2 Reyes 16 - Bible in Tzotzil de Chenalhó with Deuterocanon

Lic stsac yabtel ta ajvalilal ta Judá li Acaze

¹ Vuclajuneb (17) jabil xa'ox yochel ta ajvalilal ta Israel li Peka, xnich'on Remaliase, ja'o i'och ta ajvalilal ta Judá li Acaz, xnich'on Jotame.

² Yich'oj xa'ox jtob (20) jabil ti c'alal i'och ta ajvalilale. Vaclajuneb (16) jabil i'abtej ta Jerusalén. Pero muc ja'uc la spas c'usi tuc' ta pasel ta stojol Muc'ul Dios jech chac c'u cha'al tuc' c'usi la spas li smuc'ta moltot, Davide.

³ Ja' la sts'aclin batel c'usi la spasic li ajvaliletic ta Israele. Jech noxtoc la xchic' xnich'on sventa smoton sdios jech chac c'u cha'al sbol talelic li yanlum cristianoetic ti inutsbatic loq'uel ta stojolic yu'un Muc'ul Diose.

⁴ Jech noxtoc la smilbe smoton sdios, xchi'uc la xchic' pom ta toyol vitsetic, ta yoc vitsetic, xchi'uc ta yolon te'etic ti lec pim yanale.

⁵ Ja' yu'un li Rezín, ajvalil ta Siria, xchi'uc li Peka, xnich'on Remalías, ajvalil ta Israele, ibat stsaquic ta pleito li Jerusalene. C'ot setuic li Acaze, pero muc xu'uninic li lume.

⁶ C'alal ja'o jech ic'ot ta pasele, li ajvalil ta Edome bat spoj li lum Elate, jech laj yu'uninic yan velta li edometique. La snutsic loq'uel scotol li judaetique; te inaquiic o, jech te nacalic o c'alal to tana.

⁷ Ja' yu'un li Acaz, ajvalil ta Judae, la stac batel j'almantaletic yu'un ta stojol li Tiglat-pileser, ajvalil ta Asiriae, jech laj yalbe batel: “Li vu'une ja' jechun chac c'u cha'al anich'on. Avocoluc coltaun loq'uel ta sc'ob li ajvalil ta Siria, xchi'uc li ajvalil ta Israele yu'un chiscontrainicun”, xut.

⁸ Li Acaze la sloq'ues scotol li saquil taq'uin, li c'anal taq'uin te oy ta xch'ulna Muc'ul Diose xchi'uc te ta spasubmantale. La stacbe batel smotonin li ajvalil ta Asiriae.

⁹ Li ajvalil ta Asiriae la xch'un. Jech ibat stsaquic ta pleito li lum Damascoe, jech i'och o ta sc'obic. La xchuquic batel li yajvaltac lume. Laj yiq'uic batel c'alal to ta lum Kir, xchi'uc la smilic comel noxtoc li Rezine.

¹⁰ Li ajvalil Acaze ibat ta Damasco, bat snup ta be li Tiglat-pileser, ajvalil ta Asiriae. Te laj yil oy scajleb matanal te pasbil. Jech la spasbe batel lec senyail ti c'u x'elan pasbile. La stacbe batel li pale Uriase, yu'un ac'o spas junuc scajleb smoton Dios co'ol jech chac c'u cha'al le'e.

¹¹ Li pale Uriase lic spas li scajleb smoton Dios jech chac c'u cha'al i'albat batel yu'un li ajvalil te ta Damascoe. Meltsajem xa'ox yu'un ti c'alal mu'yuc to'ox tsut tal ta Damasco li ajvalil Acaze.

¹² C'alal isut tal ta Damasco li ajvalile, laj yil ti meltsanbil xa li scajleb matanale, jech bat yac' matanal te ta sba.

¹³ Te jmoj la xchic' xchi'uc li yantic matanal ti co'oltic jech chac c'u cha'al trigoe, xchi'uc te la smal ta sba li ya'lel sts'usube, xchi'uc te la svijbe ta sba noxtoc li xch'ich'al matanal laj yac' ta sventa lec ch-ilat yu'un Diose.

¹⁴ Li scajleb smoton Dios pasbil ta bronce te oy ta yeloval ch'ulnae laj yal mantal ajvalil Acaz ti ac'o yich' loq'uesele. Te laj yaq'uic ta jot xocon ch'ulna ta stuq'uil norte. Cacal ta o'lol ic'ot yu'un li xch'ulna Muc'ul Dios xchi'uc li ach' scajleb smoton Dios la spasique.

¹⁵ Li ajvalil Acaze jech laj yalbe noxtoc li pale Uriase: “Te ta muc'ta cajleb matanal xachic' li matanal ta sventa sobe, xchi'uc te xachic' li matanal sventa mal c'ac'al ti co'oltic jech chac c'u cha'al trigoe. Jech noxtoc te xachic' li matanaletic, xchi'uc li c'usitic yan jech chac c'u cha'al trigo chcac' vu'une, xchi'uc li chic'bil matanaletic, xchi'uc li c'usitic yan jech chac c'u cha'al trigoe, xchi'uc li ya'lel ts'usub chaq'uic jchi'iltactique. Li xch'ich'al chic'bil matanal xchi'uc li xch'ich'al milbil matanaletique te xavij ta sba li scajleb matanale. Li yan scajleb matanal pasbil ta broncee ja' chtun cu'un sventa c'alal oy c'usi ta jac'be li Muc'ul Diose”, xut.

¹⁶ Li pale Uriase la spas scotol jech chac c'u cha'al i'albat yu'un ajvalil Acaze.

¹⁷ Li ajvalil Acaze la sloq'uesbe li stselajtiquil snacleb muc'ta yavil vo'e, xchi'uc la sloq'ues li muc'ta yavil vo' cajal ta sloc'obal vacaxetic pasbil ta broncee. Ta ba ton xa no'ox laj yac'.

¹⁸ Xchi'uc la sloq'ues noxtoc li stentenail xch'ulna Muc'ul Dios sventa chtun yu'unic ta sc'ac'alil chcux yo'ntonique xchi'uc li jun ti'na te ta spat pasbil sventa ajvalile, yu'un tsc'an ti lec ch-ilat yu'un li ajvalil ta Asiriae.

¹⁹ Li yantic sc'oplal Acaze xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Judae.

²⁰ C'alal ichame, te bat smuquic ta Lum yu'un David yo' mucul li smoltotaque. Ja' i'och ta xq'uexol jun xnich'on, Ezequías sbi.