2 Reyes 9 - Bible in Tzotzil de Chenalhó with Deuterocanon

Li Jehue laj yich' t'ujel ta ajvalilal te ta Israel

¹ Li j'alc'op Eliseoe laj yic' jun li j'alc'opetique, jech laj yalbe: —Chapano aba, batan ta lum Ramot te ta Galaad. Ich'o batel li aceite ch'olol ta yavile.

² C'alal me lac'ote, t'uno bu oy li Jehú, xnich'on Josafate, ja' li smomnich'on Nimsie. Me laj atae, x'och ac'opan. Voc'o loq'uel ta stojol li xchi'iltaque; ochanic ta junuc cuarto achi'uc.

³ Malbo aceite ta sjol, jech xavalbe: ‘Jech chayalbot li Muc'ul Diose: Vu'un la jt'ujot sventa cha'och ta ajvalilal li' ta Israel, xi li Muc'ul Diose’, uto. Jamo li ti'nae; loc'an tal ta ora. Mu me teuc no'ox xamala —xut.

⁴ Li querem j'alc'ope ibat ta lum Ramot te ta Galaad.

⁵ C'alal ic'ote, te chotolic c'ot sta li banquilal soldadoetique. Jech laj yalbe: —Banquilal soldado, oy c'usi ta jc'an chacalbot jbeluc —xut. Itac'ov li Jehue: —¿Boch'o junucal cu'uncutic? —xi. —Ja' vo'ote —xi li j'alc'ope.

⁶ Itots li Jehue; i'ochic ta jun na. Li j'alc'ope la smalbe aceite ta sjol, jech laj yalbe: —Jech chayalbot li Muc'ul Dios yu'un Israele: ‘Vu'un la jt'ujot sventa cha'och ta ajvalilal sventa jteclum Israele.

⁷ Vo'ot chamilbe scotol smomnich'nabtac li Acabe, ja' li ajvalil to'ox avu'une, yu'un ja' ta jpacbe ti la smalbe xch'ich'alic li j'alc'opetic cu'une, xchi'uc li yantic cajtuneltac ti laj yac' ta milel li Jezabele.

⁸ Li smomnich'nabtac Acab te ta Israele ta xcules scotol, me junuc querem mu'yuc cuxul ta xcom cu'un.

⁹ Ja' jech ta jpasbe jech chac c'u cha'al la jpasbe li Jeroboam xnich'on Nabate, xchi'uc li Baasa xnich'on Ahiase.

¹⁰ Li Jezabele ta xlaj ta ti'el ta ts'i' te ta yosilal lum Jezreel; mu'yuc boch'o ta smuc’, xi li Muc'ul Diose —xut. C'alal laj yal jech li j'alc'ope, la sjam li ti'nae; iloc' batel ta ora.

¹¹ Li Jehue ibat yo' bu tsobolic li xchi'iltaque, jech ijac'bat: —C'usi ay yalbot li jchuvaj-jol vinique —xiic. Itac'ov li Jehue: —Li vo'oxuque xavotquinic li vinique xchi'uc xavotquinic noxtoc c'u x'elan xc'opoj —xi.

¹² —Mu xamucbuncutic, albun ca'icutic —xiic. Itac'ov li Jehue: —Ja' jech laj yalbun chac li'i: ‘Jech yaloj li Muc'ul Diose: Vu'un la jt'ujot sventa cha'och ta ajvalilal li' ta Israele’, xi li Muc'ul Diose, xiyutun —xut.

¹³ Li jujunique ta ora la sq'ui sc'u'ic yo' bu teq'uel yacan li Jehú chotol ta toyol chotlebale. La sjupan xcachuic, i'avanic, jech laj yalic: “¡Ja' xa ajvalil li Jehue!”, xiic.

Li Jehue la smil Joram ajvalil ta Israel

¹⁴ Li Jehú, xnich'on Josafat, smomnich'on Nimsie, la snop c'u x'elan xu' tsmil li Jorame. C'alal ay tsacaticuc ta pleito yu'un Hazael ajvalil ta Siria li lum Ramot te ta Galaade, li Jorame ay scolta ta pleito.

¹⁵ Isut batel ta Jezreel li Jorame yu'un bat xpoxta ti butic ituch' batel ta pleito yu'un li siriaetique. Li Jehue jech laj yalbe li xchi'iltaque: “Me ta melel jech avo'ntonic ti vu'un chi'och ta ajvalilale, mu me boch'o xbat yal avu'unic ta Jezreel li c'usi ta jpastique”, xut.

¹⁶ Li Jehue icaji batel ta scareta sventa pleito; ibat ta Jezreel te yo' bu oy li Joram ti ip cha'ye. Li Ocozías, ajvalil ta Judae, te batem svu'lan ec li Jorame.

¹⁷ Li boch'o tsq'uel osil ta toyol q'uelub osil te ta Jezreele laj yil ti te xa chnopaj batel xchi'uc xchi'iltac li Jehue. I'avan, jech laj yal: —¡Oy jtsob viniquetic le' xtale! —xi. Li Jorame jech lic yal mantal: —Taquic batel junuc vinic; ac'o cajiuc batel ta ca'. Ac'o bat snup ta be; ac'o sjac'be ti me mu sa'c'opuc tal spasique —xi.

¹⁸ Jech ibat li vinique; ibat snup ta be li Jehue, jech c'ot yalbe: —Li ajvalile tsc'an tsjac' me muc sa'c'opuc tal apasic —xut. Itac'ov li Jehue: —Le'e mu aventauc. La' chi'inuncutic batel —xut. Li jq'uel-osil ta toyole jech laj yal: —Li j'almantal la jtactic batele ic'ot xa yo' bu oyic li viniquetique, pero mu xvinaj me oy tsut tal —xi.

¹⁹ Li ajvalile la stac batel yan j'almantal noxtoc; cajal batel ta ca' jech c'ot yal: —Li ajvalile tsc'an tsjac' me muc sa'c'opuc tal apasic —xut. Itac'ov li Jehue: —Le'e mu aventauc. La' chi'inuncutic batel —xut.

²⁰ Li jq'uel-osil ta toyole jech laj yal noxtoc: —Li j'almantale ic'ot xa yo' bu oyic li viniquetique, pero mu xvinaj me oy tsut tal noxtoc. Li boch'o sventainoj tal caretae ja' yilel li Jehú, smomnich'on Nimsie, xco'laj xchi'uc yich'oj chuvaj yilel ti c'u x'elan tstuq'uibtas tal li scareta jech chac c'u cha'al stalel ono'ox li Jehue —xi.

²¹ Ja' yu'un li ajvalil Jorame jech laj yal: —Meltsanic li jcaretae —xi. C'alal meltsanbil xa li scaretae, iloc' batel xchi'uc li Ocozías, ajvalil ta Judae. Cajajtic batel ta scareta jujunic, bat snup ta be li Jehue. Te la snupic ta yosil anima Nabot te ta Jezreel.

²² Li Jorame jech laj yalbe li Jehue: —¿Me mu'yuc chasa' c'op, Jehú? —xut. Itac'ov li Jehue: —¿C'u x'elan xu' mu xlic c'op ti staoj yav o puru mulivajel xchi'uc yan vinic tspas li ame' Jezabele, xchi'uc ti oy ep j'ac'chameletic yu'une? —xut.

²³ Li Jorame lic sjoybin li sca'e; ijatov sutel ta anil, jech laj yapta li Ocoziase: —¡Aq'uel ta c'abal, Ocozías! —xut.

²⁴ Li Jehue laj yac'be batel jmoj flecha li Jorame. Lec la stic'be batel ta spat, toj loq'uel ta yo'nton. Jech te icham o ta yut scareta.

²⁵ Li Jehue jech laj yalbe li Bidcor, ja' li banquilal soldado yu'une: —Checho loq'uel; jipo comel li' ta yosil Nabot ta Jezreele. Na'o me ti c'alal co'ol ta jtijbetic batel scareta li stote, ja' li Acabe, te ic'opoj li Muc'ul Diose. Laj yal ti c'u x'elan spacol chich'e, jech laj yal:

²⁶ ‘Jech chac c'u cha'al laj quilbe xch'ich'al volje li Nabot xchi'uc xnich'nabe; ja' jech chavich'be spacol ec te ta yosil li Nabote. Vu'un li Muc'ul Diosune ta xcal ti persa ta xc'ot ta pasele’, xi ono'ox. Ja' yu'un checho loq'uel; jipo comel li' ta yosil Nabot jech chac c'u cha'al yaloj ono'ox li Muc'ul Diose —xut.

Li Jehue la smil noxtoc li Ocoziase

²⁷ C'alal laj yil c'usi ic'ot ta pasel li Ocozías, ajvalil ta Judae, ijatov batel ta anil ta stuq'uil Bet-hagan. Pero li Jehue la snutsic batel, jech laj yal: —¡Milic noxtoc le'e! —xi. Te laj yac'beic ta sba scareta ta muyebaltic Gur ta nopol lum Ibleam. Pero ijatov to batel c'alal ta Meguido; te c'ot chamuc.

²⁸ Li j'abteletic yu'une la xcuchic batel ta careta te ta Jerusalén. Te la smuquic yo' bu mucajtic li smoltotac ta Lum yu'un Davide.

²⁹ Li Ocoziase ja'o i'och ta ajvalilal ta Judá ti c'alal xbuluchibal xa'ox jabil yochel ta ajvalilal li Joram, xnich'on Acabe.

Icham Jezabel

³⁰ Li Jehue ibat ta Jezreel. C'alal laj ya'ay li Jezabele, la sbon sti'ti' sat, xchi'uc laj yac' lec sbaj sjol; inach'i loq'uel ta ventana.

³¹ C'alal ic'ot Jehú ta ti'coraltone, jech laj yal li Jezabele: —¿C'usi tal apas, Zimri, vo'ot ti laj ono'ox amil li ajvalil avu'une? —xut.

³² Li Jehue la sq'uel muyel ta ventana, jech laj yal: —¿Boch'o li jchi'iltaque? —xi. Oy chib oxib j'abteletic inach'iic tal ta ventana ec.

³³ Li Jehue jech laj yalbe: —¡Jipic yalel tal! —xut. Jech la sjipic yalel. Toj loq'uel ic'ot xch'ich'al. Te bonajtic ic'ot ta c'alna xchi'uc ta ca'etic. Li Jehue te ech' yac'be xpech' ta teq'uel li ca'etique.

³⁴ Ts'acal bat ve'uc bat yuch' vo' li Jehue. C'alal ilaj yo'nton ta ve'ele, jech laj yal: —Bat muquic li bol ants le'e, yu'un ja' stseb jun ajvalil —xi.

³⁵ C'alal bat sq'uelic sventa chbat smuquique, ja' to laj yilic ti sbaquil sjol, ti yacantac, ti xpoch'omal sc'ob xa no'ox te oye.

³⁶ Ibat yalbeic ta ora li Jehue. Li Jehue jech laj yal: —Yu'un ja' ic'ot o ti jech ono'ox laj yal Dios ta sventa li j'alc'op Elías ta Tisbee, jech laj yal: “Te ta lum Jezreel ta xlaj ta ti'el ta ts'i' li Jezabele.

³⁷ Li sbec'tale tanpuc chbat li' ta lum Jezreel jech chac c'u cha'al c'a'ep. Jech mu'yuc boch'o xu' jech chal: ja' Jezabel li'i, mu'yuc boch'o xu' xi”, xi ono'ox li Muc'ul Diose —xi li Jehue.