2 Reyes 19 - Bible in Tzotzil de Chenalhó with Deuterocanon

Icol loq'uel ta sc'ob ajvalil Senaquerib li Judae

¹ C'alal laj ya'ay li ajvalil Ezequiase, la sli' sc'u', yu'un toj vocol laj ya'ay. Lic slap c'u'il sventa at-o'nton ti ch'ixlajan ta lapele; te ibat ta xch'ulna Muc'ul Dios.

² La stac batel li Eliaquim, ja' li jchabina yu'une, xchi'uc li Sebna, ja' li boch'o tstsac ta vun c'usitic chc'ot ta pasele, xchi'uc ti jayib paleetique, yu'un ac'o bat sc'opanic li j'alc'op Isaías, xnich'on Amoze. La slapic batel li c'u'il sventa at-o'nton ti ch'ixlajan ta lapele.

³ Jech laj yalbe batel: “Jech laj yal tal li ajvalile: ‘Li' ta orae ja' sc'ac'alil tsots at-o'nton chca'icutic, ep jvocolcutic xchi'uc q'uexlaltasel. Ja' xa jechuncutic jech chac c'u cha'al jun ants c'alal yu'un xa chcux ti mu xa xu' yu'un cha'ye.

⁴ Li Muc'ul Dios avu'une oy yic'al laj ya'ay c'usitic laj yal li Rabsaces tacbil tal yu'un ajvalil ta Asiria tal xchopolc'opta li cuxul Diose. Oyuc c'uxi yac'be stoj smul ca'tic ta sventa li c'usi laj yalique, yu'un laj ya'ay stuc li Diose. C'opano Dios ta sventa ti c'u to quepaltic li' oyutique, xi laj yal tal li ajvalile’, utic c'otel”, xut.

⁵ Jech ibatic ta stojol j'alc'op Isaías li j'abteletic yu'un ajvalil Ezequiase.

⁶ Li Isaiase jech laj yal: “Jech xc'ot avalbeic li ajvalile: ‘Jech chal li Muc'ul Diose: Mu xaxi' ta sventa c'u x'elan icholpolc'opoj ta jtojol li j'abteletic yu'un ajvalil ta Asiriae.

⁷ Vu'un jtuc oy c'usi ta jtacbe batel ta stojolic, oy c'usi ta xa'ay ta yo'ntonic, jech ta sutic batel ta slumalic, te chc'ot cac' lajicuc ta milel, xi li Diose’, utic c'otel”, x'utatic yu'un li Isaiase.

⁸ Li Rabsacese laj ya'ay ti batem ta lum Laquis li ajvalil ta Asiriae. Jech iloc' batel ta Jerusalén. Te xa tspas pleito ta lum Libna c'ot sta.

⁹ Li ajvalil ta Asiriae laj ya'ay a'yej ti chtal tsacatuc ta pleito yu'un li Tirhaca, ajvalil ta Etiopiae. Jech la stac batel j'almantaletic noxtoc; laj yac'be batel carta ta stojol li ajvalil Ezequías ta Judae.

¹⁰ Jech laj yalbe batel: “Mu xavac' aba ta lo'lael yu'un li Dios avu'un ti ja' apatoj avo'nton yu'une xchi'uc ti jech chayalbote: ‘Li Jerusalene mu'yuc ono'ox ta x'och ta sc'ob Asiria’, ti xie.

¹¹ Yu'un ava'yoj ono'ox c'usi la spas li ajvaliletic ta Asiria c'alal la stsalic li yantic lumetique. ¿Me yu'un vo'ot xa xu' avu'un chacolta aba ec?

¹² Li yantic lumetic ti laj yulesic li jmoltotcutic ta vo'onee ja' li lum Gozán, Harán, Resef, xchi'uc Bet-edén ti te nacalic ta Telasar banamile, muc xcoltaat yu'un li diosetic yu'unique.

¹³ ¿Bu oyic noxtoc li ajvaliletic ta Hamat, ta Arfad, ta Sefarvaim, ta Hena, xchi'uc ta Ivae?”, xut batel.

¹⁴ Li Ezequiase laj yich' li carta ti c'ot ac'batuc yu'un li j'abteletique, la sq'uel. Ts'acal ibat ta ch'ulna, te c'ot xlich'an ta stojol Muc'ul Dios li cartae.

¹⁵ Te lic sc'opan Dios: “Muc'ul Dios, Dios yu'un Israel, vo'ot ti te nacalot ta o'lol yu'un li chib sloc'obal querubinetique., Vo'ot no'ox atuc Diosot yu'un scotol li ajvaliletic li' ta banamile. Vo'ot laj apas li vinajel xchi'uc banamile.

¹⁶ Muc'ul Dios, tuc'ulanbun li ca'yeje; a'ibun li jc'ope. Vic'o asat; q'ueluncutic me. A'yo ava'ay c'usi chal li Senaquerib ti li' la stac tal ta sventa chaxchopolc'optaot, vo'ot li cuxul Diosote.

¹⁷ Muc'ul Dios, ja' melel ti la stsalic yantic lumetic c'alal ta scotol yosilalic li ajvaliletic ta Asiriae.

¹⁸ Xchi'uc ja' melel ti la xchic'beic ta c'oc' scotol li diosetic yu'unique. Pero yu'un mu ja'uc ono'ox dios. Pasbil no'ox ta sc'ob cristianoetic; pasbil no'ox ta te', o me ta ton, jech ivu' yu'un laj yulesic.

¹⁹ Ja' yu'un Muc'ul Dios, vo'ot li Diosot cu'uncutique, avocoluc coltauncutic ta atsatsal, yu'un jech ac'o sna'ic scotol ajvaliletic ta banamil ti vo'ot no'ox atuc Muc'ul Diosote”, xi la sc'opan Dios.

²⁰ Li Isaiase la stacbe batel mantal ta stojol li Ezequiase, jech laj yalbe: “Jech chal li Muc'ul Dios yu'un Israele: ‘Li c'usi laj ac'anbun ta sventa li Senaquerib, ajvalil ta Asiriae, laj xa ca'ay’, xi li Muc'ul Diose”, xut batel.

²¹ Li Muc'ul Diose jech laj yal ta sventa li Senaquerib, ja' li ajvalil ta Asiriae: “Senaquerib, li lum Sione, ja' jech chac c'u cha'al jun tseb, stse'in no'ox ta atojol. Li Jerusalene ta sjimulan sjol, yu'un ta slabanot ti c'alal chaloc' batele.

²² ¿Boch'o ti lachopolc'opta ti yan xavich' xaval ta stojole? ¿Boch'o ti tsots la'avan ta stojol, ti colajtic xa asat laj aq'uel batele? ¡Ja' li Ch'ul Dios yu'un Israele!

²³ Ta sventa j'almantaletic avu'un laj achopolc'opta li Muc'ul Diose. Jech laj aval: ‘Ta sventa epal caretaetic cu'un limuy batel ta jolvitsetic, ti toj ven toyolic te ta Libanoe. La jts'et li natiquil ch'ut te'etic, li lequil c'uc'tojetic yu'unique. Lic'ot c'alal ta mero jolvitsetic yu'unic xchi'uc ta toyolaltic ti xco'laj xchi'uc ts'unubaltique.

²⁴ Vu'un la joc' pozoetic, xchi'uc laj cuch'be ya'lel li yan banamile. Ta teq'uel no'ox itaquij cu'un li uc'umetic ta Egiptoe’, xachi.

²⁵ ¿Me mu xana' ti vo'one ono'ox jnopoj jech chapase, ti poco' vo'one ono'ox chapanbil cu'une? Li' ta orae pasbil xa cu'un. Ja' yu'un vo'ot xa tal ajines li lumetic ti setbilic lec ta coraltone; jinil-vuc'ul xa icom o avu'un.

²⁶ Li yajvaltaque lajem xa stsatsalic; ochem xa xi'el ta yo'ntonic, q'uexlal xa sba cha'yic. Ja' xa jech c'otemic jech chac c'u cha'al ts'i'laletic, yaxal jobeltic, xchi'uc jech chac c'u cha'al ts'i'laletic chch'i ta ba na, ti tsac-taquij no'ox ta anile.

²⁷ Vu'une jna'oj li c'usi anopoje; jna'oj li c'usi chac'an chapase; jna' ti cha'ilin ta jtojole.

²⁸ Ta sventa ti chavilintaune xchi'uc ti toj ep laj atoy ave ta jtojole, ta jtic'bot xotxot taq'uinal ani'; ta xcac'bot sfrenoal ave; ta xcac' sutan batel ta be yo' ono'ox latale”, xi li Diose.

²⁹ Li Isaiase jech laj yalbe li Ezequiase: “Li'i ja' senyail li c'usi ta xc'ot ta pasele: Li trigo ta xch'i stuc li chib jabil chtale, vo'oxuc chave'ic. Yan ta yoxibal jabile xu' xa chats'unubajic, chatsobic; xu' xa chats'unic ts'usubetic xchi'uc chalo'beic sat.

³⁰ Li scolepal ta milel te ta Judae ja' jech chc'otic jech chac c'u cha'al ts'i'lal: ta xyal yisimic ta banamil xchi'uc ta xlic satinicuc.

³¹ Yu'un oy to cuxul icomic jutuc te ta Jerusalén. Oy to boch'o icolic comel te ta vits Sión. Ja' xa ta sventa xc'uxul yo'nton li Muc'ul Dios ti tspas ta mantal scotole.

³² “Li Muc'ul Diose ja' jech chal ta sventa li ajvalil ta Asiriae: ‘Mu'yuc ch-och ta Jerusalén. Mu'yuc ta st'iles batel jmojuc flecha; mu'yuc chbat spas pleito xchi'uc smacubbail, xchi'uc mu'yuc ta spas muyel stec'um ta spat xocon.

³³ Ti bu beal itale, ja' no'ox te ta sut batel. Mu'yuc ta x'och li' ta lume. Jech chcal, vu'un li Muc'ul Diosune.

³⁴ Li lum li'i vu'un ta jchabi; vu'un ta jcolta, ta sventa ti lec jc'anoj li cajtunel Davide, xchi'uc ta sventa ti jech ta jc'an jtuque’, xi li Diose”, xi li Isaiase.

³⁵ Te no'ox ta yac'ubalil ital yaj'almantal Muc'ul Dios; la smil vo'ob slajunvinic ta mil (185,000) asiriaetic te yo' bu spasoj scarpanaique. C'alal isacub ta yoc'omale, ep xa animaetic.

³⁶ Li Senaquerib, ajvalil ta Asiriae, itots batel ta scarpana; isut batel ta Nínive.

³⁷ Ta yan c'ac'al c'alal ja'o te chich' ta muc' sdios Nisroc ta ch'ulnae, te imilat yu'un chib xnich'nab, Adramelec, Sarezer sbiic. C'alal la smil li stotique, ijatovic batel ta yosilal Ararat. Ja' i'och ta xq'uexol yan xnich'on, Esarhadón sbi.