2 Reyes 14 - Bible in Tzotzil de Chenalhó with Deuterocanon

I'och ta ajvalilal ta Judá li Amasiase

¹ Ta xchibal jabil yochel ta ajvalilal ta Israel li Joás, xnich'on Joacaze, ja'o i'och ta ajvalilal ta Judá li Amasías, xnich'on Joase.

² C'alal i'och ta ajvalilal li Amasiase, yich'oj xa'ox vo'ob xcha'vinic (25) jabil. Baluneb xcha'vinic (29) jabil i'abtej ta Jerusalén. Li sme'e Joadán sbi; te liquem ta Jerusalén.

³ Li Amasiase lec c'usitic la spas ta stojol li Muc'ul Diose. Ac'o me mu xco'laj lec jech chac c'u cha'al la spas li smoltot Davide, pero ja' ono'ox jech la spas jech chac c'u cha'al la spas li stote, ja' li Joase.

⁴ Ja' no'ox ti muc sloq'ues scotol li toyol c'opojebaletic yu'un israeletique; te ono'ox la xchiq'uic o matanaletic xchi'uc pom.

⁵ C'alal nacal xa o lec ta yabtele, lic smilan scotol li j'abteletic ti la smilbeic li stote.

⁶ Pero muc smilbe li xnich'nabique yu'un jech chal ta svunal li mantaletic ti la sts'iba comel Moisés ta sventa ti jech laj yal li Muc'ul Diose: “Li totiletique mu xu' ta xich'ic milel ta scoj smul li xnich'nabique. Jech ec li nich'naletique mu xu' ta xich'ic milel ta scoj smul li stotique. Ta jujuntal ac'o chamuc ta scoj smul stuquic”, xi yaloj.

⁷ Jech noxtoc la smil lajunmil (10,000) edometic te ta Stenlejaltic yu'un Ats'am. Xchi'uc la spoj ta pleito li lum Selae. Jocteel laj yac'be sbi. Ja' jech sbi o c'alal to tana.

⁸ Li Amasiase la stac batel j'almantaletic ta stojol li ajvalil Joás, xnich'on Joacaz, smomnich'on Jehue, jech laj yalbe batel: “La' me, jq'uelbe jba jsatic”, xut batel.

⁹ Li Joás, ajvalil ta Israele, jech la stac'be sutel li Amasiase: “Li jpets ch'ixe jech laj yalbe batel li jpets ch'ut te' ta Libanoe: ‘Ac'bo yic' atseb li jquereme’, xut. Pero te ijelov jcot jti'vanej bolom, ech' xpech' ta teq'uel li ch'ixe.

¹⁰ Ta melel laj xa atsal li edometique, jech atoyoj xa aba o. Lec oy, toyo aba, pero ja' lec te xa no'ox coman ta ana. ¿C'u yu'un ti chac'an chasa' avocol atuc, xchi'uc chasa'be svocol li Judae?”, xut batel.

¹¹ Li Amasiase muc xich' ta muc'. Ja' yu'un li Joás, ajvalil ta Israele, ibat ta Bet-semes. Te bat stsac sbaic ta pleito xchi'uc li Amasías, ajvalil ta Judae.

¹² Li Judae itsalat yu'un li Israele. Ta jujuntal ijatovic sutel ta snaic.

¹³ Li Joás, ajvalil ta israele, la xchuc te ta Bet-semes li Amasías, ajvalil ta Judae, ja' li xnich'on Joás, smomnich'on Ocoziase. Ja'o ibat ta Jerusalén noxtoc, c'ot svuq'ues li coralton yu'un Jerusalene. Ja' balunvinic (180) metro la sjines. Te la sliques ta sti' li coralton Efraín sbie, c'alal to ta yan sti' ta xchiquin coralton.

¹⁴ Jech noxtoc laj yich' batel scotol li c'anal taq'uin, li saquil taq'uin, xchi'uc scotol li c'usitic chtun ta ch'ulna yu'un Muc'ul Diose. Xchi'uc laj yich' batel noxtoc li taq'uinetic te ta spasubmantal ajvalile. Laj yic' batel noxtoc jayibuc viniquetic sventa prentail, jech te isut batel ta Samaria.

¹⁵ Scotol li yantic sc'oplal Joase, xchi'uc li c'usitic tsotsic ivu' yu'une, xchi'uc li pleito la spasic xchi'uc Amasías, ajvalil ta Judae, te ts'ibabil ta svunal c'usitic ic'ot ta pasel yu'un li ajvaliletic ta Israele.

¹⁶ C'alal ichame, te laj yich' muquel ta Samaria yo' bu mucajtic li ajvaliletic ta Israele. Ja' i'och ta xq'uexol jun xnich'on, Jeroboam sbi.

¹⁷ Li Amasías xnich'on Joás, ajvalil ta Judae, vo'lajuneb (15) to jabil icuxi ti c'alal icham li Joás, xnich'on Joacaz, ajvalil ta Israele.

¹⁸ Li c'usitic la spas li Amasiase te ts'ibabil ta svunal c'usitic ic'ot ta pasel yu'un li ajvaliletic ta Judae.

¹⁹ Te ta Jerusalén oy boch'o lic snopic c'u x'elan xu' tsmilic li ajvalil Amasiase, jech ijatov batel ta Laquis. Pero la snutsic batel; te c'ot smilic.

²⁰ La xcuchic batel ta ca'. Te c'ot smuquic ta Jerusalén ta Lum yu'un David yo' bu mucajtic li smoltotaque.

²¹ Scotol li israeletic ta Judae ja' lic stiq'uic ta ajvalilal yu'unic li Azarías, xnich'on Amasiase; ja' la xq'uexolin li stote. Yich'oj vaclajuneb (16) jabil ti c'alal i'och ta ajvalilale.

²² C'alal chamen xa'ox li stote, lic xcha'va'an yan velta li lum Elate; ja' ic'ot ta yu'unic yan velta li Judae.

I'och ta ajvalilal ta Israel li xchibal Jeroboame

²³ C'alal svo'lajunebal (15) jabil xa'ox yochel ta ajvalilal ta Judá li Amasías, xnich'on Joase, ja'o i'och ta ajvalilal ta Israel li Jeroboam xnich'on Joase. Jun yoxvinic (41) jabil i'abtej ta Samaria.

²⁴ Pero toj chopol c'usi la spas ta stojol li Muc'ul Diose. Ja' jech la spas jech chac c'u cha'al li Jeroboam, xnich'on Nabat ti laj yac'be sa' smulic li israeletique.

²⁵ Ja' la xcha'poj noxtoc li sts'aquil yosilal israeletic batem ta pojele. Te xlic ta ti'lum Hamat c'alal to ta nab Arabá. Ja' ic'ot o ti jech ono'ox laj yal Muc'ul Dios ta sventa li yajtunel Jonás, xnich'on Amitaie, ja' li j'alc'op ta Gat-hefere.

²⁶ Yu'un li Muc'ul Diose laj yil ti toj tsots svocolic scotol li israeletique; ti mu'yuc boch'o junuc xu' chcoltaatic loq'uel ta svocolique.

²⁷ Ja' yu'un li Muc'ul Diose lic scolta loq'uel ta svocolic ta sventa li Jeroboam, xnich'on Joase, yu'un mu'yuc ono'ox ta yo'nton tstu'pbe sts'unubal li' ta banamil li Israele.

²⁸ Li yantic sc'oplal Jeroboame, xchi'uc li c'usitic tsotsic ivu' yu'une, xchi'uc li pleito la spase, xchi'uc ti laj yac'be ta sc'ob israeletic yan velta li lum Damasco xchi'uc lum Hamate, xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Israele.

²⁹ C'alal icham li Jeroboame, te bat smuquic yo' bu mucul li ajvaliletic ta Israele. Ja' i'och ta xq'uexol jun xnich'on, Zacarías sbi.