2 Reyes 5 - Bible in Tzotzil de Chenalhó with Deuterocanon

Icol ta c'a'el chamel Naamán

¹ Oy jun vinic Naamán sbi; ja' banquilal soldado yu'un ajvalil ta Siria. Toj lec ich'bil ta muc', lec ch-ilat yu'un li ajvalile, yu'un ja' ta sventa ti icoltaatic yu'un Muc'ul Dios ta tsalvanej ta pleito li siriaetique. Pero li Naamane tsacbil ta c'a'el chamel.

² Oy jun israel tseb chucbil ibat ti c'alal la spasic pleito xchi'uc siriaetic li israeletique. Li tsebe ja' te yic'oj ta squiara li yajnil Naamane.

³ Li tsebe jech laj yalbe li yajvale: —Me chbat ta stojol j'alc'op te ta Samaria li amalale, xu' chcol ta sventa li xchamele —xut.

⁴ Li Naamane ibat ta stojol li ajvalile; laj yalbe ya'ay c'usi laj yal li israel tsebe.

⁵ Li ajvalil ta Siriae jech laj yal: —Lec oy, xu' chabat; vu'un ta jpas batel carta ta stojol li ajvalil ta Israele —xut. Li Naamane ibat; laj yich' batel lajuneb xcha'vinic ta mil (30,000) ta sep saquil taq'uin, vacmil (6,000) ta sep c'anal taq'uin, xchi'uc lajunlic ach' c'u'iletic.

⁶ Xchi'uc laj yich' batel noxtoc li carta sventa ajvalil ta Israele. Jech chal li cartae: “Me chavich' li carta li'i, jech chana' o ti vu'un la jtac tal ta atojol li Naamán, ja' li jun j'abtel cu'une, yu'un ta jc'an ti ac'o acoltabun ta sc'a'el chamele”, xi li cartae.

⁷ C'alal la sq'uel carta li ajvalil ta Israele, la sli' sc'u', jech laj yal: —¿Me yu'un vu'un Diosun? ¿Me yu'un vu'un xu' cu'un chcac' cuxiuc, chcac' chamuc jun cristiano ti vu'un chistacbicun tal ta jcolta ta sc'a'el chamel li vinique? ¡Q'uelavilic lec, ja' no'ox tsc'an ta sa' c'u x'elan xu' chiscontrainun! —xi.

⁸ C'alal laj ya'ay j'alc'op Eliseo ti la sli' sc'u' ta sventa carta li ajvalile, jech laj yalbe batel: “¿C'u yu'un ti laj ali' ac'u'e? Li' ac'o taluc ta jtojol li vinique, jech tsna' ti oy jun yaj'alc'op Muc'ul Dios li' ta Israele”, xut batel.

⁹ Li Naamane te ibat ta stojol Eliseo xchi'uc li ca'etic, li caretaetic yu'une; te ic'otic ta ti'na.

¹⁰ Pero li Eliseoe ja' no'ox la stac loq'uel jun j'almantal yu'un. Jech bat yalbe: “Batan, bat poco aba vucubuc velta ta uc'um Jordán, jech ta xcol li ac'a'el chamele”, xut.

¹¹ Li Naamane i'ilin sutel, jech laj yal: —Li vu'une la jnop ti chloc' tal sq'uelune, ti li' va'al ta jts'el ta sc'anbe vocol li Muc'ul Dios yu'une, xchi'uc la jnop ti chac' sc'ob ti bu ipe, jech xu' chcol jchamel ti caloje.

¹² ¿Ja' lec ti teuc no'ox la jpoc jba ta uc'um Abana xchi'uc Farfar ta Damascoe, yu'un ja' toj ven lec ta scotol li uc'umetic li' ta Israele? Ja' jech lec chicom ec ti teuc no'ox bat jpoc jbae —xi. Jech toj tsots ilinem isut batel.

¹³ Pero jech i'albat yu'un li smozotaque: —Cajval, ti ja'uc laj yalbot c'usi tsots ta pasel li j'alc'ope, bat apas ti jechuque. Pero ¿c'u yu'un muc chapas ti me ja' no'ox laj yalbot chbat apoc aba ta uc'um ti jech chcol li ac'a'el chamele? —xutic.

¹⁴ Ja' yu'un li Naamane ibat spoc sba vucub velta ta uc'um Jordán jech chac c'u cha'al i'albat yu'un li j'alc'ope. Li sbec'tale toj lec icom. Ja' jech icom jech chac c'u cha'al sbec'tal jun olol, jech icol o.

¹⁵ Li Naamane isut batel yan velta ta stojol Eliseo xchi'uc li xchi'iltaque. C'alal ic'otique, jech c'ot yal li Naamane: —¡Li' ta orae laj xa jna' ti ta melel mu'yuc yan Dios ta scotol banamile, ja' no'ox li' ta Israele! Ja' yu'un avocoluc tsacbun li amoton li' quich'ojbot tale —xut.

¹⁶ Itac'ov li Eliseoe: —Jamal chacalbot ta stojol Muc'ul Dios ti chitun yu'une, mu'yuc chquich' li jmotone —xi. Li Naamane mu xlaj yo'nton, pero li Eliseoe mu'yuc la stsac o.

¹⁷ Li Naamane jech laj yal: —Lec oy cha'e, ta me jcuch batel cha'cotuc ta jmula li lum li' ta yosilal Israele. Vu'une mu'yuc xa ta jchic'be, mu'yuc xa ta jmilbe smoton yan diosetic; ja' xa no'ox ta xcac'be smoton li Muc'ul Diose.

¹⁸ C'alal me chbat yich' ta muc' Rimón ta ch'ulna li ajvalil cu'une, c'alal ta jnit batele, persa te ta jquejan jba o ta ch'ulna ec. Me jech ic'ot ta pasele, ac'o spasbun perdón li Muc'ul Diose —xi.

¹⁹ Itac'ov li Eliseoe: —Lec oy, junuc avo'nton batan —xut. Li Naamane ibat. C'alal oy to o'loluc reva x'ech'ic batele,

²⁰ li Giezi, smozo j'alc'op Eliseoe, jech la snop: “Li cajvale mu'yuc laj yich' comel jutuc c'usitic ich'bil tal yu'un li Naamán, siria vinique. Chcal ta sventa Muc'ul Dios ti chbat jnuts ta anile; jq'ueltiquic c'usi jchopucal ta xquich'be tal”, xi la snop.

²¹ Jech ibat snuts ta be ta anil li Naamane. C'alal laj yil Naamán ti te xa xbat ta spate, iyal ta scareta, bat snup ta be, jech la sjac'be: —¿Me oy c'usi ic'ot ta pasel? —xut.

²² Itac'ov li Giezie: —Mu'yuc, li cajvale la stacun tal, yu'un ja' tal calbot ava'ay ti ja' to te ivulic chib querem j'alc'opetic liquemic tal ta vitsetic ta Efraín. ¿Me mu xa'abulaj xavac'bun batel oxmiluc ta sep saquil taq'uin xchi'uc cha'licuc ach' c'u'iletic? —xi.

²³ Itac'ov li Naamane: —Lec oy, ich'o batel vacmiluc ta sep li saquil taq'uine —xut. Te la stsatsal ac'be batel; jmoj la stic'beic batel ta cha'lic coxtal, xchi'uc li cha'lic c'u'ile. La spas ta mantal chib smozo ti ac'o bat yac'beic comel ta sna li Giezie.

²⁴ C'alal ic'otic yo' bu nac'alaltique, te no'ox laj yich' comel li Giezie; te la snac' ta yut sna. Laj yalbe ti xu' xa tsutic li chib mozoetique.

²⁵ Ts'acal ibat yo' bu oy li Eliseoe, ja' li yajvale. Li Eliseoe jech la sjac'be li smozoe: —¿Bu la'ay, Giezi? —xut. —Mu'yuc bu xi'ay —xi.

²⁶ Li Eliseoe jech laj yal: —¿Me chacuy ti muc xca'ay ta co'nton ti iyal ta scareta li vinic tal snupot ta bee? Li'i ma'uc yorail ta jtsactic taq'uin xchi'uc c'u'il; ma'uc yorail ta jmantic olivatic, ts'usubtic, chijetic, vacaxetic, jmozotic, xchi'uc jquiaratic.

²⁷ Ja' yu'un li sc'a'el chamel Naamane, vo'ot chacuch o comel achi'uc anich'nab, amomnich'nabtac —x'utat. C'alal iloc' batel ta stojol yajval li Giezie, tsacbil xa ta c'a'el chamel, saclo'an xa sbec'tal jech chac c'u cha'al tayo.