2 Samuel 11 - Bible in Tzotzil de Chenalhó with Deuterocanon

David xchi'uc Betsabé

¹ Ta yan jabil c'alal ja'o yorail chloq'uic ta pleito li ajvaliletique, li Davide la stac batel li Joabe xchi'uc j'abteletic yu'un, xchi'uc scotol li israeletique. Bat smilic li amonetique; la setuic lec li lum Rabae. Pero li Davide te icom ta Jerusalén.

² Ta jun mal c'ac'al ilic ta svayab li Davide; imuy xanovuc ta sjol sna. Te laj yil batel jun ants t'anal ta x'atin; toj c'upil sba laj yil.

³ Jech la stac ta jaq'uel boch'o li antse. Te laj ya'ay ti ja' Betsabé xnich'on Eliam, yajnil Urías heteo vinique.

⁴ Li Davide la stac batel boch'o chbat yiq'uic tal li antse, jech te la xchi'in ta vayel li Davide. Ts'acal isut batel ta sna. Li antse slecubtasoj xa'ox sba ta sventa li xchamel laj yile.

⁵ Li antse ina'p yol; te lic yalbe David ti oy xa xch'ute.

⁶ Li Davide la stacbe batel mantal li Joab ti ac'o stac tal li Urías heteo vinique. Jech la stac batel ta stojol David li Uriase.

⁷ C'alal ic'ot li Uriase, li Davide la sjac'be c'u x'elan li Joabe xchi'uc li soldadoetique, xchi'uc c'u x'elan chbat li pleitoe.

⁸ Ts'acal laj yalbe ti ac'o batuc ta snae, ti ac'o spoc yacane. C'alal iloc' batel ta sna ajvalil li Uriase, li Davide la stacbe batel lec sve'el sventa smoton.

⁹ Pero li Uriase te no'ox ivay ta sti' sna li ajvalile, te la xchi'in ta vayel li soldadoetic ti chchabiic li ajvalile; muc xbat ta sna.

¹⁰ C'alal laj ya'ay David ti muc xbat ta sna li Uriase, jech la sjac'be: —¿C'u yu'un muc xabat ta anae yu'un nat laxanov tal? —xut.

¹¹ Itac'ov li Uriase: —Q'uelavil, li xcaxail smantal Diose xchi'uc li soldado yu'un Israel xchi'uc Judae, vomol no'ox spasoj ta snaic ti bu chvayique. Jech ec li Joab xchi'uc j'abteletic avu'une ta osilaltic chvayic. ¿Me smelol xana' ti vu'un chibat ta jna chive', chcuch' lec vo', ta jchi'in ta vayel cajnile? Jamal chacalbot ta stojol Dios ti mu xu' chibat ta jnae —xut.

¹² Li Davide jech laj yalbe: —Xu' chacom to tana li'i; oc'om chajcoltaot xa batel —xut. Ja' yu'un te to icom jvoy ta Jerusalén li Uriase.

¹³ Li Davide laj yic' ta ve'el li Uriase te i'uch'bajic lec; te laj yac' yacubuc o. C'alal bat xa c'ac'ale, iloc' batel li Uriase, bat xchi'in ta vayel li soldado ti chchabiic li ajvalile; muc xyal batel ta sna noxtoc.

¹⁴ Li Davide ta yoc'omal la sts'ibabe batel carta li Joabe; ja' la stacbe batel li Uriase.

¹⁵ Jech laj yal batel ta carta: “Ja' xavac' ta ba'yucbe li Urías ti bu toj tsots pleitoe. Te xacomtsanic ta anil stuc; te ac'o milatuc, ac'o chamuc”, xut batel.

¹⁶ Jech c'alal la sjoyibtaic lum li Joabe, ja' te laj yac' batel Urías ti bu stuq'uil oyic li soldadoetic ti ech'em xaq'uique.

¹⁷ Ta jliquel iloq'uic tal li soldadoetic ti chchabiic li lume, tal yac'beic li Joabe. Te ichamic ta pleito jayibuc j'abteletic yu'un li Davide; te icham ec li Uriase.

¹⁸ Li Joabe laj yalbe batel David c'u x'elan ibat li pleito yu'unique.

¹⁹ Jech laj yalbe batel li boch'o la stac batele: “C'alal me laj avalbe scotol ajvalil c'u x'elan ibat li pleitoe,

²⁰ oy yic'al ch-ilin li ajvalile; xu' jech chasjac'bot: ‘¿C'u yu'un lanopajic batel ta lume? ¿Me yu'un mu xana'ic ti xu' oy c'usi chasjipboxuc yalel tal ta coralton

²¹ jech chac c'u cha'al la smil Abimelec li jun ants te ta Tebese? Ja' no'ox la sjipbe yalel tal jcot cho' te ta ba coralton, jech te icham o li Abimelec xnich'on Jerobaale. ¿C'u yu'un ti lanopajic batel ta coraltone?’, xu' xayutot. Ja'o jech xlic avalbe: ‘Te icham noxtoc li Uriase, ja' li j'abtel avu'une’, uto”, xut batel li Joabe.

²² Jech ibat li vinique; c'ot yalbe ajvalil scotol c'usi i'albat batel yu'un li Joabe. Pero li Davide tsots i'ilin ta stojol li Joabe, jech laj yalbe li j'almantale: —¿C'u yu'un ti lanopajic batel ta lume? ¿Me yu'un mu xana'ic ti xu' oy c'usi chasjipboxuc yalel tal ta coralton jech chac c'u cha'al la smil Abimelec li jun ants ta Tebese? Ja' no'ox la sjipbe yalel tal jcot cho' jech te icham o li Abimelec xnich'on Jerobaale. ¿C'u yu'un ti lanopajic batel ta coraltone? —xut.

²³ Jech lic yal li vinique: —Li soldadoetic ti loq'uic tal ta te'tic tal yac'buncutique lec stsinojbeic yipal tal. Pero la jnet'cutic sutel c'alal to ta ochebal yu'un lum.

²⁴ Pero ja'o laj yaq'uic tal flecha li j'ac'flechaetic te oyic ta coralton yu'un lume, jech te ichamic li j'abteletic avu'une. Te icham ec li Urías, ja' li heteo vinique —xut.

²⁵ Itac'ov li Davide: —Bat albo Joab ti mu me toj epuc xat yo'nton ta sventa le'e, yu'un ja' sventa pleito. Pero ac'beic o li lume, ja' to me ilaj scotol avu'unique. Li vo'ote bat tsatsubtasbo yo'ntonic —xut.

²⁶ C'alal laj ya'ay yajnil Urías ti icham xa li smalale, lic slap ic'al poc' sventa at-o'nton.

²⁷ C'alal i'ech' li at-o'nton yu'une, li Davide la stac ta iq'uel ta sna. Jech te laj yic' sbaic o; te ivoc' jcot yol. Pero li Muc'ul Diose mu lecuc laj yil ti jech la spas li Davide.