2 Reyes 22 - Bible in Tzotzil de Chenalhó with Deuterocanon

I'och ta ajvalilal li Josiase

¹ C'alal i'och ta ajvalilal li Josiase, vaxquib jabil to yich'oj. Buluchib xcha'vinic (31) jabil i'abtej ta Jerusalén. Li sme'e Jedida sbi; ja' stseb Adaía te liquem ta lum Boscat.

² Toj lec c'usitic la spas ta stojol li Muc'ul Diose. Ja' co'ol la spas jech chac c'u cha'al la spas li smoltot David ta vo'onee. Me jutuc mu'yuc la stam yan be stuc.

La stabeic svunal li mantaletique

³ Ta xvaxaclajunebal jabil yochel ta ajvalilal li Josiase, la stac batel ta xch'ulna Muc'ul Dios li jts'ibajom Safane, ja' li xnich'on Azalía, smomnich'on Mesulame, jech laj yalbe:

⁴ —Batan ta stojol li banquilal pale Hilquiase. Albo ti ac'o xa stsob li taq'uin laj yaq'uic jchi'iltactic te ta xch'ulna Muc'ul Diose, ja' ti te xa stsobojic li jchabi ti'naetique.

⁵ Ac'o yac'be ta sc'ob li boch'otic sventainojic li abtel sventa chich' cha'meltsanel lec li ch'ulnae, yu'un jech ja' xa ac'o stojic ec li boch'otic ch-abtejique,

⁶ ja' li carpinteroetique, li jchanubtasvanejetic sventa abtele, li alvaniletique, xchi'uc ac'o yich' manel o li te'etique xchi'uc li anbil tonetique.

⁷ Albo noxtoc ti mu me sjac'beic bu chlajanan yu'unic li taq'uine, yu'un le'e lec tuc' x'abtejic —xut.

⁸ Li banquilal pale Hilquiase jech laj yalbe li jts'ibajom Safane: “La jtabe svunal li mantaletic li' ta ch'ulna yu'un Muc'ul Diose”, xut. Laj yac'be, jech te lic yapta li Safane.

⁹ Li Safane ibat ta stojol li ajvalile, jech c'ot yalbe: —Li j'abteletic avu'une laj xa stsobic li taq'uin te oy ta ch'ulnae; laj xa yac'beic ta sc'ob li boch'otic sventainojic abtel sventa chich' cha'meltsanel li ch'ulna yu'un Muc'ul Diose —xut.

¹⁰ Te lic yalbe noxtoc ti i'ac'bat jun vun yu'un li banquilal pale Hilciase. Te lic yaptabe ya'ay li ajvalile.

¹¹ C'alal laj ya'ay c'usi chal svunal mantaletic li ajvalile, la sli' sc'u'.

¹² Ta ora laj yalbe mantal li pale Hilquiase, li Ahicam, xnich'on Safane, li Acbor, xnich'on Micaiase, li Safán boch'o tstsac ta vun c'usitic chc'ot ta pasele, xchi'uc li Asaías, xchi'il ta abtel ajvalile, jech laj yalbe:

¹³ —Bat jac'beic Muc'ul Dios c'u x'elan yo'nton cu'un xchi'uc li jchi'iltactic li'i, xchi'uc ta scotol li Judae, yu'un li c'usi chal vun li' laj yich' taele oy yic'al tsots ilinem ta jtojoltic li Muc'ul Diose. Yu'un li jtotic jme'tic ta vo'onee muc xich'ic ta muc' c'usi chal li vun li'i; muc ja'uc la spasic li c'usitic li' ts'ibabile —xut.

¹⁴ Jech ibat li pale Hilquiase, xchi'uc li Ahicam, Acbor, Safán, xchi'uc Asaiase. Ibatic ta stojol j'alc'op ants, Hulda sbi, ja' li yajnil Salum, xnich'on Ticva, smomnich'on Harhas, ja' li boch'o oy ta sventa xchabiel c'u'iletic ta ch'ulnae. Li Huldae te nacal ta xcha'voc'al Jerusalén; te c'ot sc'opanic,

¹⁵ jech itac'ov: —Li Muc'ul Dios, ja' li Dios yu'un Israele, jech chal: ‘Jech xavalbe ya'ay li boch'o tacbilic tal sventa oy c'usi chisjac'bicune:

¹⁶ Jech chcal, vu'un li Muc'ul Diosune: Ta xcac'be tsots svocol li banamil li'i xchi'uc li boch'otic te nacajtique. Ja' ta xcac'be scotol li stojol mulil ts'ibabil ta vun ti laj yich' aptael ta stojol ajvalil ta Judae.

¹⁷ Yu'un la scomtsanicun; ja' bat xchiq'uic pom ta stojol li yantic diosetique. La sa'bicun sc'ac'al co'nton ta sventa li c'usitic la spasique. Ja' yu'un itsan sc'ac'al co'nton yu'un li banamil li'i; me jutuc mu xa xtu'p o.

¹⁸ Jech xc'ot avalbeic li ajvalil ta Judá ti stacojoxuc tal ta sjaq'uel li' ta jtojole: Li Muc'ul Dios yu'un Israele jech chal noxtoc: Ta sventa ti laj avich' ta muc' c'usi chal li vune,

¹⁹ xchi'uc ti ic'ot ta avo'ntone, ti laj abic'tajes aba ta jtojol c'alal laj ava'ay c'usi caloj ta sventa li banamil li'i xchi'uc ta sventa li yajvaltaque, ja' ti laj cal ta to xyavnaijique, ti tstoj smulique, jech laj ali' ac'u', laj avoc'ta aba ta jtojol. Jech ec li vu'une laj ca'ibot li ac'ope. Vu'un li Muc'ul Diosune, jech chacalbot:

²⁰ Ta xcac' ti jun avo'nton chachame, xchi'uc ti te chbat achi'in li amoltot ayame' ta vo'onee. Mu'yuc xa chavil li tsots vocol ta xcac'be li banamil li'i’, xi li Diose —xi li j'alc'op Huldae. C'alal laj ya'yique, isutic batel, bat yalbeic li ajvalile.