2 Reyes 4 - Bible in Tzotzil de Chenalhó with Deuterocanon

Ibol yaceite jun me'on ants

¹ Oy jun me'on ants, ja' yajnil jun j'alc'op, bat sc'an coltael ta stojol li Eliseoe jech laj yalbe: —Li jmalale chamen xa. Xana' ti lec ono'ox yich'oj ta muc' li Muc'ul Diose. Li' ta orae talem li boch'o jq'uexojbecutic staq'uine, yu'un tsc'an chic' batel ta smozo li chib jquereme —xut.

² Jech la sjac' li Eliseoe: —¿C'usi chac'an ta jpasbot? Albun c'usi oy avu'un ta ana —xut. Itac'ov li antse: —Me jutuc mu'yuc c'usi oy cu'un ta jna; c'ajumal no'ox jun jarro aceite oy cu'un —xi.

³ Li Eliseoe jech laj yalbe: —Batan ta ora, bat ch'amanbo sjarroic li boch'otic nopol nacaloxuc achi'uque. ¡Xocolic xach'aman li jarroetique, ja' ti c'u yepal xatae!

⁴ Maco abaic ta na achi'uc li chib aquereme; nojeso ta aceite li jarroetique. Ti bu chnojan avu'une, slecoj xavac'an —xut.

⁵ Ibat li antse; la smac sbaic ta na xchi'uc li yalabe. Lic snojes ta aceite li jarroetic ti ijelubtasbat batel yu'un yalabe.

⁶ C'alal inoj scotol li jarroetique, jech laj yalbe li jun squereme: —Ich'o xa tal yan jarroetic —xut. Itac'ov li quereme: —Mu'yuc xa yan jarro —xi. Jech ipaj o ta bolel li aceitee.

⁷ Ts'acal ibat yalbe ya'ay li j'alc'ope, jech i'albat: —Bat chono ta ora li aceitee; suteso li avile. Ti c'u yepal chcome, lec xacuxiic o achi'uc avalab —x'utat.

Li Eliseo la xcha'cuxesbe yol jun sunem ants

⁸ Ta yan c'ac'al te ijelov ta Sunem li Eliseoe. Oy jun ants te nacal ta Sunem. Lec ich'bil ta muc', laj yic' ochel ta ve'el ta persa li Eliseoe. C'alal te chjelov jujun velta li Eliseoe, te ono'ox i'ech' ve'uc.

⁹ Li antse jech laj yalbe li smalale: —A'yo ava'ay, li vinic li' ch-ech' sq'uelutic jujun veltae, ja' tuq'uil vinic; ja' yaj'alc'op Dios.

¹⁰ Ja' lec jpasbetic junuc scuarto ta sjol jnatic. Te chcac'tic junuc vaybal, junuc mexa, junuc xila, xchi'uc junuc candil. C'alal me ital sq'uelutic noxtoque, ja' te chcac'tic ochuc —xut.

¹¹ C'alal te ijelov yan veltae, ja' te ivay ti bu pasbil scuartoe.

¹² Jech laj yalbe li Giezie, ja' li smozoe: —Bat ic'o tal li Sunem antse —xut. Jech ibat yic' tal. C'alal ic'ot ta stojol Eliseo li antse, li Eliseoe jech laj yalbe li smozoe:

¹³ —Ta sventa ti toj lec yo'nton ta jtojoltic li antse, jac'bo me oy c'usi tsc'an ta jpasbetic. Jac'bo me tsc'an ta jc'opanbetic li ajvalile, o me ja' li banquilal jpasmantal yu'un soldadoetique, yu'un jech ac'o c'uxubinatuc —xut. C'alal laj ya'ay li antse, jech laj yal: —Mo'oj, jun no'ox co'nton li' nacalun ta stojol li jchi'iltaque —xi.

¹⁴ Li Eliseoe jech laj yal: —¿Pero c'usi xu' ta jpasbetic cha'e? —xi. Itac'ov li Giezie: —Pero li antse mu'yuc yalab; mol xa noxtoc li smalale —xi.

¹⁵ —Bat ic'o tal yan velta li antse —xi li Eliseoe. Li smozoe bat yic' tal, pero li antse te no'ox va'al ic'ot ta ti'na.

¹⁶ Li Eliseoe jech laj yalbe: —Jeche' c'alal jabil jech chac li'i, oy xa'ox avol —xut. Itac'ov li antse: —Mo'oj, tata, mu xavalbun jech. Mu xalabanun, vo'ot li yaj'alc'opot Muc'ul Diose —xi.

¹⁷ Pero li antse te lic xchi'in yol. C'alal iloc' jabile, ivoc' jun squerem. Ja' jech ora ivoc' jech chac c'u cha'al laj yal li Eliseoe.

¹⁸ Lec ich'i li quereme. C'alal ja'o batem ta tuch' trigo xchi'uc svinictac li stote, li quereme ibat yo' bu oy li stote.

¹⁹ Te x'avet c'otel ta stojol li stote: —¡Ay, ta xti'van jol! ¡Ta xti'van jol! —xi. Li stote jech laj yalbe jun smozo: —Ic'o batel yo' bu oy li sme'e —xut.

²⁰ Li mozoe laj yic' batel yo' bu oy li sme'e. Li me'ile la xchotan ta sjol yacan c'alal to ista o'lol c'ac'al, pero li quereme icham o.

²¹ Li antse laj yic' muyel ta scuarto j'alc'op li yole. Te la xmochan comel ta vaybal; la smac comel ta na.

²² La stac ta iq'uel ta ora li smalale, jech laj yalbe: —Ac'bun batel jchi'in junuc amozo xchi'uc li me' buroe yu'un chbat jq'uel li j'alc'ope. Chisut tal ta ora —xut.

²³ Jech ijac'bat yu'un li smalale: —¿C'u yu'un ti chbat aq'uel ta orae? yu'un mu to ja'uc yorail q'uin sventa ch-uninaj u, xchi'uc mu to ja'uc yorail ta jcux co'ntontic —x'utat. —Mu c'u xal avo'nton —xi li antse.

²⁴ Te lic yac' ta meltsanel batel li sme' sburoe, jech laj yalbe li smozoe: —Batic, jelovan batel. Mu me xijpaj ta be avu'un, ja' to me laj calbot ti xu' chijpaje —xut.

²⁵ Li antse ibat ta vits Carmelo yo' bu oy li j'alc'ope. Li Eliseoe laj yil batel ta nom li antse, jech laj yalbe li smozoe: —Q'uelavil, le' xtal li Sunem antse.

²⁶ Avocoluc batan, nupo ta be ta anil. Jac'bo me lec oyic xchi'uc li smalale xchi'uc li yole —xut. Jech ibat li mozoe. Li antse laj yal ti lec no'ox oyique.

²⁷ Pero c'alal ic'ot ta vits yo' bu oy li Eliseoe, c'ot smeybe yacan. Li Giezie ta xa'ox spajes, pero li Eliseoe jech laj yalbe: —Mu xapajes, yu'un toj ep ta xat yo'nton chquil. Li Muc'ul Diose mu'yuc to yac'ojbun jna' c'usi li svocole —xut.

²⁸ Li antse jech laj yal: —Tata, mu'yuc la jc'anbot ti ac'o oyuc cole. Laj ono'ox calbot ti mu me xalo'laune —xi.

²⁹ Li Eliseoe jech laj yalbe li Giezie: —Chapano aba. Batan ta sna li antse; ich'o batel li jnamte'e. Me oy boch'o laj anup ta bee, mu xac'opan comel. Me oy boch'o ch-ech' sc'opanote, mu xatac'be. Xc'ot ametsanbe ta sat querem li jnamte'e —xut.

³⁰ Li antse jech laj yalbe li Eliseoe: —Jamal chacalbot ta stojol Muc'ul Dios xchi'uc ta atojol ec, yu'un persa ta jc'an chabat atuc —xi. Ja' yu'un li Eliseoe ibat xchi'in li antse.

³¹ Li Giezie ba'yuc ijelov batel, c'ot smetsanbe ta sat anima querem li namte'ale, pero mu'yuc xvul xch'ulel. Jech isut batel, bat snup ta be li Eliseoe, jech laj yalbe: —Li quereme mu xa xcha'cuxi o —xut.

³² C'alal ic'ot ochuc ta yut na li Eliseoe, te mochol ta vaybal li anima quereme.

³³ Li Eliseoe la smac lec li ti'nae. Stuc no'ox te xchi'uc li quereme. Te lic sc'opan li Muc'ul Diose.

³⁴ La spatan sba ta sba yac'ol li animae. La snaban ye ta ye, xchi'uc la snaban sat ta sat, xchi'uc laj yac' sc'ob ta sc'ob li quereme. Jech te lic q'uixnajuc sbec'tal li quereme.

³⁵ Itots li Eliseoe; te no'ox xva'et ya'ay ta yut na. Ts'acal lic spatan sba yan velta ta sba li quereme jech chac c'u cha'al ono'ox la spase. Li quereme vucub velta ijat'isaj, jech te lic vic'uc sat.

³⁶ Li Eliseoe laj yic' li Giezie, jech laj yalbe: —Ic'o tal li Sunem antse —xut. Li Giezie bat yic' tal. C'alal ic'ot li antse, li Eliseoe jech laj yalbe: —Li' oy li avole —xut.

³⁷ Li antse inopaj batel. La squejan sba ta sts'el yacan li Eliseoe; ts'acal te laj yic' loq'uel li yole.

La smac'lin ep cristianoetic li Eliseoe

³⁸ C'alal isut batel ta Gilgal li Eliseoe, ja'o yorail tsots vi'nal. C'alal ja'o te xchi'uc j'alc'opetique, jech laj yalbe li smozoe: “Lacano ta c'oc' junuc muc'ta bin; pasbo sve'elic li j'alc'opetique”, xut.

³⁹ Oy boch'o iloc' batel, yu'un bat sa' tal vomol. Te la sta te'tical ch'um; oy sat jech chac c'u cha'al li ch'ume. La stul, la xchup tal ta sc'u'. C'alal ivul yo' bu oy li xchi'iltaque, la sesin ochel ta sbinal li ve'lile, pero muc sna' me lec, me chopol.

⁴⁰ C'alal imeltsaj sve'elic li j'alc'opetique, te la sjapuic ve'el. Pero te lic avanicuc, jech laj yalic: —¡J'alc'op, li ve'lil li'i ochem svenenoal! —xiic. Jech muc xa sve'ic o.

⁴¹ Li Eliseoe jech laj yal: —Ich'ic tal jutuc arina —xi. C'alal la stic' ochel ta sbinal ve'lil li arinae, jech laj yal: —¡Xu' xa chavac'beic sve'el li jchi'iltactique! —xi. Jech te lic ve'icuc scotolic; mu'yuc xa chopol li ve'lile.

⁴² Ts'acal te ic'ot jun vinic liquem ta Baal-salisa, yich'oj batel ta stojol Eliseo jtob (20) pan pasbil ta sba sat cebada, xchi'uc yaxal bec' trigo stic'oj batel ta smoral. Li Eliseoe jech laj yalbe li smozoe: —Ac'bo sve'ic li jchi'iltactique —xut.

⁴³ Itac'ov li smozoe: —Pero mu xloc' o, yu'un oy vo'vinic (100) ta scotolic —xi. Itac'ov li Eliseoe: —Ac'bo sve'ic li jchi'iltactique, yu'un jech yaloj li Muc'ul Diose: ‘Lec xave'ic o, xchi'uc chcom to scomelal’, xi yaloj —xut.

⁴⁴ Li mozoe laj yac'be sve'ic li xchi'iltaquique. Icom to scomelal jech chac c'u cha'al laj yal li Muc'ul Diose.