2 Reyes 15 - Bible in Tzotzil de Chenalhó with Deuterocanon

I'och ta ajvalilal ta Judá li Azariase, ja' li Uzías yan sbie

¹ Vucub xcha'vinic (27) jabil xa'ox yochel ta ajvalilal ta Israel li Jeroboame, ja'o i'och ta ajvalilal ta Judá li Azarías, xnich'on Amasiase.

² C'alal i'och ta ajvalilale, yich'oj vaclajuneb (16) jabil. Lajchab yoxvinic (52) jabil i'abtej ta Jerusalén. Li sme'e Jecolías sbi, liquem ta Jerusalén.

³ Toj lec c'usi la spas ta stojol Muc'ul Dios jech chac c'u cha'al la spas li stote.

⁴ Pero li toyol c'opojebaletique mu'yuc la sjines. Te ono'ox bat yaq'uic o milbil matanal xchi'uc bat xchiq'uic pom li israeletique.

⁵ Ja' yu'un li Muc'ul Diose laj yac'be stoj smul li ajvalile; laj yac' tsacatuc ta c'a'el chamel, ja' jech ip o c'alal to icham, jech stuc voc'bil o ta jun na. Li spasubmantale ja' la sventain xnich'on, Jotam sbi; ja' xa la sventain o li israeletique.

⁶ Li yantic sc'oplal Azariase xchi'uc scotol li c'usitic la spase te ts'ibabil ta svunal li c'usitic ic'ot ta pasel yu'un ajvaliletic ta Judae.

⁷ C'alal icham li Azariase, te bat smuquic ta Lum yu'un David yo' bu mucul li smoltotaque. Ja' i'och ta xq'uexol jun xnich'on, Jotam sbi.

I'och ta ajvalilal ta Israel li Zacariase

⁸ Vaxaclajuneb xcha'vinic (38) jabil xa'ox yochel ta ajvalilal ta Judá li Azariase, ja'o i'och ta ajvalilal vaquib u te ta Israel li Zacarías, xnich'on Jeroboame.

⁹ Pero toj chopol c'usi la spas ta stojol Muc'ul Dios jech chac c'u cha'al la spas li smoltotaque. Ja' co'ol la spas jech chac c'u cha'al la spas li Jeroboam, xnich'on Nabat ti laj yac'be sa' smulic li israeletique.

¹⁰ Ja' yu'un li Salum, xnich'on Jabese, ta mucul la stsob xchi'iltac yu'un tsc'an tsmil li Zacariase. Jech te la smil ta stojol israeletic; ja' i'och ta xq'uexol stuc.

¹¹ Li yantic sc'oplal Zacariase te ts'ibabil ta svunal c'usitic ic'ot ta pasel yu'un li ajvaliletic ta Israele.

¹² Ja' ic'ot ta pasel ti jech ono'ox laj yal Muc'ul Dios ta sventa li Jehue: “Ta xcac' ochicuc o ta ajvalilal te ta Israel anich'nab c'alal to ta xchanc'olal amomnich'nab”, x'utat ono'ox.

I'och ta ajvalilal ta Israel li Salume

¹³ Balunlajuneb xcha'vinic (39) jabil xa'ox yochel ta ajvalilal ta Judá li Uziase, ja'o i'och ta ajvalilal li Salum, xnich'on Jabese. Jun u no'ox i'abtej ta Samaria.

¹⁴ Yu'un li Manahem, xnich'on Gadie, ibat ta Tirsa; te ic'ot ta Samaria. Te c'ot smil li Salume; ja' i'och o ta xq'uexol stuc.

¹⁵ Li yantic sc'oplal Salume xchi'uc ti c'u x'elan la stsob xchi'iltac c'alal la smil li Zacariase te ts'ibabil ta svunal c'usitic ic'ot ta pasel yu'un li ajvaliletic ta Israele.

¹⁶ Li Manaheme laj yules o comel li lum Tifsae, xchi'uc laj yich'beic scotol li c'usitic oy yu'unique xchi'uc li c'usitic oy yu'unic ta yosilalic xc'ot c'alal ta lum Tirsae. La sjatbeic xch'ut scotol li antsetic ti oy xch'utique. Ti jech la spasique, ja' ta sventa ti mu'yuc la sjamic li ti'coraltone.

Lic stsac yabtel ta ajvalilal ta Israel li Manaheme

¹⁷ Balunlajuneb xcha'vinic (39) jabil xa'ox yochel ta ajvalilal ta Judá li Azariase, ja'o i'och ta ajvalilal ta Israel li Manahem, xnich'on Gadie. Lajuneb jabil i'abtej ta Samaria.

¹⁸ Pero toj chopol c'usi la spas ta stojol li Muc'ul Diose. Ti jayib c'ac'al cuxule ja' co'ol jech la spas jech chac c'u cha'al li Jeroboam, xnich'on Nabat ti laj yac'be sa' smulic li israeletique.

¹⁹ Li Pul, ja' li ajvalil ta Asiriae, ibat spojbe li yosilal israeletique. Li Manaheme laj yac'be oxlajuneb xcha'vinic ta mil (33,000) kilo saquil taq'uin, yu'un jech te ac'o comtsanatuc ta yabtel.

²⁰ Li Manaheme lic yal mantal ti ac'o yaq'uic ech'em ta o'lol kilo saquil taq'uin jujunic li jc'ulejetic yu'un israeletique, yu'un jech tsta ti c'u yepal chac'be li ajvalil ta Asiriae. Jech isut o batel ta slumal li ajvalil ta Asiriae; muc xjalij lec te ta yosilal li Israele.

²¹ Li yantic sc'oplal Manaheme xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Israele.

²² C'alal ichame, ja' i'och ta xq'uexol jun xnich'on, Pekaía sbi.

I'och ta ajvalilal ta Israel li Pekaiae

²³ Vo'lajuneb (15) jabil xa'ox yochel ta ajvalilal ta Judá li Azariase, ja'o i'och ta ajvalilal ta Israel li Pekaía, xnich'on Manaheme. Chib jabil i'abtej ta Samaria.

²⁴ Pero toj chopol c'usi la spas ta stojol li Muc'ul Diose. Ja' jech la spas jech chac c'u cha'al li Jeroboam, xnich'on Nabate, ja' ti laj yac'be sa' smulic li israeletique.

²⁵ Oy jun banquilal soldado yu'un, Peka sbi; ja' xnich'on Remalías. Ja' lic stsob xchi'il sventa tsmil li ajvalil yu'une. Jech te la smil ta Samaria ta spasubmantal li ajvalile. Ja' la xchi'in li Argob, xchi'uc Arie, xchi'uc lajuneb yoxvinic (50) israeletic liquemic ta Galaad. Ja' i'och comel ta xq'uexol stuc.

²⁶ Li yantic sc'oplal Pekaiae xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Israele.

I'och ta ajvalilal ta Israel li Pekae

²⁷ Lajchab yoxvinic (52) jabil xa'ox yochel ta ajvalilal ta Judá li Azariase, ja'o i'och ta ajvalilal ta Israel li Peka, xnich'on Remaliase. Jtob (20) jabil i'abtej ta Samaria.

²⁸ Pero toj chopol c'usi la spas ta stojol li Muc'ul Diose. Ja' jech la spas jech chac c'u cha'al la spas Jeroboam, xnich'on Nabat ti laj yac'be sa' smulic li israeletique.

²⁹ C'alal ja'o tiq'uil ta ajvalilal ta Israel li Pekae, te ic'ot li Tiglat-pileser, ajvalil ta Asiriae. La spoj li lum Ijón, Abel-bet-maaca, Janoa, Cedes, Hazor, Galaad, Galilea, xchi'uc scotol li yosilal Neftalie. Li jnaclumetic tee la xchuquic batel ta Asiria.

³⁰ Li Oseas, xnich'on Elae, lic stsob xchi'iltac, jech la smilic li ajvalil Peka, xnich'on Remaliase. Ja' i'och ta xq'uexol stuc. C'alal i'och ta q'uexolile, jtob (20) jabil xa'ox yochel ta ajvalilal li Jotam, xnich'on Uziase.

³¹ Li yantic sc'oplal Pekae xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Israele.

I'och ta ajvalilal ta Judá li Jotame

³² Chib jabil xa'ox yochel ta ajvalilal ta Israel li Peka, xnich'on Remaliase, ja'o i'och ta ajvalilal ta Judá li Jotam, xnich'on Uziase.

³³ C'alal i'och ta ajvalilale, vo'ob xcha'vinic (25) jabil xa'ox yich'oj. Vaclajuneb (16) jabil i'abtej ta Jerusalén. Li sme'e Jerusa sbi; ja' stseb Sadoc.

³⁴ Toj lec c'usi la spas ta stojol li Muc'ul Diose. Ja' co'ol la spas jech chac c'u cha'al la spas li stote, ja' li Uziase.

³⁵ La spasbe lec muc' sti' scoralil li ch'ulna yu'un Muc'ul Diose. Pero li toyol c'opojebaletic yu'unique mu'yuc ono'ox la sjinesic. Te ono'ox bat smilic matanal, bat xchiq'uic pom li israeletique.

³⁶ Li yantic sc'oplal Jotame xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Judae.

³⁷ Li Muc'ul Diose ja'o yorail la stac batel li Rezín, ajvalil ta Siriae, yu'un bat scontrain li Judá xchi'uc li Peka, xnich'on Remaliase.

³⁸ C'alal icham li Jotame, te bat smuquic ta Lum yu'un David yo' bu mucul li smoltotaque. Ja' i'och ta xq'uexol jun xnich'on, Acaz sbi.