2 Reyes 18 - Bible in Tzotzil de Chenalhó with Deuterocanon

I'och ta ajvalilal ta Judá li Ezequiase

¹ Yoxibal jabil xa'ox yochel ta ajvalilal ta Israel li Oseas xnich'on Elae, ja'o i'och ta ajvalilal ta Judá li Ezequías, xnich'on Acaze.

² C'alal i'och ta ajvalilale, yich'oj xa'ox vo'ob xcha'vinic (25) jabil. Baluneb xcha'vinic (29) jabil i'abtej ta Jerusalén. Li sme'e Abi sbi; ja' stseb Zacarías.

³ Li Ezequiase toj lec c'usitic la spas ta stojol Muc'ul Dios jech chac c'u cha'al la spas li smuc'ta moltot Davide.

⁴ La sjines scotol li toyol c'opojebaletique, xchi'uc la slilin scotol li tonetic scuyoj ta sdiosique, xchi'uc la sts'etan li sloc'obaltac Asera bu pajajtic yu'unique, xchi'uc la slilin li sloc'obal chon pasbil ta bronce yu'un Moisés ta vo'onee, yu'un li israeletique te la xchiq'uic pom ta stojol. Neustán laj yac'beic sbi li sloc'obal chone.

⁵ Li Ezequiase ja' no'ox la spat o yo'nton ta stojol Muc'ul Dios, ja' li Dios yu'un Israele. Ta scotol li ajvaliletic ta Judá ti jelovenic xa yu'une xchi'uc ti ts'acal to ijelovique mu'yuc yan jech tuc' yabtel jech chac c'u cha'al li stuque.

⁶ Jun yo'nton o ta stojol li Muc'ul Diose; me jutuc mu'yuc la svoc' sba ta stojol. Ja' la xch'un scotol li mantaletic ti i'albat yu'un Muc'ul Dios li Moisese.

⁷ Te chi'inbil o yu'un li Muc'ul Diose; buyuc no'ox ibat, lec ibat yu'un scotol. Li Ezequiase tsots laj yac' sba ta stojol li ajvalil ta Asiriae; muc sc'an ventainel yu'un.

⁸ Xchi'uc la stsal noxtoc li filistaetic xlic ta Gaza c'alal to ta sts'aquiltac yosilalique, xchi'uc xlic ta toyol q'uelub osiletic yu'unic c'alal to ta muc'tic lumetic ti lec setbilic ta tsatsal coraltone.

Tsalbil icom o li lum Samariae

⁹ Xchanibal jabil xa'ox yochel ta ajvalilal li Ezequiase xchi'uc svucubal jabil xa'ox yochel ta ajvalilal ta Israel li Oseas, xnich'on Elae, ja'o bat setuic lum Samaria li Salmanasar, ajvalil ta Asiriae.

¹⁰ C'alal iloc' oxib jabile, i'och ta sc'obic o. Ja' ta svaquibal jabil xa'ox yochel ta ajvalilal li Ezequiase, ja' sbalunebal jabil yochel ta ajvalilal ta Israel li Oseas c'alal i'och ta sc'obic li Samariae.

¹¹ Li ajvalil ta Asiriae la xchuc batel ta Asiria li israeletique; te c'ot yac' ta lum Halah ta Habor te ta nopol uc'um Gozán xchi'uc ta slumal medoetic.

¹² Jech ic'ot ta pasel ta scoj ti muc xich'beic ta muc' c'usi laj yal li Muc'ul Dios yu'unique, xchi'uc la sbajbeic li c'usi chapanbil yu'une, xchi'uc muc xch'unic li c'usitic albilic yu'un Moisese, ja' li yajtunel Muc'ul Diose. Muc ja'uc laj yich'ic ta muc'.

Bat stsal lumetic ta Judá li ajvalil Senaqueribe

¹³ C'alal xchanlajunebal jabil xa'ox yochel ta ajvalilal li Ezequiase, li Senaquerib, ajvalil ta Asiriae, bat stsac ta pleito scotol li lumetic te ta Judá ti lec setbilic ta tsatsal coraltone, jech la sventain o.

¹⁴ Ja' yu'un li ajvalil Ezequiase la stacbe batel mantal li ajvalil ta Asiria te ta Laquise, jech laj yalbe batel: “Oy jmul ta atojol. Loc'an batel li' ta cosilal; xu' ta jtojbot jpatan ti c'u yepal chac'ane”, xut batel. Ja' yu'un li ajvalil ta Asiriae lic sc'anbe spatan li Ezequiase, ja' li ajvalil ta Judae. Ja' balunmil xchi'uc baluneb ciento (9,900) kilo saquil taq'uin, xchi'uc baluneb ciento xchi'uc lajuneb yo'vinic (990) kilo c'anal taq'uin la sc'an.

¹⁵ Li Ezequiase laj yac'be scotol li saquil taq'uin la sta te ta ch'ulna yu'un Muc'ul Diose xchi'uc ta spasubmantal stuque.

¹⁶ La sloq'ues scotol li c'anal taq'uin xpixanojbe o li sti'tac ch'ulna yu'un Muc'ul Diose; laj yac'be batel li ajvalil ta Asiriae.

¹⁷ Ts'acal to li ajvalil ta Asiriae la stac batel li boch'otic tsots yabtelique, ja' Tartán, Rabsaris, xchi'uc Rabsaces sbiic. La xchi'inic batel epal soldadoetic, yu'un tal scontrainic li Jerusalene; te iliquic tal ta Laquis. C'alal ic'ot ta Jerusalene, te c'ot spas scarpanaic ta nopol sbevo'al li stanqueal vo' ta cajal te ta sbelal banamil Chuc'unajebal sbie.

¹⁸ Te lic staquic ta iq'uel li ajvalile. Te iloq'uic batel li Eliaquim, xnich'on Hilquías, ja' li jchabina yu'un ajvalile, xchi'uc li Sebna ti ja' tstsac ta vun c'usitic chc'ot ta pasele, xchi'uc li Joa, xnich'on Asaf, ja' li jts'ibajom yu'un ajvalile.

¹⁹ Jech i'albatic yu'un li Rabsacese: —Jech xbat avalbeic li Ezequiase: ‘Li muc'ta ajvalil ta Asiriae jech chal: ¿C'usi apatoj avo'nton yu'un ti bats'i jun no'ox avo'ntone?

²⁰ Chaval ti lec chapaloxuc, ti lec xu' avu'un paspleitoe, pero altic. ¿Boch'o apatoj avo'nton yu'un ti atoyoj aba ta jtojole?

²¹ Jna'oj ti ja' apatoj avo'nton yu'un li Egiptoe. Lec oy. Li Egiptoe ja' jech chac c'u cha'al jch'ix aj ti voch'eme. Li boch'o ta xoq'ui sba oe, ta x'och ta sc'ob li sjepelile, toj jelovel ta jot. Ja' no'ox jech chc'ot li boch'o tspat yo'nton yu'un li Faraón ta Egiptoe.

²² Me jech chavalbicune: Li vu'uncutique ja' chiscoltauncutic li Muc'ul Dios cu'uncutique, me xachiique, ¿me mu ja'uc Ezequías la sjines li c'opojebaletic xchi'uc li scajleb smoton Diose? ¿Me mu ja'uc noxtoc ti laj yalbe Judá xchi'uc Jerusalén ti li' no'ox ac'o yich'ic ta muc' Dios ta scajleb smoton li' ta Jerusalene?

²³ Ja' lec pasic ta co'ol avo'nton achi'uquic li ajvalil cu'un ta Asiriae. Vu'un chacac'bot cha'mil (2,000) ca'etic. Muc vo'cot chasa' li boch'o xu' yu'un chcajiique.

²⁴ Ac'o me apatoj avo'nton yu'un li caretaetic xchi'uc li soldadoetic cajajtic ta ca' chanovic yu'un Egiptoe, pero mu ja'uc xu' avu'un chatsalic jun banquilal soldado yu'un li Asiriae.

²⁵ ¿Me chanop ti muc ta sventauc Muc'ul Dios chtal jcontrain, chtal jlajes li lum li'i? ¡Ja' ta smantal ti tal jlajes li lume!’, xi li ajvalile —x'utatic yu'un li Rabsacese.

²⁶ Li Eliaquim, li Sebna, xchi'uc li Joae jech laj yalbeic li Rabsacese: —Avocoluc c'opanuncutic ta arameo c'op, yu'un xca'icutic noxtoc. Mu xac'opanuncutic ta hebreo c'op, yu'un scotol li jchi'iltaccutic li' oyic ta ba coraltone cha'yic li c'usi chavalique —xutic.

²⁷ Li Rabsacese jech laj yal: —Mu ja'uc no'ox ta stojol ajvalil avu'un xchi'uc ta atojolic ti la stacun tal li ajvalil ta Asiria ti jech tal calboxuque. Tacbilun tal ta sventa scotol li viniquetic le' oyic ta ba coraltone. Acotolic ta xlic alo' atso'ic xchi'uc chlic avuch' ac'abic —xut.

²⁸ Li Rabsacese lic sva'an sba; tsots i'avan, jech laj yal ta hebreo c'op: —A'yo ava'yic c'usi chal li muc'ta ajvalil ta Asiriae:

²⁹ ‘Mu xavac' abaic ta lo'lael yu'un li Ezequiase, yu'un mu xu' yu'un chascoltaoxuc loq'uel ta jc'ob’.

³⁰ Me chayalboxuc ti ja' no'ox ac'o ach'unic chascoltaoxuc li Muc'ul Diose, me jech chayalboxuque: ‘Ta melel ja' chiscoltautic li Muc'ul Diose, mu xac' ti ac'o ochuc ta sc'ob ajvalil ta Asiria li lum li'i’, me xayutoxuque,

³¹ mu xach'unic. Li ajvalil ta Asiriae jech chal: ‘La' jpastic ta co'ol co'ntontic; ac'o abaic ta jc'ob. Jech xu' chalo' atuquic jujunoxuc li ts'usubtic xchi'uc li higotic avu'unique, xchi'uc ja' chavuch'ic li vo' te ta pozoetic avu'unique.

³² Ts'acal chaquic'oxuc batel ta jun lequil banamil ti co'ol x'elan jech chac c'u cha'al li avosilic li'i. Lec ta xac' ep trigo, ts'usub, yaceiteal oliva, xchi'uc pom. Jech jun avo'nton te nacaloxuc; mu xachamic. Mu xach'unic me jech chayalboxuc li Ezequiase: Ja' Muc'ul Dios chiscoltautic, me xayutoxuque.

³³ Me junuc dios yu'un li jujun banamile, muc xu' yu'un la scolta li yosilale. Persa i'och ta jc'ob, vu'un li ajvalilun ta Asiriae.

³⁴ ¿Bu oy svu'el li dios yu'un Hamat xchi'uc Arfade? ¿Bu oy svu'el noxtoc li dios yu'un Sefarvaim xchi'uc li dios yu'un Hena xchi'uc Ivae? ¿Me ivu' yu'unic la scoltaic loq'uel ta jc'ob li Samariae?

³⁵ Scotol li diosetic le'e ¿boch'o junucal ivu' yu'un la scolta loq'uel ta jc'ob li yosilalique? ¿Me ja' xa xu' yu'un chiscoltabun loq'uel ta jc'ob lum Jerusalén ec li Muc'ul Diose?’, xi li ajvalile —xi li Rabsacese.

³⁶ Li israeletique me jbeluc mu'yuc c'usi laj yalic, yu'un jech ono'ox albilic yu'un ajvalil ti mu me xtac'ovic jbeluque.

³⁷ Ja' yu'un li Eliaquim, xnich'on Hilquías, ja' li jchabina yu'un ajvalile, xchi'uc li Sebna, ja' li boch'o tstsac ta vun c'usitic chc'ot ta pasele, xchi'uc li Joa, ja' li jts'ibajom yu'un ajvalile, la sli' sc'u'ic yu'un toj vocol laj ya'yic. Ibatic ta stojol li Ezequiase, bat yalbeic scotol c'usitic laj yal li Rabsacese.