2 Reyes 10 - Bible in Tzotzil de Chenalhó with Deuterocanon

Li Jehue laj yulesbe scotol smomnich'nab li Acabe

¹ Li Acabe oy lajuneb xchanvinic (70) xnich'nab te ta Samaria. Li Jehue la sts'iba batel cartaetic; la stac batel ta Samaria ta stojol li j'abteletic, li moletic, xchi'uc ta stojol li boch'otic la sts'itesbeic xnich'nabtac li Acabe, jech laj yal batel:

² “Vo'oxuc ti te achi'uquic li xnich'nab ajvalil avu'unique xchi'uc li boch'otic yich'oj avu'unic li caretaetic, li ca'etic, li abtejebaletic yu'un sventa pleitoe, xchi'uc li boch'o sventainoj avu'unic li lum ti lec setbil ta coraltone, c'alal me ic'ot ta atojolic li cartae,

³ t'ujic ta ora boch'otic lec tsots yo'ntonic, lec xu' yu'unic li xnich'nab ajvalil avu'unique; iq'uic batel te ta spasubmantal li stote. Chapano abaic sventa chapoj aba achi'uquic”, xi.

⁴ C'alal laj ya'yique, toj ep ixi'ic, jech laj yalic: “¿Me vu'utic xa xu' cu'untic stsalel ec? yu'un muc' xich'ic stsalel yu'un li chib ajvaliletique”, xiic.

⁵ Ja' yu'un li jchabina yu'un ajvalile xchi'uc li boch'o tspas mantal te ta lume, li moletique xchi'uc li boch'otic la sts'itesbeic xnich'nab Acabe, jech laj yalbeic batel li Jehue: “Li vu'uncutique oyuncutic ta atojol; jun co'nton ta jch'uncutic li c'usi chavale. Mu'yuc ta jt'ujcutic yan ajvalil cu'uncutic. Paso li c'usi lec chava'ye”, xutic.

⁶ Te lic spas batel carta yan velta li Jehue, jech laj yal: “Me ta melel jun avo'ntonic ta jtojole xchi'uc me chach'unbicun li c'usi chcale, c'ocbeic sjol li xnich'nabtac ajvalil avu'unique. Oc'om jech ora chac li'i, la' q'uelicun li' ta lum Jezreele”, xut batel. Li lajuneb xchanvinic (70) xnich'nabtac ajvalile te xchi'uquic li boch'otic tsots yabtelic te ta lume, ja' li boch'otic its'itesatic yu'une.

⁷ C'alal ic'ot ta stojolic li cartae, te lic stsaquic li lajuneb xchanvinic (70) viniquetique; la sc'ocbeic sjol. Li sjolique laj yaq'uic ta mochetic; la staquic batel ta Jezreel.

⁸ C'alal ic'ot li boch'o tacbil batele, jech c'ot yalbe li Jehue: —Laj xa yich'beic tal sjol li xnich'nabtac ajvalile —xut. Li Jehue jech laj yalbe: —Bat tsopanic ta cha'tsop te ta yochebal lum; te oyuc c'alal to oc'om —xut.

⁹ Ta yoc'omal iloc' li Jehue, bat va'luc ta stojol scotol li israeletique, jech laj yalbe: —Li vo'oxuque mu'yuc amulic. Vu'un la jmil li ajvalil cu'untique. ¿Pero boch'o la smil li boch'otic li' oy sjolique?

¹⁰ Na'ic me, li c'usi yaloj Muc'ul Dios ta sventa li amomnich'nabtac Acabe persa laj yac' c'otuc ta pasel. Ja' stuc Muc'ul Dios la spas li c'usi laj ono'ox yal ta sventa li j'alc'op Elías, ja' li yajtunele —xi.

¹¹ Li Jehue la smilbe scotol li smomnich'nabtac Acab te oyic ta Jezreele, xchi'uc scotol li banquilaletic yu'une, xchi'uc li boch'otic lec sc'opan sbaic xchi'uque, xchi'uc li paleetic yu'une. Me junuc mu'yuc boch'o cuxul icom yu'un.

¹² Li Jehue ibat ta Samaria noxtoc. C'alal ixanov batele, te ic'ot ta snail sloc'ubil stsotsil xchij jchabichijetic.

¹³ Te la sta sbaic xchi'uc yuts' yalaltac li Ocozías, ajvalil ta Judae. Li Jehue jech la sjac'be: —¿Boch'ooxuc li vo'oxuque? —xut. Itac'ovic: —Ja' cuts' calal jbacutic xchi'uc li ajvalil Ocoziase, yu'un talem jc'opanbecutic li xnich'nabtaque xchi'uc li yalabtac me' ajvalil Jezabele —xiic.

¹⁴ Li Jehue jech laj yalbe li xchi'iltaque: —Tsaquic —xut. C'alal la stsaquique, te bat sc'ocbeic sjol ta nopol pozo yo' bu snail sloc'ubil stsotsil xchijic jchabichijetique. Ja' cha'vinic ta scotolic, pero me junuc mu'yuc cuxul la scomtsanic.

¹⁵ C'alal ixanov batel li Jehue, te la snup ta be li Jonadab, xnich'on Recabe. La sc'opan, jech laj yalbe: —¿Me lec avo'nton ta jtojol jech chac c'u cha'al lec co'nton ta atojol li vu'une? —xut. —Lec —xi itac'ov li Jonadabe. —Me melel xavale, ac'bun li ac'obe —xi li Jehue. Li Jonadabe laj yac' li sc'obe, jech te la snit muyel ta scareta,

¹⁶ jech laj yalbe: —Chi'inun batel; te chavil ti jun co'nton ta jpas c'usi tsc'an li Muc'ul Diose —xut. Jech te laj yic' batel ta scareta.

¹⁷ C'alal ic'ot ta Samaria li Jehue, la smilbe scotol li smomnich'nabtac Acab ti cuxulic toe. Laj yules o ta j'ech'el jech chac c'u cha'al yaloj ono'ox Muc'ul Dios ta sventa li j'alc'op Eliase.

Li Jehue la slajesbe o sc'oplal yich'el ta muc' li Baale

¹⁸ Li Jehue la stsob scotol li israeletique, jech laj yalbe: —Li Acabe jutuc no'ox laj yich' ta muc' li Baale, pero li vu'une xjelov to chquich' ta muc'.

¹⁹ Ja' yu'un li' ta orae tsobic tal scotol li j'alc'opetic, li jc'opojeletic, xchi'uc li paleetic yu'un Baale. Me junuc mu me boch'o xcom, yu'un jchapanoj lec milbil matanaletic ta sventa yich'el ta muc' li Baale. Me oy boch'o muc xtale, ac'o yich' milel —xi. Li Jehue ja' no'ox jech ilo'lavan ta sventa sbijil, yu'un jech ac'o uluc o scotol li boch'otic chich'ic ta muc' li Baale.

²⁰ Jech te lic yal mantal ti ac'o spasic junuc muc'ta q'uin ta sventa li Baale, jech la spasic.

²¹ Te lic stac batel mantal ta scotol israeletic. Scotol li boch'otic yich'ojic ta muc' Baale te ibatic ta xch'ulna scotolic. Me junuc mu'yuc boch'o icom yu'unic, jech inoj ta jyalel li ch'ulnae.

²² Li Jehue jech laj yalbe li boch'o sventainoj c'u'il ta sventa q'uine: “Loq'ueso tal scotol li c'u'iletic sventa yajtuneltac Baale”, xut. Li boch'otic sventainoje la sloq'ues tal.

²³ Li Jehue i'och ta yut xch'ulna Baal xchi'uc li Jonadab, xnich'on Recabe, jech laj yalbe li yajtuneltac Baale: —Q'uelic lec, me mu'yuc li' capal junuc li boch'otic yich'ojic ta muc' li Muc'ul Diose. Ja' no'ox ta jc'antic ac'o ochuc tal scotol li boch'otic yich'ojic ta muc' Baale —xut.

²⁴ C'alal i'ochic ta ch'ulna li yajtuneltac Baal sventa chaq'uic milbil matanal, xchi'uc chic'bil matanale, li Jehue te xa'ox scomtsanoj ta pat ch'ulna chanvinic (80) viniquetic, jech laj yalbe: —Me oy boch'o chjatov loq'uel yu'un junuc li viniquetic ti cac'ojboxuc ta ac'obique, ta stoj ta xch'ich'al —xut.

²⁵ C'alal laj yo'ntonic ta xchiq'uel matanale, li Jehue jech laj yalbe mantal li banquilaletic xchi'uc li banquilal soldadoetic yu'une: —¡Ochanic, milic scotol. Mu me xjatov loq'uel junuc avu'unic! —xut. Jech i'och smilic ta espada scotol. Lic xjochanic loq'uel ti c'alal icham yu'unique. Ts'acal i'ochic batel ta yutil to yo' bu va'ajtic li Baale.

²⁶ La sloq'uesic li sloc'obaltac sdiosic te ta ch'ulnae; la xchiq'uic ta c'oc'.

²⁷ Xchi'uc la slilinic li Baale; la sjinesbeic noxtoc li scajleb smotone xchi'uc li xch'ulnae. Icom ta tsanubaltic yu'unic; ja' jech o c'alal to tana.

²⁸ Ja' jech la slajesbe sc'oplal yich'el ta muc' Baal te ta stojol israeletic li Jehue.

²⁹ Ac'o me jech la spas li Jehue, pero co'ol ono'ox la spas jech chac c'u cha'al la spas li Jeroboam, xnich'on Nabat ti laj yac'be sa' smul li israeletique, yu'un laj ono'ox yich' ta muc' li sloc'obal ch'ium tot vacaxetic pasbilic ta c'anal taq'uin te oy ta Betel xchi'uc ta Dane.

³⁰ Li Muc'ul Diose jech laj yalbe li Jehue: “Ta sventa ti lec c'usitic laj apase, ti ja' laj apas c'usi lec chquile yu'un laj amilbe scotol li smomnich'nabtac Acab jech chac c'u cha'al jnopoj ono'oxe, ja' yu'un ta xcac' ochuc o ta ajvalilal te ta Israel anich'nab c'alal to ta xchanc'olal amomnich'nab”, xut.

³¹ Ac'o me jech i'albat, pero mu'yuc ono'ox tsots sc'oplal laj ya'ay ta yo'nton chch'un li mantaletic yu'un Muc'ul Dios, ja' li Dios yu'un Israele. Yu'un ja' co'ol la spas jech chac c'u cha'al la spas li Jeroboam ti laj yac'be sa' smulic li israeletique.

³² C'alal ja'o jech ic'ot ta pasele, li Muc'ul Diose laj yac' bic'tajuc yosilal li israeletique. Ja' yu'un li Hazaele la snet' tal li israeletique. Laj yich' li banamil te ta nopol sts'aquil yosilalique.

³³ Te lic yich' ta uc'um Jordán ta stuq'uil sloq'ueb c'ac'al xchi'uc scotol yosilal Galaad, yosilal Gad, Rubén, xchi'uc Manasés. Xchi'uc laj yich' batel ta Aroer te ta uc'um Arnón c'alal ta Galaad xchi'uc ta Basán.

³⁴ Scotol li yantic sc'oplal Jehú xchi'uc li c'usitic yan ivu' yu'un spasele te ts'ibabil ta svunal c'usitic ic'ot ta pasel yu'un li ajvaliletic ta Israele.

³⁵ C'alal icham li Jehue, te bat yich' muquel ta Samaria. Ja' i'och ta xq'uexol jun xnich'on, Joacaz sbi.

³⁶ Li Jehue vaxquib xcha'vinic (28) jabil i'abtej ta ajvalilal ta lum Samaria te ta Israel.