2 Reyes 6 - Bible in Tzotzil de Chenalhó with Deuterocanon

La sloq'uesbe yeq'uel ta yut nab xchi'iltac li Eliseoe

¹ Ta yan c'ac'al li j'alc'opetique jech laj yalbeic li Eliseoe: —Li banamil li' bu nacalutique toj biq'uit, mu xij'ochutic.

² Coltauncutic batel, chibatcutic ta uc'um Jordán; ta xbat jsa'cutic jujuteluc jte'cutic yu'un chbat jpas yan jnacutic te —xutic. —Lec oy, batanic —xi li Eliseoe.

³ Oy jun jech laj yal: —Abulajan bat chi'inuncutic ec —xi. —Lec oy, xu' chbat jchi'inoxuc —xi li Eliseoe.

⁴ Jech co'ol la xchi'inic batel ta uc'um Jordán; te lic sts'etic li te'etique.

⁵ C'alal ja' to ilom jbej te' yu'un li june, ibalch'uj ochel ta uc'um li yeq'uele, jech te lic avanuc: —¡Ay, jchanubtasvanej! ¡Ch'amanbil no'ox cu'un li eq'uele! —xi.

⁶ —¿Bu stuq'uil ibaj yalel? —xi li j'alc'ope. Li yane laj yac' ta ilel ti bu stuq'uil ibaj yalele. Li Eliseoe te lic se'p jbej te'; la sjip ochel, jech icajtsaj muyel tal ta ba vo' li eq'uele.

⁷ Li Eliseoe jech laj yal: —Tsaco loq'uel —xi. Jech la stsac loq'uel li eq'uele.

Sc'oplal c'u x'elan icol ta milel Eliseo yu'un siriaetic

⁸ Li ajvalil ta Siriae stsacojic ta pleito li israeletique. C'alal la stsob sbaic xchi'uc xchi'iltac ta abtele, li ajvalile laj yalbe bu banamilal chbat spas li scarpanaique.

⁹ Ja' yu'un li Eliseoe jech la stacbe batel mantal li ajvalil ta Israele: “Mu me xajelov te yo' bu chbat spas scarpanaic li siriaetique”, xut.

¹⁰ Li ajvalil ta Israele la stac batel jayibuc israeletic sventa chbat sq'uelic bu tspas scarpanaic li siriaetic jech chac c'u cha'al i'albat yu'un li j'alc'ope. Ja' jech ivu' yu'un la xchabi sbaic jayibuc velta.

¹¹ Li ajvalil ta Siriae mu xa sna' c'usi tspas, jech lic yic'an li j'abteletic yu'une, jech laj yalbe: —¡Albicun boch'o junucal avu'unic co'ol yo'nton xchi'uc li ajvalil ta Israele! —xut.

¹² Oy jun itac'ov: —Mu'yuc. Ja' j'alc'op Eliseo ta Israel chac'be sna' ajvalil scotol li c'usitic chachapan ta mucul ta anae —xi.

¹³ Li ajvalil ta Siriae jech laj yal: —Bat t'unic ti bu oye, yu'un ta jtac batel jayibuc viniquetic ac'o bat xchuquic tal —xi. Ts'acal laj yalbeic ti te oy ta Dotane.

¹⁴ Jech ta ora la stac batel viniquetic, icajiic batel ta ca', xchi'uc caretaetic, xchi'uc yan epal soldadoetic. Ta ac'ubaltic ibatic; c'ot setuic li lum Dotane.

¹⁵ Ta sob yoc'omal c'alal ilic li smozo Eliseoe, iloc' ta amac'. Ja' to laj yil ti oy epal soldadoetic, oy ca'etic xchi'uc caretaetic te sjoyibtaojic li lume. Li mozoe bat yalbe li Eliseoe: —Jchanubtasvanej, ¿c'usi ta jpastic xana'? —xi.

¹⁶ Itac'ov li Eliseoe: —Mu xaxi', yu'un ja' epic li boch'otic li' jchi'uctique; ja' mu'yuc ep xchi'iltaquic li stuquique —xi.

¹⁷ Li Eliseoe lic sc'opan Dios, jech laj yal: “Muc'ul Dios, ta jc'anbot vocol ta atojol, jambo sat li jmozoe yu'un ac'o yil”, xut. Li Muc'ul Diose la sjambe sat li mozoe. Ja' to laj yil oy epal soldadoetic ta vits cajajtic ta ca', xchi'uc laj yil joyibtabil ta caretaetic li Eliseoe tsanal jech chac c'u cha'al c'oc'.

¹⁸ C'alal chbat xa'ox stsaquic Eliseo li siriaetique, li Eliseoe lic sc'opan li Muc'ul Diose: “Avocoluc pasbun ta ma'sat li cristianoetic le' xtalique”, xut. Li Muc'ul Diose la spas ta ma'sat jech chac c'u cha'al la sc'an li Eliseoe.

¹⁹ Li Eliseoe jech laj yalbe li soldadoetique: —Li'i mu ja'uc be, xchi'uc mu ja'uc li lum chat'unique. Batic, vu'un chaquic'oxuc batel yo' bu oy li vinic chat'unique —xut. Te laj yic' batel ta Samaria.

²⁰ C'alal ic'otic ta Samariae, li Eliseoe lic sc'opan Dios: “Muc'ul Dios, jambo li satique yu'un jech ac'o yilic osil”, xut. Jech ijam li satique; ja' to laj yilic ti te xa oyic ta yut lum Samariae.

²¹ C'alal laj yil li ajvalil ta Israele, jech la sjac'be li Eliseoe: —¿Me ta jmil? ¿Me ta xcac'be ya'ay? —xi.

²² Itac'ov li Eliseoe: —Mo'oj, mu xamil. Mu baq'uin ono'ox xamil li boch'otic chachuc tal c'alal chabat ta paspleito achi'uc li avespada, xchi'uc li aflechae. Ja' no'ox ac'bo sve'elic, ac'bo vo' yuch'ic; ts'acal taco sutel ta stojol li ajvalil yu'unique —xi.

²³ Jech te la spasic lec ve'lil; te ive'ic laj yuch'ic vo'. Ts'acal la stac sutel, jech isutic batel ta stojol li ajvalil yu'unique. Li siriaetique te to ipaj pleito yu'unic xchi'uc li israeletique.

Sc'oplal c'u x'elan icolic ta vi'nal te ta Samaria

²⁴ Ta yan c'ac'al li Ben-adad, ajvalil ta Siriae, la stsob yajsoldadotac noxtoc, tal setuic li lum Samariae.

²⁵ Te ta Samariae toj tsots vi'nal laj ya'yic ta scoj ti te joyibtabilic yu'un yajcontraique. Ic'ot ta chanvinic ta sep saquil taq'uin stojol li jbej sjol buroe. Li cuarto litro stso' palomae ic'ot ta vo'sep saquil taq'uin.

²⁶ Ta yan c'ac'al c'alal ja'o te chanov ta sba coralton li ajvalile, i'aptaat yu'un jun ants: —¡Ajvalil, coltaun! —xi.

²⁷ Itac'ov li ajvalile: —¿Me mu'yuc chascoltaot li Muc'ul Diose, me yu'un vu'un xa xu' cu'un ta jcoltaot ec? ¿Me yu'un vu'un xu' chacac'bot li trigo xchi'uc ya'lel ts'usube?

²⁸ ¿C'usi lec li avocole? —xut. Itac'ov li antse: —Li ants li'i jech laj yalbun: ‘Li avole ja' ta jti'tic tana; oc'om ja' ta jti'tic ec li cole’, xiyutun.

²⁹ Jech la jpancutic li cole; la jti'cutic. Ta yoc'omal jech laj calbe ec: ‘Ic'o me tal li avole yu'un ja' xa ta jti'tic ec’, xcut, pero li yole snac'oj xa'ox —xi li antse.

³⁰ C'alal laj ya'ay ajvalil c'usi laj yal li antse, la sli' sc'u', toj ilinel ic'ot. Ta sventa ti te luchul ta sba coraltone, laj yil scotol israeletic ti slapoj li c'u'il ti ch'ixlajan ta lapele.

³¹ Tsots i'avan li ajvalile: “¡Tsots ac'o yac'bun jtoj Dios ti me mu'yuc la jc'ocbe sjol tana li Eliseo, xnich'on Safate!”, xi.

³² Li Eliseoe te oy ta sna; te chotolic xchi'uc moletic. Li ajvalile la stac batel jun j'abtel yu'un. C'alal mu'yuc to'ox chc'ot li vinique, li Eliseoe jech laj yalbe li moletique: —A'yo ava'yic, li jmilvanej ajvalil le'e laj xa stac tal jun vinic yu'un tal sc'ocbun jol. Q'uelo me abaic tana. Me ital li vinique, maquic lec li ti'nae; tsots xanet'ic. Ts'acal chava'yic te ta spat li vinique ta xbac' tal yacan li yajvale —xut.

³³ Naca to te sbats'ilic lo'il c'alal ic'ot li vinique, jech laj yal: —Li vocol li'i ja' Muc'ul Dios la stacbutic tal, ¡c'u x'elan xu' ta jmalatic ti chiscoltautique! —xi.