2 Reyes 11 - Bible in Tzotzil de Chenalhó with Deuterocanon

La stic' sba stuc ta ajvalilal li Ataliae

¹ Li Atalía sme' Ocoziase, laj ya'ay ti chamen xa li yole, ja' li Ocoziase, jech lic smilbe scotol li xnich'nabtac yole.

² Pero li Josaba, stseb ajvalil Joram, xvix Ocoziase, laj to snac'be jun xnich'on li ajvalil Ocoziase, Joás sbi. Ja'o laj yic' loq'uel ta anil ti c'alal ja'o yochelic ta milel li yantique. Te bat snac' ta jun cuarto sventa vaybal, laj yac'be xchi'in jts'itesej olol yu'un, jech muc xtaat o ta milel yu'un li Ataliae.

³ Li Joase vaquib jabil te nac'bil ta ch'ulna yu'un li jts'itesej olol ti c'alal ja'o ochem ta ajvalilal te ta Judá li Ataliae.

⁴ Ta svucubal jabile, li pale Joiadae laj yic' li banquilaletic yu'un vo'vinic (100) soldado, xchi'uc li yantic banquilal soldadoetique, xchi'uc li jchabivanejetique; laj yic' ochel ta xch'ulna Muc'ul Dios. La spas lec ta co'ol yo'ntonic, jech lic yalic ta stojol Dios. Ts'acal laj yac'be yilic li Joase, ja' li xnich'on anima ajvalile.

⁵ Jech laj yal mantal li Joiadae: “Ja' jech tsc'an chapasic chac li'i: Paso abaic ta oxvoc'. Jvoc' ac'o com xchabiic spasubmantal ajvalil ta sc'ac'alil ta jcux co'ntontic.

⁶ Li yan jvoq'ue te ac'o baticuc ta ti'coral Shur; li yan jvoq'ue te ac'o baticuc ta ti'coral ta spat snail soldadoetic. Ja' jech tsc'an chajelilan abaic ta xchabiel li spasubmantal ajvalile.

⁷ Vo'oxuc li cha'tsoboxuc mu'yuc chachabivanic ta sc'ac'alil ta jcux co'ntontique. Vo'oxuc chachabiic li ch'ulna yu'un Muc'ul Diose xchi'uc li ajvalile.

⁸ Seto abaic ta spat xocon li ajvalil Joase; ich'o lec avabtejebic. Me oy boch'o chtal stsin sba jelovel ta atojolique, milic. Vo'oxuc chachi'inic li ajvalil buyuc no'ox chbate”, xi li pale Joiadae.

⁹ Li banquilal soldadoetique la spasic jech chac c'u cha'al i'albatic yu'un li pale Joiadae. Li boch'otic ja' to i'ochic ta jchabivanej ta sc'ac'alil chcux yo'ntonique xchi'uc li boch'otic ja' to iloq'uique la sventainan lec li sviniquique. Te italic ta stojol li pale Joiadae.

¹⁰ Li pale Joiadae laj yac'anbe slanzaic xchi'uc smaquic li banquilal soldadoetique, ja' to'ox yu'un li ajvalil David te tiq'uil ta ch'ulna yu'un Muc'ul Diose.

¹¹ Li soldadoetique te lic xchapan sbaic sventa chchabiic li ajvalile; yich'anoj lec yabtejebic. Te la xchol sbaic batel ta jujujot xocon ch'ulna ta bats'ic'ob xchi'uc ta ts'etc'ob te ta nopol scajleb smoton Dios. Ja' cacal ta o'lol icom yu'unic li ajvalile.

¹² Li pale Joiadae laj yic' loq'uel tal li Joás, xnich'on ajvalile; laj yac'be scoronail sjol xchi'uc svunal yabtel sventa ajvalilal, xchi'uc la smalbe aceite ta sjol. C'alal jech la spasbee, la spac' sc'obic, jech laj yalic: “¡Ich'biluc ta muc' li ajvalile!”, xiic.

¹³ C'alal laj ya'ay Atalía ti ch-avanique, ibat ta xch'ulna Muc'ul Dios yo' bu tsobolique.

¹⁴ Laj yil ti te va'al ta nopol yoyal ch'ulna li ajvalil jech chac c'u cha'al tspasic ono'ox c'alal ch-och ach' ajvalile. Li banquilaletique, xchi'uc li jtijsonetique, xchi'uc li yantic israeletique te xchi'uquic li ach' ajvalile xcuxet no'ox yo'ntonic te tsjupan yoq'uesic. C'alal laj yil jech li Ataliae, la sli' sc'u'; tsots i'avan: —¡Jcontrainvanejetic! ¡J'ac'vanejetic ta c'abal! —xi.

¹⁵ Li pale Joiadae jech laj yalbe li banquilal soldadoetique: —¡Iq'uic loq'uel li ants li'i. Li boch'otic nabalic ta stojole, milic! —xut. Yu'un li palee yaloj ti mu xu' te tsmilic ta ch'ulna yu'un Muc'ul Diose,

¹⁶ jech la stsaquic loq'uel; te bat smilic ta sti' spasubmantal ajvalil yo' bu yochebic li boch'otic cajajtic ta ca'e.

¹⁷ Li palee la xchapanic ta stojol Muc'ul Dios ti chac' sbaic ta sc'ob Muc'ul Dios xchi'uc li ajvalil yu'unique xchi'uc li israeletique. Jech noxtoc la xchapanic ti co'oluc yo'ntonic xchi'uc ajvalil li israeletique.

¹⁸ Jech te ibat scotolic ta xch'ulna li Baale. La sjinesic; la slilinic o ta j'ech'el li scajleb matanaletique xchi'uc li sloc'obaltac sdiosique. Li Matán, ja' li pale yu'un Baale, la smilic te ta nopol scajleb matanaletic. Li pale Joiadae laj yac' jtsob soldadoetic ta xch'ulna Muc'ul Dios.

¹⁹ Te lic yic'an li banquilaletic yu'un vo'vinic (100) soldadoetique, li banquilal soldadoetique, li jchabivanejetique, xchi'uc scotol li israeletique. Ja' la xchi'inic totsel ta xch'ulna Muc'ul Dios li ajvalile te ic'ot ta spasubmantal. C'alal i'och ta sti' spasubmantal li Joase, te ichoti ta chotlebal sventa ajvalil.

²⁰ Scotol li israeletique toj xcuxet no'ox yo'ntonic. Mu'yuc xa pleito laj ya'yic te ta slumalic, yu'un laj xa yich' milel te ta nopol spasubmantal ajvalil li Ataliae.

²¹ Li Joase vucub jabil yich'oj ti c'alal i'och ta ajvalilale.