2 Samuel 12 - Bible in Tzotzil de Chenalhó with Deuterocanon

Ital utatuc yu'un Natán li Davide

¹ Li Muc'ul Diose la stac batel j'alc'op Natán ta stojol li Davide. C'alal ic'ot li Natane, jech c'ot yalbe: —Oy chib viniquetic ta jun lum. Li june jc'ulej; li yane me'on.

² Li jc'uleje oy ep xchij xchi'uc xvacax.

³ Pero li me'one jcot no'ox yunin me' chij smanoj. Ja' la sts'ites stuc; jun sna xchi'uc xnich'nab ich'iic. Co'ol ive'ic, co'ol laj yuch'ic vo' ta svaso, xchi'uc co'ol ivayic xchi'uc; scuyoj jech chac c'u cha'al yunin tseb.

⁴ Oy ic'ot yulo' li jc'ulej vinique, pero mu sc'an smil xchij, o xvacax sventa tsmeltsanbe sve'el li yulo'e. Ja' bat stsacbe tal sme' chij li me'on vinique; ja' la smilbe sventa tsmac'lin o li yulo' ic'ot ta snae —xut.

⁵ Li Davide tsots i'ilin ta sventa li jc'ulej vinique, jech laj yalbe li Natane: —Jamal chacalbot ta stojol Muc'ul Dios, li boch'o jech la spase tsc'an milel.

⁶ Xchi'uc ac'o stojbe chanib velta jech chac c'u cha'al stojol li yunin chije yu'un mu'yuc lec li c'usi la spase; mu'yuc abul sba laj yil li xchi'ile —xi.

⁷ Li Natane jech laj yalbe li Davide: —Ja' vo'ot ac'oplal jech chac c'u cha'al li jc'ulej vinic laj cale. Ja' jech chayalbot li Muc'ul Dios yu'un Israele: ‘Vu'un la jt'ujot ta ajvalilal ta sventa li israeletique, xchi'uc la jcoltaot loq'uel ta sc'ob li Saule.

⁸ Xchi'uc laj cac'bot aventainbe li yabtel to'oxe, xchi'uc laj avic'be li yajniltaque, xchi'uc laj cac'bot aventain li Israel xchi'uc Judae. Me jutuc no'ox chavil li c'usi laj cac'bote, xu' chacac'bot to yan ti jechuque.

⁹ ¿C'u yu'un laj abajbun jmantal yu'un ja' laj apas li c'usi mu jc'ane? Yu'un laj amil li Urías heteo vinique; ja' laj atunes li amonetic sventa laj amil oe, xchi'uc laj avic'be noxtoc li yajnile.

¹⁰ Ta sventa ti muc xavich'un ta muq'ue, xchi'uc ti laj avic'be yajnil li Urías, ja' li heteo vinique, jech te tstailanic o batel milel li avalab anich'nabe.

¹¹ Vu'un li Muc'ul Diosune, jech jamal chcal: Ta xcac' ti chopol c'usi chc'ot ta pasel o ta atojolic achi'uc li avalab anich'nabe. Xchi'uc ta asat ta xcac' ta yan li avajniltaque. Ja' ta xcac'be junuc achi'il; ta xlic xchi'inan ta vayel ta c'ac'altic.

¹² Yu'un li vo'ote ta nac'al laj achi'inan. Yan li vu'une ta xcac' yich'ic chi'inel ta c'ac'altic yu'un ac'o yilic scotol li achi'iltac ta israelale’, xayutot li Diose —xut.

¹³ Li Davide jech laj yalbe li Natane: —Laj xa jta jmul ta stojol li Muc'ul Diose —xi. Itac'ov li Natane: —Li Muc'ul Diose muc vo'ocot chayac'bot atoj li amule; muc vo'cot chasmilot.

¹⁴ Pero ta sventa ti laj avac' ta lo'iltael yu'un yajcontratac li Muc'ul Diose ja' ta xcham li anich'on ti ja' to no'ox ivoq'ue —xut.

¹⁵ C'alal isut batel ta sna li Natane, li Muc'ul Diose laj yac' tsacatuc ta tsatsal chamel li xnich'on David, yol yajnil Uriase.

¹⁶ Li Davide la sc'opanbe ep Dios li xnich'one. Laj yicta ixim; sjunul ac'ubal te mochol ta banamil xchi'uc.

¹⁷ Li moletic te oyic ta sna Davide laj yalbeic ti ac'o xa licuc li Davide, pero muc sc'an xlic; mu'yuc bu la xchi'inic o ta ve'el noxtoc.

¹⁸ C'alal i'ech' vucub c'ac'ale, icham li olole. Li j'abteletic yu'un Davide ta xi'ic ta yalbel David ti icham xae. Jech la snopic: “Q'uelavil, c'alal cuxul to'ox li olole, mu xa ono'ox sc'an c'opanel cu'untic. ¿C'u to x'elan at-o'nton cha'ay me chcalbetic ti icham xae?”, xiic.

¹⁹ C'alal laj yil David ti oy c'usi chalbe sbaic li j'abteletic yu'une, te ivul ta sjol ti yu'un xa icham li xnich'one. Jech lic sjac': —¿Me icham xa li olole? —xut. —Icham xa —xiic.

²⁰ Ja' yu'un li Davide itots ta banamil. I'atin, laj yac' lec smuil poxil, xchi'uc la sjel sc'u'. I'och batel ta ch'ulna, bat yich' ta muc' li Muc'ul Diose. Ts'acal ibat ta sna; te la sc'an sve'el, jech ive'.

²¹ Jech ijac'bat yu'un li j'abteletic yu'une: —Ajvalil, ¿c'u yu'un ti vi x'elan chapase? C'alal cuxul to'ox li olole, laj avicta ixim; la'oc' yu'un. Pero c'alal icham xae, ja' to lalic, laj ac'an ave'el —xutic.

²² Itac'ov li Davide: —C'alal cuxul to'ox li olole, laj quicta ixim; laj coc'ta, yu'un la jnop ti oy yic'al chixc'uxubinbun to li Diose, ti ta to xac' cuxiuque.

²³ Pero tana icham o. Ja' yu'un mu xa smeloluc ti chquicta ixime, yu'un mu xu' cu'un chcac' cuxiuc yan velta. Li vu'une ta xbat ono'ox jchi'in, pero li stuque muc xa xcom xchi'inun —xi.

Ivoc' li Salomone

²⁴ Li Davide lic smuq'uibtasbe yo'nton li yajnile, ja' li Betsabee. Ibat sq'uel; te la xchi'in sbaic yan velta. Jech ivoc' yan yol; Salomón laj yac'be sbi li Davide. Li Muc'ul Diose lec la sc'an li olole,

²⁵ yu'un li Davide jech i'albat yu'un Muc'ul Dios ta sventa li j'alc'op Natane. Ja' yu'un li Davide ta sventa Muc'ul Dios jech laj yac'be sbi li olole. Jedidías sbi laj yac'be.

La stsal lum Rabá li Davide

²⁶ Li Joabe la spasic pleito xchi'uc li amonetic ta lum Rabae. C'alal yu'un xa'ox tspas canal li Joabe,

²⁷ la stac batel mantal ta stojol li Davide, jech laj yalbe batel: “Ta xa stsal cu'un li lum Rabae, xchi'uc laj xa quich'be ti bu liquem tal ya'alique.

²⁸ Ja' lec tsobo scotol li jchi'iltactic ti c'u to yepal te comenique. Ac'o tal yac'beic ec li lume yu'un jech muc vu'cun no'ox jtuc chcac'be, jech muc vu'ucun chiyich'bun jbi li lume”, xut.

²⁹ Ja' yu'un li Davide la stsob scotol li soldadoetique; la xchi'in batel, bat yac'beic li lum Rabae, jech i'och o ta sc'obic.

³⁰ La sloq'uesbeic scoronail sjol li ajvalile. Li coronae pasbil ta c'anal taq'uin, xchi'uc yich'oj tonetic lec c'upilic sba. Ja' oxlajuneb xcha'vinic (33) kilo yalal ta scotol. Ja' laj yac'beic ta sjol li Davide. Jech ec li Davide ep c'usitic laj yich' loq'uel te ta lum ti toyolic stojole.

³¹ Jech noxtoc li yajvaltac lum te to comenique laj yic' batel. Laj yac' abtejuc ta sierra, ta smajubil trigo pasbil ta taq'uin, xchi'uc ta eq'uel. Xchi'uc laj yac' abtejicuc ta horno sventa ladrillo. Ja' jech la spas ta scotol li lumetic yu'un amonetique. Jech te isut batel ta Jerusalén xchi'uc li yajsoldadotaque.