2 Samuel 10 - Bible in Tzotzil de Chenalhó with Deuterocanon

Li Davide la stsal siriaetic xchi'uc amonetic

¹ Ta yan c'ac'al icham li Nahas, ajvalil yu'un amonetique. Ja' i'och ta xq'uexol jun xnich'on, Hanún sbi.

² Li Davide tsc'an ti lec chil sbaic noxtoc xchi'uc li Hanún jech chac c'u cha'al lec laj yil sbaic xchi'uc li stote. Jech la stac batel svinictac yu'un bat spatbeic yo'nton ta sventa ti icham li stote. C'alal ic'otic ta yosilal amonetic li svinictac Davide,

³ li banquilaletic te ta Amone jech laj yalbeic li ajvalil yu'unique, ja' li Hanune: “¿Me chacuy ti yu'un yich'oj ta muc' atot li David ti la stac tal boch'o tspat avo'ntone? Le'e ja' no'ox la stac tal svinictac sventa tal sq'uelic, tal spamuc'taic lec yilic c'u x'elan li jlumaltique yu'un tsc'an chtal stsalutic”, xutic.

⁴ Ja' yu'un li Hanune laj yal mantal ti ac'o stsaquic li svinictac Davide. Ac'o sloc'beic j'o'lol yisimic, xchi'uc ac'o xch'i'beic yalel sc'u'ic c'alal to ta xchaquic. Ts'acal ac'o staquic batel.

⁵ C'alal laj ya'ay li Davide, la stac batel boch'o bat snupic ta be, yu'un abul sbaic ta q'uexlal. Laj yalbe batel ti te no'ox ac'o comicuc ta Jericoe. Ja' to me ich'i li yisimique, ja' to ac'o suticuc tal.

⁶ Li amonetique laj ya'yic ti iq'uexlaltasatic xa li Davide, jech lic stojic batel jtob ta mil (20,000) soldadoetic ta Bet-rehob xchi'uc ta Soba, xchi'uc la stojic batel ajvalil Maaca xchi'uc jmil (1,000) svinictac, xchi'uc lajcha'mil (12,000) viniquetic ta Is-tob.

⁷ Pero li Davide laj ya'ay ti jech tspasique, jech la stac batel li Joab xchi'uc scotol soldadoetique.

⁸ Iloq'uic tal ec li amonetique; te no'ox la xchapan sbaic lec ta ti'lum. Yan li soldadoetic ta Soba, ta Rehob, ta Is-tob xchi'uc li Maacae slecoj laj yac' sbaic batel ta jamalal jobeltic.

⁹ C'alal laj yil Joab ti ta xa xtal ac'batuc ta stuq'uilic xchi'uc ta spatique, la st'uj ta ora li yajsoldadotac ti lec xu' yu'unique; la xchapan sbaic yu'un chac'beic li siriaetique.

¹⁰ Li yan yajsoldadotaque ja' laj yac'be sventain li yits'in Abisaie yu'un ja' ac'o yac'beic ec li amonetique.

¹¹ Jech laj yalbe: “Me ja' ech'em xu' yu'unic jech chac c'u cha'aluncutic li siriaetique, xtal me acoltauncutic. Yan me ja' ech'em xu' yu'un li amonetic jech chac c'u cha'aloxuque, vu'uncutic chtal jcoltaotcutic.

¹² Tsotsan me, cac'tic persa spojel li jchi'iltactique xchi'uc li lumetic yu'un Diose. Ja' ac'o spas c'usi lec cha'ay tana li Muc'ul Diose”, xut.

¹³ Inopaj batel xchi'uc svinictac li Joabe yu'un chac'beic li siriaetique. Pero li siriaetique ijatovic batel.

¹⁴ C'alal laj yil amonetic ti ijatovic xa li siriaetique, ijatovic loq'uel ta stojol ec li Abisaie; i'ochic batel ta ora ta yut lum. Li Joabe te ipajic o ta scontrainel; isutic batel ta Jerusalén.

¹⁵ C'alal laj yilic siriaetic ti itsalatic yu'un israeletique, lic stsob sbaic yan velta noxtoc.

¹⁶ Li ajvalil Hadad-ezere la stac ta iq'uel li siriaetic te oyic ta jot uc'um Eufratese; te ibatic ta Helam. Ja' banquilal ic'ot yu'unic li Sobac, ja' li mero banquilal yu'un yajsoldadotac ajvalil Hadad-ezere.

¹⁷ C'alal laj ya'ay li Davide, lic stsob scotol li israeletique. Ijelovic batel ta jot uc'um Jordán; ibatic ta Helam. Li siriaetique lic xchapan sbaic lec sventa tspasic pleito xchi'uc li Davide, jech te lic yac'be sbaic.

¹⁸ Pero li siriaetique ijatovic batel ta anil yu'un li israeletique. Li Davide la smil cha'vinic ta mil (40,000) soldadoetic cajajtic ta ca' xchi'uc vucub ciento (700) soldadoetic cajajtic ta caretaetic. Jech noxtoc la smil comel li Sobaque, ja' li mero banquilal yu'un siria soldadoetique.

¹⁹ Li ajvaliletic ti oyic ta stojol li Hadad-ezere laj yilic ti itsalatic yu'un li israeletique, jech lic spas ta co'ol yo'ntonic xchi'uc li israeletique; te lic tunicuc yu'un. Li siriaetique muc xa sc'an xbat scoltaic li amonetique yu'un ta xi'ic xa.