2 Reyes 24 - Bible in Tzotzil de Chenalhó with Deuterocanon

¹ C'alal ja'o ochem ta ajvalilal li Joaquime, li Nabucodonosor, ajvalil ta Babiloniae, ital stsal li Judae. Jech ventainbil icom oxib jabil li Joaquime. Ts'acal itsatsub yo'nton, jech lic scontrain ec li Nabucodonosore.

² Li Muc'ul Diose la stac tal jtsob caldeaetic, jtsob siriaetic, jtsob moabetic xchi'uc jtsob amonetic ta stojol li Joaquime yu'un tscontrainic li Judae. Yu'un ac'o yulesic o ta j'ech'el jech chac c'u cha'al yaloj ono'ox Muc'ul Dios ta sventa li yaj'alc'optaque.

³ Ti jech ic'ot ta pasel ta stojol li Judae, ja' ta smantal li Muc'ul Diose, yu'un jech ac'o c'otuc ta pasel ti tsloq'ues ta stojol ta scoj smul li Manasese,

⁴ xchi'uc ta scoj ti la smalbe xch'ich'al li boch'otic mu'yuc smulique. Yu'un inoj ta ch'ich' yu'un li Jerusalene, ja' yu'un li Muc'ul Diose mu xa sc'an spasbe o perdón yu'un smul.

⁵ Li yantic sc'oplal Joaquime xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Judae.

⁶ C'alal icham li Joaquime, ja' i'och ta xq'uexol jun xnich'on, Joaquín sbi.

⁷ Li ajvalil ta Egiptoe muc xa xloc' o ta yosilal, yu'un li ajvalil ta Babiloniae laj yich'be scotol ti bu to'ox c'alal sventainoje. Ja' te xlic ta yuc'umal Egipto c'alal to ta uc'um Éufrates.

Li Joaquine ichucatic batel ta Babilonia xchi'uc j'abteletic yu'un

⁸ C'alal i'och ta ajvalilal li Joaquine, yich'oj vaxaclajuneb (18) jabil. Oxib no'ox u i'abtej ta Jerusalén. Li sme'e Nehusta sbi; ja' xnich'on Elnatán te ta Jerusalén.

⁹ Pero li Joaquine toj chopol c'usitic la spas ta stojol Muc'ul Dios jech chac c'u cha'al la spas li stote.

¹⁰ Ja'o yorail ital li svinictac ajvalil Nabucodonosor ta Babiloniae; c'ot setuic li Jerusalene.

¹¹ Li Nabucodonosore ibat ta Jerusalén ec ti c'alal ja'o te setelic li svinictaque.

¹² Li Joaquín, ajvalil ta Judae, iloc' batel xchi'uc sme', xchi'uc xchi'iltac ta abtel, xchi'uc banquilaletic yu'un, xchi'uc jpasmantaletic yu'un, bat yac' sbaic ta sc'ob li ajvalil Nabucodonosore. Jech te ichucatic batel. Ja' ta xvaxquibal jabil yochel ta ajvalilal Nabucodonosor ti jech ic'ot ta pasele.

¹³ Laj yich' batel scotol li taq'uinetic te ta xch'ulna Muc'ul Diose xchi'uc te ta spasubmantal ajvalile. Biq'uitic la slilin comel scotol li c'usitic chtun te ta ch'ulna ti pasbil ta c'anal taq'uin yu'un li ajvalil Salomone. Ja' ic'ot o ti jech ono'ox yaloj li Muc'ul Diose.

¹⁴ La xchucan batel scotol li jnaclumetic ta Jerusalene, xchi'uc li banquilaletique, xchi'uc scotol li soldadoetic ti lec xu' yu'unique, xchi'uc li boch'otic oy lec sbijilic ta sloc'tael c'usiuc no'oxe, xchi'uc li jtentaq'uinetique, ja' to ti c'alal its'aqui lajunmil (10,000) li xchucbil viniquique. Me junuc mu'yuc xa boch'o icom; ja' xa no'ox icom li me'onetique.

¹⁵ Jech noxtoc la xchuc batel ta Babilonia li Joaquine, xchi'uc li sme'e, xchi'uc li yajniltaque, xchi'uc li j'abteletic yu'une, xchi'uc li boch'otic ich'bilic ta muc' te ta lume. Chucbil iloq'uic batel ta Jerusalén c'alal to ta Babilonia.

¹⁶ Ti c'u yepal chucbil ibatic yu'un li ajvalil ta Babiloniae ja' vucmil (7,000) ta scotol li viniquetic ti lec xa xu' yu'unic pleitoe. Ja' jmil (1,000) ta scotol li boch'o oy lec sbijilic ta sloc'tael c'usiuc no'oxe, xchi'uc li jtentaq'uinetique. Ja' slecoj o li boch'otic lec tsots yo'ntonique xchi'uc li boch'otic lec xchanojic paspleitoe.

¹⁷ Li ajvalil ta Babiloniae ja' la stic'be ta ajvalilal sjunich'on li Joaquine, Matanías sbi. Ja' la xq'uexolin li sjuntote. Li ajvalile la sjelbe sbi li Mataniase; Sedequías laj yac'be sbi.

Lic stsac yabtel ta ajvalilal li Sedequiase

¹⁸ C'alal i'och ta ajvalilal li Sedequiase, yich'oj jun xcha'vinic (21) jabil. Buluchib (11) jabil i'abtej ta Jerusalén. Li sme'e Hamutal sbi; ja' stseb Jeremías te ta Libna.

¹⁹ Li Sedequiase toj chopol c'usi la spas ta stojol Muc'ul Dios jech chac c'u cha'al la spas li Joaquime.

²⁰ Ja' yu'un li Muc'ul Diose j'ech'el i'ilin o ta stojol li Jerusalén xchi'uc Judae; la sjip o loq'uel ta stojol. Pero li Sedequiase ts'acal lic scontrain li ajvalil ta Babiloniae.