac'o cac' ta c'abal li col ti imilvane, yu'un ac'o chamuc ec, yu'un jech ac'o mu'yucuc boch'o chich' comel li c'usi oy cu'une. Tsc'an chulesic o li yu jun xa col oye. Mu xa xaq'uic ti ac'o boluc smomnich'nab li anima jmalale, xchi'uc ti te ac'o oyuc o sbie —xut.

⁸ Li ajvalile jech laj yalbe li antse: —Batan ta ana; vu'un ta xcal mantal sventa chata coltael —xut.

⁹ Itac'ov li antse: —Ajvalil, mu xu' boch'o yan chcuch li jmulcutique; vu'un ac'o jcuch comel xchi'uc li cuts' calaltac ta sventa jtote. Mu xu' vo'ot xacuch xchi'uc li avalab anich'nabe —xut.

¹⁰ Itac'ov li ajvalile: —Li boch'o chascontrainote ic'bun tal, jech mu xa xascontrainot yan velta —xi.

¹¹ Pero li antse jech laj yalilan: —Ajvalil, abulajan c'anbo vocol li Muc'ul Dios avu'une, yu'un mu me xepajesbun jvocol li cuts' calale, yu'un tsc'an tsmilic, tsc'an tspacbeic li jun jcot col ti la smil xchi'ile —xut. Li ajvalile jech laj yal ta jamal: —Ta stojol Muc'ul Dios chacalbot, me jbejuc stsotsil sjol mu'yuc chbaj yalel ta banamil li jun avole —xut.

¹² Pero li antse jech to laj yal: —Ajvalil, avocoluc ta jc'an to chacalbot jbeluc slajeb ca'yej —xut. —Lec oy, c'opojan —xi li ajvalile.

¹³ Jech lic sjac' li antse: —¿C'u yu'un laj anop jech chapas ta stojol ec li xnich'nabtac Diose? Vo'ot li ajvalilote oy amul chc'ot ta sventa li c'usi laj avale, yu'un vo'ot mu xavac' sutuc tal li anich'on ti jatoven batele.

¹⁴ Pisile jcotoltic chijchamutic. Co'olutic jech chac c'u cha'al vo' chmal ta banamil ti mu xa stac tsobele. Pero li Diose me junuc mu xac' chamuc; oy ta yo'nton tsa' c'u x'elan mu j'ech'eluc chnamaj o batel ta stojol li boch'o loq'uem batele.

¹⁵ Ti jech tal calbot vo'ot li cajvalot, ti ajvalilot cu'une, ja' ta sventa ti la sibtasicun li jchi'iltaque. Ja' yu'un jech la jnop: “Chbat jc'opan ca'tic li ajvalile, naca me xispasbun li c'usi ta jc'anbee”, xichi.

¹⁶ Me chava'ibun jc'op vo'ot li ajvalilote, xu' chacoltaun ta sventa li boch'otic tsc'an chiyulesuncutic o jchi'uc li cole ti tsc'an chisloq'uesuncutic o li' ta osil ti ja' yu'un Diose.

¹⁷ Ja' yu'un ta jmala ti ac'o ja'uc sventa chpat co'nton yu'un li c'usi chatac'bune, yu'un vo'ot ajvalilot. Xavotquin bu lec, xchi'uc bu chopol jech chac c'u cha'al jun yaj'almantal Dios. Te ac'o xchi'inot comel li Muc'ul Diose —xut.

¹⁸ Li ajvalile jech la stac'be li antse: —Avocoluc jamal me xavalbun li c'usi chajac'bote; mu me xamuc ta avo'nton —xut. —Lec oy ajvalil, jac'bun —xi itac'ov li antse.

¹⁹ Jech lic sjac' li ajvalile: —¿Me mu jechuc ti ja' Joab laj yalbot li c'usitic laj avalbune? —xut. Itac'ov li antse: —Ajvalil, ja' melel scotol li c'usi laj avale; mu xu' chcal ti oy bu mu jechuque. Li j'abtel avu'un, ja' li Joabe, ja' la stacun tal li'i, xchi'uc ja' laj yalbun scotol li c'usi laj calbote.

²⁰ Ti jech la spas li Joabe, yu'un tsc'an ti ac'o jeluc li c'usi chanope. Pero vo'ot li ajvalilote toj bijot; xavotquin scotol c'usi chc'ot ta pasel li' ta cosilaltic jech chac c'u cha'al jun yaj'almantal Dios —xut.

²¹ Ja' yu'un li ajvalile jech laj yalbe li Joabe: —Q'uelavil, jech ta jpas chac li'i: Sutan batel; xu' chbat avic' sutel tal li querem Absalone —xut.

²² Li Joabe la spatan sba c'alal ta banamil yu'un laj yich' ta muc' li ajvalile; la sc'anbe bendición jech laj yalbe: —Ajvalil, li' ta orae laj xa jna' ti ta melel lec chavilune, yu'un laj apasbun li c'usi laj calbote —xut.

²³ Li Joabe ta ora no'ox ibat ta Gesur, bat yic' tal li Absalone; te ic'ot xchi'uc ta Jerusalén.

²⁴ Pero li ajvalile laj yal mantal ti tuc' ac'o batuc ta snae, ti mu me xjelov ta stojol li ajvalile. Ja' yu'un li Absalone tuc' ibat ta sna; muc xjelov ta stojol li ajvalile.

²⁵ Ta scotol li israeletique mu'yuc boch'o yan jech vinic toj c'upil sba, lec c'anbil ta sventa st'ujumal jech chac c'u cha'al li Absalone. Li Absalone xlic ta yacan c'alal ta sjol, mu'yuc c'usi chopol.

²⁶ C'alal chac' ta loq'uel sjole (ja' to ta jujun slajeb jabil chac' ta loq'uel c'alal cha'ay ti mu xa lecuque), ech'em ta chib kilo yalal li stsotsil sjole.

²⁷ Li Absalone oy oxib squerem xchi'uc jun stseb, Tamar sbi, lec c'ac'al tseb.

²⁸ Chib jabil te icom ta Jerusalén li Absalone; mu'yuc bu laj yilbe sba satic o xchi'uc li ajvalile.

²⁹ Li Absalone la stac ta iq'uel li Joabe yu'un ac'o bat c'opanbatuc li ajvalile, pero muc sc'an xbat. La stac batel xchibal velta, pero muc sc'an xbat noxtoc.

³⁰ Ja' yu'un li Absalone jech laj yalbe li smozotaque: —Q'uelavilic, li yosil Joabe jmoj snitoj sba xchi'uc li cosile; te sts'unoj cebada. Ja' lec bat ac'beic sc'ac'al li strigoe —xut. Li smozotac Absalone bat yac'beic sc'ac'al li yosil Joabe.

³¹ Li Joabe ta ora ibat ta sna li Absalone, jech c'ot yalbe: —¿C'u yu'un ay yac'beic sc'ac'al cosil li amozotaque? —xut.

³² Itac'ov li Absalone: —Xana' ti la jtacot ta iq'uele yu'un ta jc'an chbat ac'opanbun li ajvalile. Ta jc'an chbat avalbe ti mu'yuc stu ti liloc' tal ta Gesure; ja' lec ti teuc no'ox comcune. Xchi'uc ta jc'an chavalbe ti ta jc'an ta jc'opan li ajvalile, yu'un me oy jmul yu'une, ac'o smilun —xut.

³³ Ja' yu'un li Joabe ibat sc'opan li ajvalile; laj yalbe ya'ay c'usi laj yal li Absalone. Li ajvalile la stac ta iq'uel li Absalone. C'alal ic'ot li Absalone, la squejan, la spatan sba ta banamil. Li ajvalile la sts'uts' li Absalone.