2 Reyes 25 - Bible in Tzotzil de Chenalhó with Deuterocanon

¹ Ta slajunebal c'ac'al yochel slajunebal u ta sbalunebal jabil yochel ta ajvalilal li Sedequiase, ibat ta Jerusalén xchi'uc yajsoldadotac li Nabucodonosore; c'ot setuic li lum Jerusalene. La spasic toyol q'uelub osiletic ta spat xocon li Jerusalene.

² Te setuojic o c'alal to iloc' buluchib (11) jabil yochel ta ajvalilal li Sedequiase.

³ Ta sbalunebal c'ac'al yochel xchanibal u, itsacatic ta vi'nal li cristianoetic te ta lume; solel mu'yuc xa c'usi tsve'ic o.

⁴ Jech te la svomic loq'uel li coraltone. Ja' te ijatovic loq'uel ta ac'ubaltic li ajvalile xchi'uc scotol li soldadoetique. Te setel icomic li caldea soldadoetique. Te iloq'uic batel ta sjap ti bu cha'c'ol coralton ta sbelal ts'unubaltic yu'un ajvalile. Te ibatic ta sbelal Arabá.

⁵ Pero li soldadoetic yu'un caldeaetique la snutsic batel li ajvalile; te c'ot stsaquic ta stenlejaltic ta Jericó. Scotol li yajsoldadotaque la spuc sbaic batel. Stuc xa la scomtsanic li ajvalil yu'unique.

⁶ La xchuquic, laj yiq'uic batel ta stojol ajvalil Nabucodonosor te ta Ribla. Li Nabucodonosore laj yal mantal ti ac'o stoj smule.

⁷ Laj yal mantal noxtoc ti te ta sat Sedequías ac'o yich' c'ocbel sjol li xnich'nabe. Ts'acal lic sloq'uesbeic sbec' sat ec li Sedequiase. Chucul ta cadena laj yiq'uic batel ta Babilonia.

Laj yich' chiq'uel ch'ulna ta Jerusalén

⁸ Ta svucubal c'ac'al yochel li yo'bal u ta sbalunlajunebal jabil yochel ta ajvalilal ta Babilonia li Nabucodonosore, ja'o ibat ta Jerusalén li Nabuzaradane, ja' li banquilal soldado yu'une, xchi'uc ja' xchi'il ta abtel.

⁹ Li xch'ulna Muc'ul Diose, xchi'uc li spasubmantal ajvalile, xchi'uc li sna banquilaletic yu'une, xchi'uc scotol li naetic ta Jerusalene la xchic' comel scotol.

¹⁰ Scotol li caldea soldadoetic ti te xchi'inojic batel li banquilal soldadoe la sjinesic comel li coralton yu'un lum Jerusalene.

¹¹ Li israeletic ti te to icomic ta Jerusalene xchi'uc li boch'otic laj xa yac' sbaic ta sc'ob ajvalil ta Babiloniae, li Nabuzaradane la xchuc batel ta Babilonia scotol.

¹² Ja' xa no'ox la scomtsan li me'onetique, yu'un ja' ac'o yaq'uintaic li ts'usubtique, xchi'uc ac'o abtejicuc te ta banamil.

¹³ Li caldeaetique la slilinic li yoyal ch'ulna pasbil ta broncee, xchi'uc li snaclebtaque, xchi'uc li yavil vo' pasbil ta broncee. Laj yich'ic batel ta Babilonia scotol li c'usitic pasbil ta broncee.

¹⁴ Jech noxtoc laj yich'ic batel li yavil tane, li palaetique, li xtuch'ubil xmechail candiletique, li muc'tic cucharaetique, xchi'uc scotol li c'usitic pasbilic ta bronce ti te chtun ta ch'ulnae.

¹⁵ Jech noxtoc laj yich' batel li c'usitic pasbil ta c'anal taq'uin xchi'uc ta saquil taq'uine, ja' li yavil pome xchi'uc li muc'tic tazaetique.

¹⁶ Li chib oyetic xchi'uc snaclebtaque, xchi'uc li yavil vo' la spas Salomón ta sventa ch'ulnae mu xlaj ta bisel c'u yalal ta scotol.

¹⁷ Li jujubej oye ech'em ta vaxquib metro snatil, xchi'uc oy jcoj svolvolil sjol ech'em ta chib metro snatiquil, pasbilic ta bronce noxtoc. Li svolvolil sjol oye macbilic ta chajchajtaq'uin, xchi'uc pasbil sloc'obal caranatoetic te. Ja' co'ol jech pasbil ta xchibal li oye.

Chucbil ibatic li judaetique

¹⁸ Li banquilal soldado Nabuzaradane la xchuc batel noxtoc li banquilal pale Seraiase xchi'uc li Sofoniase, ja' li xchibal banquilal palee xchi'uc li oxib viniquetic ti toj tsots yabtelic ta ch'ulnae.

¹⁹ Xchi'uc la xchuc batel noxtoc li boch'o sventainoj soldadoetic sventa pleito te ta lume xchi'uc vo'ob viniquetic ti ja' tscoltaic ta snopel c'usi tsc'an tspas li ajvalile. Xchi'uc la xchuc batel li jts'ibajom ti tstsacbe ta vun sbi li boch'otic ch-ochic ta soldadoile xchi'uc yan oxvinic (60) banquilaletic te oyic ta lum.

^20-21 Li Nabuzaradane laj yic'an batel; te c'ot yac' ta stojol li ajvalil ta Babilonia te ta Ribla ta yosilal Hamate. Li ajvalil ta Babiloniae laj yal mantal ti ac'o yich'ic milele. Ja' jech chucbil iloq'uic o batel ta yosilalic li judaetique.

Li boch'otic te to icomic ta Judae ijatovic batel ta Egipto

²² Li Nabucodonosor, ajvalil ta Babiloniae, ja' la stic' comel ta ajvalilal ta Judá li Gedalías, xnich'on Ahicam, smomnich'on Safane, yu'un ja' ac'o sventain li boch'otic te to la scomtsane.

²³ C'alal laj ya'yic scotol banquilal soldadoetic ta Judá xchi'uc svinictaquic ti laj xa stic' ta ajvalil Gedalías li muc'ta ajvalil ta Babiloniae, te ibatic ta Mizpa xchi'uc svinictaquic, bat sc'opanic li Gedaliase. Li boch'otic ibatique ja' Ismael, xnich'on Netanías, Johanán, xnich'on Carea, Seraías, xnich'on Tanhumet ta Netofa, xchi'uc Jaazanías, xnich'on jun vinic liquem ta Maaca te xchi'inojic batel li svinictaquique.

²⁴ Li Gedaliase jech laj yalbe ta jamal ta stojol Dios li boch'otic te ic'otique xchi'uc li svinictaquique: “Mu xavat avo'ntonic ti smozoinojoxuc li caldeaetique. Te naclanic o ti bu nacaloxuque; tunanic yu'un li ajvalil ta Babiloniae, jech lec chabatic”, xut.

²⁵ Pero ta svucubal u ibat ta stojol Gedalías li Ismael, xnich'on Netanías, smomnich'on Elisamae, yu'un ja' bats'i sts'unubalic li ajvaliletic ijelovic ta Judae; te xchi'inoj batel lajuneb xchi'iltac. Te la smilic comel li Gedaliase, xchi'uc li judaetic, li caldeaetic ti te xchi'inoj ta abtel ta Mizpae.

²⁶ Li judaetique xchi'uc li banquilal soldadoetique ijatovic batel ta Egipto c'alal ta biq'uit ta muc', ta scoj ixi'ic me chtal pacbaticuc yu'un li caldeaetique.

Li Joaquine iloq'uesat ta chuquel, xchi'uc i'ich'at ta muc' te ta Babilonia

²⁷ Ta vuclajuneb xcha'vinic (37) jabil xchuquel batel li Joaquín, ajvalil to'ox ta Judae, ja'o i'och ta ajvalilal ta Babilonia li Evil-merodaque; ja' ta vucub xcha'vinic (27) c'ac'al yochel xlajchabal (12) u. C'alal ja' to no'ox i'och ta ajvalilale, la sloq'ues ta chuquel li Joaquine.

²⁸ Lec laj yil sbaic xchi'uc; ja' la stic' ta banquilal yu'un li yantic ajvaliletic te ta Babiloniae.

²⁹ La sjelbe noxtoc li sc'u' slapoj c'alal tiq'uil ta chuquele, xchi'uc scotol c'ac'al la xchi'in ta ve'el ti jayib c'ac'al cuxule.

³⁰ Jech scotol c'ac'al te mac'linbil o yu'un ajvalil ta Babilonia ti jayib c'ac'al cuxule.