2 Reyes 17 - Bible in Tzotzil de Chenalhó with Deuterocanon

Laj yich' tsalel lum Samaria xchi'uc chucbil ibatic li israeletique

¹ Ta xlajchabal jabil yochel ta ajvalilal ta Judá li Acaze, ja'o i'och ta ajvalilal ta Israel li Oseas xnich'on Elae. Baluneb jabil i'abtej.

² Pero toj chopol c'usi la spas ta stojol li Muc'ul Diose; ja' no'ox ti mu sta jech chac c'u cha'al la spas li yantic ajvaliletic ta Israel ti ba'yuc ijelovique.

³ Li Osease ital tsacatuc ta pleito yu'un li Salmanasar, ajvalil ta Asiriae, jech te i'och o ta c'abal; te lic stoj spatan.

⁴ Li ajvalil ta Asiriae la sna' ti oy bu ta sa' xchi'il ta mucul li Osease, yu'un oy stacoj batel j'almantaletic yu'un ta stojol So, ja' li ajvalil ta Egiptoe. Xchi'uc mu'yuc xa ta stoj spatan ta jujun jabil jech chac c'u cha'al tsc'an tspas ono'oxe. Jech lic yal mantal Salmanasar ti ac'o stsaquic li Osease jech la stiq'uic ta chuquel.

⁵ Jech te lic sventainbe o scotol li yosilalique xchi'uc li lum Samariae. Ta oxib jabil to itsal yu'unic.

⁶ Sbalunebal jabil yochel ta ajvalilal Oseas c'alal i'och ta sc'ob Samaria li ajvalil ta Asiriae. Jech la xchucan batel ta Asiria li israeletique. Te c'ot yac'an ta lum Halah, ta Habor te ta nopol uc'um Gozán, xchi'uc ta lumetic yu'un medoetic.

⁷ Yu'un li israeletique la sta smulic ta stojol li Muc'ul Dios yu'unic ti ja' iloq'uesatic tal ta Egipto ta sc'ob li ajvalil Faraone. Yu'un ja' laj yich'ic ta muc' li yan diosetique.

⁸ Xchi'uc ja' la xchanbeic stalelic li yanlum cristianoetic ti inutsbatic loq'uel ta stojolic yu'un Muc'ul Diose, xchi'uc ja' la sts'aclinic batel c'usi la spasic li ajvaliletic yu'unique.

⁹ Li israeletique ta mucul lic spasic c'usi chopol ta stojol li Muc'ul Diose. La spasic toyol c'opojebal yu'unic ta scotol lumetic yu'unic. Te ilic spasel yu'unic ta toyol q'uelub osiletic, ic'ot c'alal to ta lumetic ti lec setbilic ta tsatsal coraltone.

¹⁰ Lic sva'anic tonetic sventa chich'ic ta muc', xchi'uc sloc'obaltac Asera ta scotol stselejtic xchi'uc ta yolon te'etic.

¹¹ Te lic xchiq'uic pom ta scotol li toyol c'opojebaletic jech chac c'u cha'al la spasic li yanlum cristianoetic ti inutsbatic loq'uel ta stojolic yu'un Muc'ul Diose. Toj chopol li c'usitic la spasique jech la sa'beic sc'ac'al yo'nton li Muc'ul Diose.

¹² Ja' laj yich'ic ta muc' li c'usitic cuybilic ta dios ti albilic ono'ox yu'un Muc'ul Dios mu xu' chich'ic ta muq'ue.

¹³ Li Muc'ul Diose laj to staq'ui ta sventa j'alc'opetic xchi'uc ta sventa bijil viniquetic li Israel xchi'uc Judae, jech laj yal: “Sutanic tal; comtsanic li be atamojique. Ja' ch'unic li mantaletic xchi'uc li chanubtaseletic cu'un jech chac c'u cha'al calojbeic ono'ox amoltotaquic ta vo'one ta sventa cajtuneltaque, ja' li j'alc'opetique”, xut.

¹⁴ Pero muc xich'ic ta muc. La spas ta tsots yo'ntonic jech chac c'u cha'al li smoltotaquic ta vo'onee, jech muc xich'ic o ta muc' li Muc'ul Dios yu'unique.

¹⁵ La sbajbeic li smantaltaque, xchi'uc li c'usi xchapanoj ono'ox xchi'uc li smoltotaquique, xchi'uc li c'usi albilic ac'o spasique. Ja' lic yich'ic o ta muc li yan diosetic ti mu'yuc stsatsalique, jech mu'yuc stsatsalic ic'otic o ec. Ja' la spasic batel jech chac c'u cha'al la spasic li yanlum cristianoetic te oy ta spat xoconic ti albilic yu'un Muc'ul Dios mu me jechuc spasique.

¹⁶ Ja' la scomtsanic o xch'unel li mantaletic yu'un Muc'ul Dios yu'unique. Lic spasic sloc'obal cha'cot ch'ium tot vacaxetic ta unijesbil bronce taq'uin, xchi'uc sloc'obaltac Asera, xchi'uc lic yich'ic ta muc' scotol li c'usitic oy ta vinajele, xchi'uc laj yich'ic ta muc' li Baale.

¹⁷ La xchic' squeremic, stsebic ta sventa smoton li diosetic yu'unique. La xchanic t'unul, xchi'uc ac'chamel. Ja' laj yac' yo'ntonic o ta spasel c'usi chopol, jech i'ilin o ta stojolic li Muc'ul Diose.

¹⁸ Ja' yu'un li Muc'ul Diose itsan sc'ac'al yo'nton ta stojol li israeletique; la sloq'ues o ta stojol. Ja' xa no'ox la scomtsanbe li jchop sts'unubal Judae.

¹⁹ Pero ja' no'ox jech ec li Judae mu'yuc la xch'unbeic smantal li Muc'ul Diose; ja' la xchanbeic stalelic li xchi'iltaquic ta Israele.

²⁰ Ja' yu'un li Muc'ul Diose la sjip o ta yo'nton li smomnich'nabtac Israele. Laj yac'be tsots svocolic; laj yac' ochicuc ta sc'ob yajcontraic, jech la sloq'ues o ta stojol.

²¹ Yu'un la svoc' sbaic o xchi'uc smomnich'nab David li Israele. Ja' la stiq'uic ta ajvalilal ta sventa Israel li Jeroboam, xnich'on Nabate. Pero li Jeroboame ja' laj yac' loc'uc ta stojol Muc'ul Dios scotol li israeletique, yu'un laj yac'be sa' tsots smulic.

²² Ja' yu'un li israeletique ja' la spasic o c'usi chopol jech chac c'u cha'al la spas li Jeroboame; me jutuc mu'yuc la scomtsanic o spasel.

²³ Li Muc'ul Diose la sloq'ues o ta stojol li israeletic jech chac c'u cha'al laj ono'ox yal ta sventa li j'alc'opetic yu'une. Jech chucbil ibatic ta yosilal asiriaetic li israeletique. Te oyic o c'alal to tana.

Inaquiic yanlum cristianoetic ta Samaria

²⁴ Li ajvalil ta Asiriae laj yic' tal cristianoetic ta Babilonia, ta Cuta, ta Ava, ta Hamat, xchi'uc ta Sefarvaim; te vul yac' naquiicuc ta lumetic yu'un Samaria ta sventa xq'uexol li israeletique. Ja' la sventainic li Samariae; te inaquiic o ta lumetic.

²⁵ Ta sventa ti mu'yuc yich'ojic ta muc' Muc'ul Dios li cristianoetique, jech c'alal lic naquiicuc tee, li Muc'ul Diose la stac tal leonetic, jech oy imilatic, iti'atic jayibuc.

²⁶ Jech laj yalbeic li ajvalil ta Asiriae: “Li cristianoetic laj avic' batel, bat naquiicuc ta lumetic ta Samariae mu xotquinic c'u x'elan smantaltac li dios yu'un banamil tee. Ta sventa ti mu xotquinbeic li mantaletic yu'une, jech la stac tal leonetic, te iti'atic”, xutic.

²⁷ Li ajvalil ta Asiriae jech laj yal mantal: “Iq'uic batel junuc li paleetic laj achuquic tale; ac'o bat naquiuc. Te ac'o chanubtasvanuc c'u x'elan smantal li dios yu'un banamil tee”, xi.

²⁸ Oy jun pale ti chucbil iloc' batel ta Samariae; isut batel yan velta, te c'ot nacluc ta Betel. Te lic chanubtasvanuc c'u x'elan ta ich'el ta muc' li Muc'ul Diose.

²⁹ Pero ta jujun lum yo' bu nacalique la spas diosetic yu'unic. Ja' te la sva'ananic ti bu spasojic to'ox snailtac sdiosic li samariaetique.

³⁰ Li babiloniaetique la spasic sloc'obal Sucot-benot. Li cutaetique la spasbeic sloc'obal Nergal. Li hamatetique la spasbeic sloc'obal Asima.

³¹ Li avaetique la spasbeic sloc'obal Nibhaz xchi'uc Tartac. Li sefarvaimetique la xchic' xnich'onic sventa smoton li sdiosic Adramelec xchi'uc Anameleque.

³² Laj yich'ic ta muc' noxtoc li Muc'ul Diose, pero laj ono'ox st'ujic paleetic yu'unic ta sventa chaq'uic abtejuc te ta toyol vitsetic yo' bu oy li snailtac sdiosique.

³³ Ac'o me laj yich'ic ta muc' li Muc'ul Diose, pero te ono'ox laj yich'ic ta muc' noxtoc li diosetic yu'unic jech chac c'u cha'al stalelic li yantic lum ti bu i'ayic tal ta chuquele.

³⁴ Ja' jech tspasic o c'alal to tana. Muc xich'ic o ta muc' li Muc'ul Diose. Muc ja'uc spasic jech chac c'u cha'al chal li mantaletic xchi'uc li chanubtaseletic yu'une xchi'uc li c'usitic yan yalojbe ono'ox ac'o xch'unic li smomnich'nabtac Jacobe, ja' li Israel laj yac'be yan sbie.

³⁵ Yu'un oy ono'ox c'usi la xchapan xchi'uc li smomnich'nab Jacobe, jech laj yalbe: “Mu me xavich'ic ta muc' yan diosetic; mu me xaquejan abaic ta stojol. Mu me xatunic yu'un; mu me xamilbeic smoton.

³⁶ Jtuc no'ox me xavich'icun ta muc', xaquejan abaic ta jtojol, xamilbicun jmoton, yu'un vu'un Muc'ul Diosun avu'unic ti la jloq'uesoxuc tal ta Egipto ta jmuc'ul jtsatsale.

³⁷ Junuc avo'nton ch'unic li mantaletic, li chanubtaseletic, xchi'uc li c'usitic yan caloje. Mu me ja'uc xavich'ic ta muc' li yantic diosetique.

³⁸ Mu me xch'ay ta avo'ntonic li c'usi la jchapan ta atojolique. Mu me ja'uc xavich'ic ta muc' li yantic diosetique.

³⁹ Jtuc no'ox me xavich'icun ta muc', vu'un li Muc'ul Diosun avu'unique, jech chajcoltaoxuc loq'uel ta sc'ob li avajcontraique”, x'utatic ono'ox.

⁴⁰ Pero muc xich'ic ta muc'; ja' ono'ox la spasic o jech chac c'u cha'al li stalelic ono'oxe.

⁴¹ C'alal chich'ic ta muc' li Muc'ul Diose, te chich'ic ta muc' noxtoc li sloc'obal diosetic yu'unique. Li xnich'nabic, xchi'uc smomnich'nabique ja' jech la spasic ec jech chac c'u cha'al la spasic li smoltotique. Ja' jech tspasic o c'alal to tana.