2 Reyes 3 - Bible in Tzotzil de Chenalhó with Deuterocanon

Lic ochuc ta ajvalilal ta Israel li Jorame

¹ Ta xvaxaclajunebal (18) jabil yochel ta ajvalilal ta Judá li Josafate, ja'o i'och ta ajvalilal ta Israel te ta Samaria li Joram, xnich'on Acabe. Lajchab (12) jabil i'abtej.

² Chopol c'usitic la spas ta stojol li Muc'ul Diose. Ja' no'ox ti mu xco'laj xchi'uc jech chac c'u cha'al la spas li stot sme'e, yu'un la sloq'ues li sloc'obal Baal ti spasoj stote.

³ Pero ts'acal ja' la xchan jech chac c'u cha'al mulil la spas li Jeroboam, xnich'on Nabate, jech laj yac'be sa' smulic ta stojol Dios li israeletique.

Laj yal Eliseo ti tsalbil chc'ot yu'unic li Moabe

⁴ Li ajvalil Mesa ta Moabe ja' yabtel tsts'un chij. Xchi'uc te la stoj spatan ta stojol li ajvalil ta Israele. Ja' laj yac' vo'vinic ta mil (100,000) ch'ium chijetic xchi'uc vo'vinic ta mil (100,000) muc'tic chij xchi'uc stsotsil.

⁵ Pero c'alal icham li Acabe, li ajvalil ta Moabe lic scontrain li ajvalil ta Israele.

⁶ Ja' yu'un li ajvalil Jorame iloc' batel ta Samaria; la sq'uel me lec chapal scotol li yajsoldadotaque.

⁷ Jech noxtoc la stac batel mantal ta stojol li ajvalil ta Judá, ja' li Josafate, jech laj yalbe batel: “Li ajvalil ta Moabe tsc'an chtal stsacun ta pleito. ¿Me xac'an xtal coltaun?”, xut. Li ajvalil ta Judae jech laj yal: “Lec oy, xu' chbat jchi'inot. Li jvinictaque ja' avinictac ec; li ca'etic cu'uncutique ja' aca' ec.

⁸ ¿Bu jotucal be chijbat un?”, xi. “Te chijbat ta sbelal xocol banamil ta Edom”, xi li Jorame.

⁹ Jech iloq'uic batel li ajvalil ta Israel, li ajvalil ta Judá, xchi'uc li ajvalil ta Edome. Ta sventa ti vucub c'ac'al tsc'an chjoybijic tal ta xocol banamile, jech ilaj ya'alic li yajsoldadoique xchi'uc li ca'etic yic'anojic batele.

¹⁰ Li ajvalil ta Israele jech laj yal: —¡Ay! Li Muc'ul Diose laj van yic'utic tal sventa chijyac'utic ta sc'ob moabetic —xi.

¹¹ Li Josafate jech laj yal: —¿Me mu'yuc junuc yaj'alc'op Muc'ul Dios li'i, yu'un ac'o jac'betic c'usi tsc'an li Muc'ul Diose? —xi. Oy jun xchi'il ta abtel li ajvalil ta Israele jech laj yal: —Li' oy li Eliseo, xnich'on Safat, ti la xchi'in to'ox ta abtel li Eliase —xi.

¹² —Ja' ac'o yalbutic c'usi tsc'an li Muc'ul Diose —xi li Josafate. Li ajvalil ta Israel, xchi'uc li Josafat, xchi'uc li ajvalil ta Edome ta ora ibat sc'opanic li Eliseoe.

¹³ Li Eliseoe jech laj yalbe li ajvalil ta Israele: —¿C'usi jventa li vu'une? Ja' bat jac'beic li j'alc'opetic yu'un atot ame'e —xut. Li ajvalil ta Israele mu xlaj yo'nton: —Mo'oj, yu'un li Muc'ul Diose laj yic'uncutic tal sventa chiyac'uncutic ta sc'ob moabetic vu'uncutic li oxib ajvaliluncutique —xi.

¹⁴ Li Eliseoe jech laj yal: —Jamal chacalbot ta stojol Muc'ul Dios ti tspas ta mantal scotol te ta vinajele, ti manchuc li' oy li Josafat, ajvalil ta Judae, mu jventaucot. Mu jc'an jq'uel asat ti jechuque.

¹⁵ ¡Lec oy, bat iq'uic tal junuc jtij-arpa! —xut. C'alal lic yich' tijel li arpae, li Eliseoe ital ventainatuc yu'un li Muc'ul Diose,

¹⁶ jech laj yal: —Jech chal li Muc'ul Diose: ‘Joq'uic ep vo'etic ta stenlejaltic.

¹⁷ Ac'o me mu'yuc ic' chava'yic, me mu'yuc chac' vo' chavilic, pero li stenlejaltic li'i ta xnoj ta vo' scotol. Jech chataic vo' avuch'ic xchi'uc li ats'unub avovolique.

¹⁸ Le'e ja' jun biq'uit sq'uelubil chcac' ta ilel ti xu' cu'une. Jech noxtoc ta xcac' ta ac'obic li moabetique;

¹⁹ ta xajinesic scotol li lumetic ti lec setbilic ta coraltone xchi'uc li lumetic toj ven lequique. Chats'etic noxtoc scotol li jsatinom te'etic sts'unojique, xchi'uc chavulesic scotol li nio'etique. Chanojesic ta ton scotol li lequil banamiletic yu'unique’, xi li Muc'ul Diose —xi li Eliseoe.

²⁰ Ta sob yoc'omal jech ora chac c'u cha'al yorail chaq'uic matanale, iloc' tal vo' te ta Edom; inoj ta vo' scotol li banamil tee.

²¹ C'alal laj ya'yic moabetic ti chbat tsacaticuc ta pleito yu'un li ajvaliletique, la stsob sba scotolic c'alal ta ch'ium queremetic ti xu' yu'unic pleitoe. Te bat stsob sbaic ta sts'aquil yosilalic.

²² C'alal iliquic ta yoc'omale, xleblajet ta xojobal c'ac'al li vo'e. Li moabetique laj yilic ta nom ti xco'laj xchi'uc ch'ich' li vo'e.

²³ Jech laj yalic: “Le'e ja' ch'ich', yu'un te no'ox lic scontrain sba stuquic li ajvaliletique yu'un te lic smilan sba stuquic. ¡Moabetic, bat quich'betic tal scotol li c'usitic oy yu'unique!”, xut sbaic.

²⁴ Pero c'alal i'ochic yo' bu spasoj scarpanaic li israeletique, te no'ox imilatic jayibuc yu'un li israeletique. Li yantique ijatovic, pero la snutsic batel ta anil; te la smilic comel.

²⁵ Bat sjinesbeic comel scotol li lumetic yu'unique, xchi'uc la snojesic comel ta ton scotol li yosilic ti lequic ta bojele. La soquesic comel noxtoc li nio'etique, xchi'uc la sts'etic comel scotol li jsatinom te'etic sts'unojique. Ja' xa no'ox mu'yuc la sjinesic comel li lum Kir-haresete. Li j'ac'jimich'etic yu'unique la setuic li lume; la stsalic o comel.

²⁶ C'alal laj yil ajvalil ta Moab ti tsalbil icome, lic stsob vucub ciento (700) xchi'iltac ti lec sna'ic yaq'uel espadae yu'un chbat yac'beic noxtoc li ajvalil ta Edome, pero muc xu' yu'unic.

²⁷ Jech te lic stsac li sba xnich'on ti ja' sc'oplal ch-och ta xq'uexole. La smil ta sventa smoton sdios; la xchic' te ta sba li coraltone. Ven tsots to i'ilinic ta stojol li israeletique, jech la sloq'uesic batel li scarpanaique; isutic batel ta yosilalic.