2 Reyes 12 - Bible in Tzotzil de Chenalhó with Deuterocanon

Li Joase lic stsac yabtel ta ajvalilal te ta Judá

¹ Svucubal xa'ox jabil yochel ta ajvalilal ta Israel li Jehú c'alal i'och ta ajvalilal ta Judá li Joase. Cha'vinic jabil i'abtej ta Jerusalén. Li sme'e Sibia sbi; te liquem ta Beerseba.

² Li Joase toj lec c'usitic la spas ta stojol li Muc'ul Diose, yu'un lec ichanubtasat yu'un li pale Joiadae.

³ Pero mu'yuc ono'ox la sjinesic li toyol c'opojebaletic yo' bu va'ajtic li diosetic yu'unique, jech te ono'ox bat smilic matanal; bat xchiq'uic pom li israeletique.

^4-5 Ts'acal to li Joase jech laj yalbe li paleetique: —Tsobic scotol li taq'uin chtal yaq'uic li' ta ch'ulna sventa smoton Muc'ul Diose. Xchi'uc c'alal chtal yaq'uic ti c'u yepal chapanbil chac' jujun jchi'iltactique, xchi'uc scotol ti c'u yepal chich'ic tal ta yutsil yo'ntonic te ta ch'ulna yu'un Muc'ul Diose, c'anbeic li boch'otic sventainojic li taq'uine. Ja' xameltsanic o li c'usitic tsc'an cha'meltsanel te ta ch'ulnae —xut.

⁶ Pero c'alal iloc' oxib xcha'vinic (23) jabil yochel ta ajvalilal li Joase, li paleetique yoquel to mu'yuc meltsajem yu'unic li ch'ulna bu soquemique.

⁷ Ja' yu'un li ajvalil Joase lic stac ta iq'uel li banquilal pale Joiadae xchi'uc li yantic paleetique, jech laj yalbe: —¿C'u yu'un ti yoquel to mu'yuc acha'meltsanojic o li ch'ulnae? Li' ta ora xchi'uc le' to batele mu xa me xac'anbeic taq'uin li boch'o sventainojique. Li boch'o yich'anoj xa avu'unique, ac'o xa yaq'uic tunuc ta sventa li ch'ulnae —xut.

⁸ Li paleetique lec laj ya'yic ti muc xa ja'uc tstsobbeic staq'uinic li xchi'iltaquique, xchi'uc ti mu xa ja'uc chcom ta yac'olic smeltsanel li ch'ulnae.

⁹ Li banquilal pale Joiadae laj yich' tal jun caxa. La svombe jutuc li smaque; te laj yac' ta xocon scajleb smoton Dios ta bats'ic'ob ti c'alal ch-ochic batel ta ch'ulnae. Li paleetic ti chchabiic ti'ch'ulnae; te la stiq'uic scotol li taq'uin chtal yaq'uic ta ch'ulna yu'un Muc'ul Diose.

¹⁰ C'alal laj yilic ti i'epaj xa li taq'uin te ta caxae, te ital li jts'ibajom yu'un ajvalile xchi'uc li banquilal palee. Laj yatic li taq'uine; la stiq'uic ta yavil.

¹¹ Ja' laj yac'beic ta sc'ob li boch'otic sventainojic abtel ta ch'ulnae, yu'un ac'o stojic li carpinteroetique xchi'uc li jchanubtasvanejetic sventa abtel ta ch'ulnae,

¹² xchi'uc li alvaniletique, xchi'uc li j'ante'etique. Xchi'uc ac'o smanic li te'etic, li tonetic sventa chich' meltsanel o ch'ulnae.

¹³ Li taq'uin bat yaq'uic ta ch'ulnae mu'yuc laj yaq'uic tunuc ta sventa chich' pasel o copaetic, xtuch'ubil sc'aq'uemal mechaetic, muc'tic tazaetic, oq'uesetic, xchi'uc c'usitic yantic chtun pasbil ta c'anal taq'uin xchi'uc ta saquil taq'uin.

¹⁴ Ja' no'ox laj yac'beic ta sc'ob li boch'otic sventainojic xcha'meltsanel li ch'ulna yu'un Muc'ul Diose.

¹⁵ Mu'yuc la sjac'beic butic ilaj yu'unic taq'uin li boch'otic i'och ta sc'obic sventa tstojic o j'abteletique yu'un sna'ojic ti tuc' yo'ntonique.

¹⁶ Li yantic taq'uin smoton Dios ta sventa muliletic xchi'uc ta sventa bu chjelovic ta stojol Diose, mu'yuc laj yich'ic batel ta ch'ulna, yu'un ja' yu'unic xa li paleetique.

¹⁷ Li Hazael, ajvalil ta Siriae, ja'o yorail bat stsac ta pleito li lum Gate, jech i'och o ta sc'ob. Ts'acal ibat noxtoc ta Jerusalén.

¹⁸ Li ajvalil Joase la stsob scotol li c'usitic voc'bil comel ta stojol Muc'ul Dios yu'unic li smoltotaque, ja' li Josafate, li Jorame, xchi'uc li Ocoziase, ja' li ajvaliletic ta Judae, xchi'uc li c'usitic svoc'oj xa ta sventa Muc'ul Dios stuque, xchi'uc scotol li c'anal taq'uin te oy ta ch'ulna xchi'uc te ta spasubmantal ajvalile. Ja' la stacbe batel smotonin li Hazael, ajvalil ta Siriae, jech mu'yuc la scontrain o li Jerusalene; te isut o batel.

¹⁹ Scotol li yantic sc'oplal Joase xchi'uc li c'usitic la spase te ts'ibabil ta svunal c'usitic ic'ot ta pasel yu'unic li ajvaliletic ta Judae.

^20-21 Ts'acal lic xchap sc'opic li xchi'iltac ta abtel Joase, ja' li Josacar xnich'on Simeate, xchi'uc li Jozabad xnich'on Somere. Jech la smilic te ta sna Milo ti c'alal ja'o chyal batel ta Silae. Te bat smuquic yo' bu mucul li smoltotac ta Lum yu'un Davide. Ja' i'och ta xq'uexol jun xnich'on, Amasías sbi.