2 Reyes 7 - Bible in Tzotzil de Chenalhó with Deuterocanon

¹ Li Eliseoe jech la stac'be: —A'yo ava'ay c'usi chal li Muc'ul Diose: ‘Oc'om jech ora chac c'u cha'al li'i xu' xa chamanic vucub litro aceite ta jsep no'ox saquil taq'uin te ta ti'lum Samaria, xchi'uc xu' chamanic oxib cuartiya cebada ta jsep no'ox saquil taq'uin’, xi li Muc'ul Diose —xut.

² Li yajcoltaubbail stuc ajvalile jech la stac'be li j'alc'ope: —Ac'o me tsjambe sventanail vinajel li Muc'ul Diose, mu xc'ot ta pasel li c'usi chavale —xi. Itac'ov li Eliseoe: —Te chavil ta xchibal asat atuc, pero mu'yuc chave' li vo'ote —xut.

³ Oy chanib jc'a'el chameletic te oyic ta ti'lum, jech laj yalbe sbaic: —¿C'u yu'un ti li' no'ox chotolutic ta jmalatic chijchame?

⁴ Me chij'ochutic batel ta lume, te chijchamutic, yu'un toj tsots vi'nal te. Pero me li' no'ox chotolutique, chijchamutic noxtoc. Ja' lec batic yo' bu spasoj scarpanaic li siriaetique. Me muc smilutique, lec; li' to cuxulutique. Yan me la smilutique, jechuc; ta ono'ox xijchamutic —xut sbaic.

⁵ Ta xa'ox x'ic'ub osil ti c'alal ibatic yo' bu oy scarpanaic li siriaetique. C'alal nopol xa'ox oyique, laj ya'yic ti mu junuc boch'o te oye.

⁶ Yu'un li Muc'ul Diose oy c'usi laj yac'be ya'yic li siriaetique. Laj ya'yic ti te chbat epal caretaetic sventa pleito, xchi'uc ca'etic, xchi'uc epal soldadoetique. Jech lic yalbe sbaic: “Ja' xa li ajvalil ta Israele, yu'un laj xa xchap sc'opic xchi'uc li ajvaliletic yu'un hetetique xchi'uc li ajvaliletic yu'un egiptoetique. Ja' xa chtal smilutic”, xut sbaic.

⁷ Ijatovic loq'uel ti c'alal yu'un xa'ox ch-ic'ub osile; te laj yictaic comel ta anil li scarpanaique, li sca'ique, xchi'uc li sburoique. Muc xa sventaicuc comel; ja' no'ox venta me icolic toe.

⁸ C'alal ic'otic ta sliqueb carpanaetic li jc'a'el chameletique, i'ochic ta jun carpana. Te ive'ic; laj yuch'ic vo'. Laj yich'ic loq'uel li c'anal taq'uin, li saquil taq'uin, xchi'uc li c'u'iletique; te bat snaq'uic comel ta te'tic. Isutic batel yan velta; i'ochic ta yan carpana. Oy c'usi laj yich'ic loq'uel; bat snaq'uic comel noxtoc.

⁹ Jech lic yalbe sbaic: —Mu'yuc lec li c'usi ta jpastique. Ti jechuque ja' yorail ta xquich'tic batel lec a'yej, pero tana ch'an no'ox xijchi. Yu'un me ja' to oc'om chbat caltique, xu' chalic ti oy jmultique. Ja' lec batic ta spasubmantal li ajvalile, bat calbetic ya'ay —xiic.

¹⁰ Jech ibatic; te c'ot yalbeic li jchabi ti'coraltone, jech laj yalbeic: —Te li'aycutic ta scarpanaic li siriaetique, pero mu junuc boch'o te oy; mu boch'o xbac'. Ja' xa no'ox te oy li sca'ique, li sburoique, xchi'uc li scarpanaique; mu'yuc bu stuc'ulanojic comel —xutic.

¹¹ Li boch'otic chchabiic ti'coraltone bat yalic ta ora ta spasubmantal li ajvalile.

¹² Li ajvalile ilic ta ora ta ac'ubaltic, jech laj yalbe li j'abteletic yu'une: —Chacalboxuc ava'yic c'usi tspasic li siriaetique, yu'un sna'ojic ti toj ip vi'nal chca'itique. Jech iloq'uic batel ta scarpanaic, bat snac' sbaic ta te'tic yu'un tsc'anic ti ac'o loc'cutic batel li' ta jlumaltic chbat jq'ueltique. Yu'un jech xu' te chistsacutic, jech chlic ochicuc tal li' ta jlumaltique —xut.

¹³ Oy jun xchi'il ta abtel li ajvalile jech laj yal: —Jtactic batel jayibuc viniquetic; ac'o scajlebinic batel li vo'cot ca'etic cuxulic toe. Jq'ueltiquic c'usi chc'ot ta pasel, me te chchamic, o me mo'oj. Co'ol sba, yu'un ta ono'ox xijchamutic jcotoltic me li' chijcomutique —xi.

¹⁴ Li ajvalile la stac batel jayibuc viniquetic ta cha'cot careta xchi'uc ca'etic. Ibatic ta scarpanaic li siriaetique. Jech laj yalbe batel: “Batanic, bat q'uelic c'u x'elan”, xut.

¹⁵ Jech ibatic, bat sa'ic li siriaetique; ic'otic c'alal to ta uc'um Jordán. Te laj yilic ti stelel be licajtic comel ta anil yu'unic sc'u' spoq'uic xchi'uc c'usitic yan oy yu'unic c'alal bat snac' sbaique. Li viniquetic tacbilic batel yu'un ajvalile isutic tal ta ora, vul xcholbeic ajvalil scotol li c'usitic laj yilique.

¹⁶ Jech ta ora iloq'uic batel scotol li israeletique, bat yich'ic tal scotol li c'usitic comen yu'unic ta scarpanaic siriaetique. Jech ta jsep no'ox saquil taq'uin la smanic vucub litro aceite, xchi'uc ta jsep no'ox saquil taq'uin la smanic o oxib cuartiya cebada jech chac c'u cha'al laj yal li Muc'ul Diose.

¹⁷ Li ajvalile laj yalbe mantal li yajcoltaubbail stuque yu'un ac'o xchabi lec li ti'coralton yu'un lume. Pero li israeletique te la snet'ic ta ti'coralton, jech te icham o jech chac c'u cha'al yaloj li yaj'alc'op Dios c'alal i'ay yich' c'opanel yu'un ajvalile.

¹⁸ Ja' jech ic'ot o jech chac c'u cha'al laj yalbe ajvalil li yaj'alc'op Diose: “Te ta ti'lum Samariae, ta jsep no'ox saquil taq'uin xu' chamanic o vucub litro aceite, xchi'uc ta jsep no'ox saquil taq'uin xu' chamanic o oxib cuartiya cebada”, xi ono'ox.

¹⁹ Pero li yajcoltaubbail ajvalile jech ono'ox la stac'be li j'alc'ope: “Ac'o me ta sjambe sventanail vinajel li Muc'ul Diose, mu xc'ot ta pasel li c'usi chavale”, xut ono'ox. Li Eliseoe jech laj yalbe: “Ta to xavil ta xchibal asat atuc, pero mu'yuc xa chave' li vo'ote”, xut.

²⁰ Ta melel jech ic'ot ta pasel, yu'un te la snet'ic ta ti'coralton li israeletique, jech te icham o.