2 Samuel 13 - Bible in Tzotzil de Chenalhó with Deuterocanon

Sc'oplal Amnón xchi'uc Tamar

¹ Li Absalón xnich'on Davide oy jun yixlal, Tamar sbi, lec c'upil sba. Oy yan xnich'on noxtoc li Davide, Amnón sbi. Oy ta yo'nton tsc'opan li Tamare.

² Li Amnone ep chlo'ilaj yo'nton yu'un li yixlale, jech te i'ipaj o xchi'uc. Yu'un stsebal to li yixlale, ja' yu'un toj vocol c'uxi xu' tsta ta c'opanel.

³ Pero li Amnone oy jun xchi'il; toj manya snopel c'usi tspas. Lec sc'opan sba xchi'uc li Amnone, Jonadab sbi; ja' xnich'on sbanquil li Davide, Simea sbi.

⁴ Li Jonadabe jech la sjac'be li Amnone: —¿C'usi apas, xnich'on ajvalil? ¿C'u yu'un ti yantic no'ox cha'ich'baj batel jujun c'ac'al chquile? Ja' lec jamal xavalbun ca'ay —xut. Itac'ov li Amnone: —Yu'un toj chac jchi'in ca'ay li Tamar, yixlal quits'in Absalone —xut.

⁵ Li Jonadabe jech laj yalbe: —Mochano aba ta avayab; cuyo aba ta jchamel. C'alal chtal sq'uelot li atote, jech xavalbe: ‘Avocoluc tacbun tal li quixlalcutic Tamare. Ac'o tal yac'bun jve'el, pero li' ta jsat ac'o smeltsanbun li jve'ele, jech xu' ta jve' li c'usi chiyac'bune’, uto —xut.

⁶ Li Amnone la xmochan sba ta svayab; la scuy sba ta jchamel, jech te ital q'uelatuc yu'un li stote. Jech laj yalbe: —Ta jc'anbot vocol ti ac'o atac tal li quixlalcutic Tamare. Li' ac'o spasbun chibuc lequil pan, yu'un jech xu' ta jve' ti c'alal chiyac'bune —xut.

⁷ Li Davide laj yic' li Tamare, jech laj yalbe: —Avocoluc batan ta sna li axi'mel Amnone; bat pasbo jutuc sve'el —xut.

⁸ Li Tamare ibat ta sna li xi'mel Amnón te mochol ta svayabe. Te lic stsac arina; la svots', la spas li lequil pane.

⁹ Ts'acal lic xch'il ta xaltem. Pero li Amnone muc sc'an xve'. Lic yal mantal ti ac'o loq'uicuc scotolic li boch'otic te oyique.

¹⁰ C'alal loq'uemic xa scotolique, li Amnone jech lic yalbe li Tamare: —Ich'bun tal li jve'el li' ta jvayabe; lechbun li jve'ele —xut. Jech li Tamare laj yich' batel li lequil pan spasoje, bat yac'be ta svayab li Amnone.

¹¹ C'alal inopaj batel bat yac'be sve'ele, li Amnone la stsac, jech laj yalbe: —Tseb, la' vaycutic li'i —xut.

¹² Itac'ov li tsebe: —Xi'mel, mu jc'an jech xapas; mu xavuts'intaun. Mu'yuc boch'o jech spas cu'untic li' ta Israel. Mu me xapas li c'usi toj chopole.

¹³ Mu jna' bu chibat yu'un q'uexlal ti me jech chapase. Jech ec li vo'ote bol vinic xa cha'ilat li' ta stojol li jchi'iltactic ta israelale. Avocoluc bat c'opano li ajvalile; albo ti chac'an chavic'une —xut.

¹⁴ Pero li Amnone muc xch'un. Ta sventa ti ja' toj tsots slomoe, jech laj yac' persa la xchi'in li yixlale.

¹⁵ Pero li Amnone yolbaj to lic sbaj o li yixlal ta sventa ti jech la spasbee; muc xa sc'an o jech chac c'u cha'al lec to'ox sc'anoje. Ja' yu'un jech lic yalbe: —Lican, batan xa —xut.

¹⁶ Itac'ov li Tamare: —Xi'mel, mu'yuc chiloc' batel, yu'un me chatacun loq'uel li'i, ja' x'ech' to chopol chc'ot jech chac c'u cha'al laj apasbune —xut. Pero li Amnone muc xch'un,

¹⁷ jech lic stac ta iq'uel smozo jech laj yalbe: —Loq'uesic batel li ants li'i; maquic lec comel li ti'nae —xut.

¹⁸ Li mozoe laj yic' loq'uel li tsebe; la smac lec li ti'nae. Li Tamare jlic no'ox natil c'u'il slapoj, lec c'upil sba, yu'un ja' jech sc'u' sna' slapic o li stseb ajvaliletic ti stsebalic toe.

¹⁹ Laj yac' batel tan ta sjol; la sli' li sc'u' slapoje. Scajanoj batel sc'ob ta sjol; te x'oc'olet batel ta be.

²⁰ Li xi'mel Absalone jech la sjac'be li yixlale: —¿Me ja' axi'mel Amnón ti jech la spasbote? Mu me c'usi xaval, quixlal, yu'un ja' axi'mel. Mu masuc xavat avo'nton ta sventa ti jech ic'ot ta pasele —xut. Li Tamare te icom ta sna li xi'mel Absalone; stuc xa laj ya'ay o.

²¹ C'alal laj ya'ay ajvalil David scotol li c'usi ic'ot ta pasele, bats'i tsots i'ilin. Pero muc xut li xnich'on Amnone, yu'un ja' banquilal xnich'on, xchi'uc toj lec sc'anoj.

²² Jech ec li Absalone mu'yuc c'usi laj yalbe li Amnone, ac'o me toj chopol laj yil ti i'uts'intabat yixlale.

Li Absalone la spacbe sutel c'usi chopol la spas li Amnone

²³ C'alal i'ech' xa'ox chib jabile, li svinictac Absalone te tsloq'uic tsotsil chij ta Baal-azor ta nopol lum Efraín. Li Absalone lic yic' ta ve'el scotol li xnich'nab ajvalile.

²⁴ Jech noxtoc ibat sq'uel li ajvalile, jech c'ot yalbe: —Li jvinictaque te yochelic sloq'uel stsotsil jchij. Ja' yu'un ta jc'an ti chbat achi'inicun achi'uc li j'abteletic avu'une —xut.

²⁵ Pero li ajvalile jech laj yal: —Mo'oj, mu xu' chibat jcotolcutic; mu jc'an xcac'cutic ep avocol —xi. Li Absalone laj yac' persa laj yic', pero li ajvalile muc sc'an xbat. Ja' no'ox laj yac'be batel bendición.

²⁶ Li Absalone jech laj yal: —Me mu xu' chabate, ja' no'ox alo mantal ac'o xchi'inuncutic batel li jbanquil Amnone —xut. —¿C'u yu'un ti chac'an chbat xchi'inot li abanquil Amnone? —xi li ajvalile.

²⁷ Pero li Absalone muc xlaj yo'nton ta sc'anel, ja' yu'un li ajvalile la scolta batel li Amnone xchi'uc scotol xnich'nab li ajvalile. Li Absalone xchapanoj xa'ox lec ve'lil.

²⁸ Xchi'uc jech xa'ox yalojbe li smozotaque: “Q'uelic me lec, c'alal me laj avilic ep xa bat yuch'el vino yu'un li Amnone, me laj calboxuc ti ac'o amilique, milic ta ora. Mu me xaxi'ic, yu'un vu'un chacalboxuc mantal. Ja' yu'un tsotsanic me; mu me xaxi'ic”, xut.

²⁹ Li c'usi laj yal Absalone, ic'ot ta pasel. Li smozotaque la smilic li Amnone. Ja' yu'un scotol li xnich'nab ajvalile icajiic ta smulaic; ijatovic batel.

³⁰ C'alal ja'o chanovic batele, li Davide laj ya'ay xa'ox a'yej ti imilbat xa scotol xnich'nab yu'un li Absalone, ti mu xa junuc boch'o cuxul icome.

³¹ Li ajvalile iva'i, la sli' sc'u'; yu'un toj ep chat yo'nton, xchi'uc la xmochan sba ta lumtic. Scotol li j'abteletic yu'un te oyique la sli' sc'u'ic ec.

³² Li Jonadab xnich'on Simea, ja' li sbanquil Davide, jech laj yal: —Ajvalil, mu me xanop ti icham xa scotol li anich'nabe. Ja' no'ox laj yich' milel li Amnone, yu'un li Absalone ja'o lic snop tsmil c'alal i'uts'intabat yixlal Tamar yu'un li Amnone.

³³ Ja' yu'un ajvalil, mu xach'un ti ichamic xa scotol li anich'nabtaque, yu'un ja' no'ox Amnón ti imilate —xut.

³⁴ C'alal ja'o chjatov batel li Absalone, li querem te oy ta toyol ti ja' yabtel tsq'uel lume la stoy sat; laj yil ti oy jtsob epal viniquetic te xyalic tal ta sbelal Horonaim ta ch'ut vitse.

³⁵ Li Jonadabe jech laj yalbe li ajvalile: —Le' xa xtal li anich'nabtaque; ja' jech ic'ot jech chac c'u cha'al laj calbote —xut.

³⁶ C'alal ja' to no'ox ilaj yo'nton ta lo'ile, ja'o ic'otic li xnich'nabtac ajvalile; tsots ic'ot yoc'ta sbaic. Jech li ajvalil xchi'uc j'abteletic yu'une ep laj yoc'ta sbaic ec.

^37-38 Li Absalone ijatov batel, te ic'ot ta stojol Talmai, ja' li ajvalil ta Gezur, xnich'on Amiude. Oxib jabil te la xchi'in. Li Davide scotol c'ac'al laj yoc'ta li xnich'on Amnone.

³⁹ C'alal i'ech' yu'un li at-o'ntone, toj chac xa sq'uelbe ya'ay sat noxtoc li Absalone.