2 Juan 1 - Bible in Tzotzil de Chenalhó with Deuterocanon

Patub o'ntonal

¹ Vu'un jcholc'opun, ta jc'opanot tal achi'uc li avalabe, vo'oxuc ti t'ujbiloxuc yu'un Diose. Ta melel lec jc'anojoxuc. Ma'uc no'ox vu'un ti lec jc'anojoxuque. Ja' jech sc'anojoxuc noxtoc li boch'otic laj xa xch'unic li sc'op Dios ti ja' melele.

² Lec jc'anojotcutic ta sventa li sc'op Dios ti ja' melele, yu'un li' oy ta co'ntontic ta sbatel osil.

³ Ac'o xc'uxubinoxuc li Dios Totile, xchi'uc li Jesucristoe, ja' li Xnich'on Jtotic Diose. Ac'o spasboxuc o ta jun avo'ntonic ta sventa li c'usi melele xchi'uc ta sventa ti jc'anoj jbatique.

Mantal ta sventa c'anvanej

⁴ Toj xcuxet co'nton c'alal laj quil jayibuc avalabtac ti ja' ta xch'unic c'usi melel jech chac c'u cha'al yalojbutic li Jtotic Diose.

⁵ Li' ta orae ta jc'anbot vocol ti ac'o jc'anan jbatic jcotoltique. Ma'uc ach' mantal ta jts'ibabot tal; ja' ono'ox li mantal laj ca'itic c'alal lic jch'untique.

⁶ Me ta jc'an jbatique, ja' ta jch'unbetic o smantal li Diose. Ja' jech li mantal ca'yojtic tal ta sliquebale, ja' ti ac'o jc'anan jbatique.

Sc'oplal jlo'lavanejetic li' ta banamil

⁷ Yu'un oy xa ep jlo'lavanejetic buyuc no'ox ta xanovic, mu xch'unic ti i'ay yich' sbec'tal li Jesucristoe. Li boch'o jech tspasique ja' jlo'lavanejetic, xchi'uc ja' yajcontratac Cristo.

⁸ Q'uelo me abaic li vo'oxuque, yu'un jech mu alticuc ch-ech' li cabtelcutic ta atojolique, jech chc'ot avich' lec amotonic.

⁹ Me oy boch'o xjelov to sna' xchanubtasvan scuyoj sbae, me mu ja'uc ta xch'un jech chac c'u cha'al ichanubtasvan li Jesucristoe, mu'yuc Dios ta stojol. Yan li boch'o ja' ta xch'un c'u x'elan ichanubtasvan li Jesucristoe, ja' oy ta yo'nton li Jtotic Diose xchi'uc li Nich'onile.

¹⁰ Me oy boch'o chc'ot ta atojolic ti mu jechuc ta xchanubtasvanic jech chac c'u cha'al ichanubtasvan li Jesuse, mu me xavotes ta anaic, xchi'uc “lec ti latale”, mu me xavuticuc.

¹¹ Yu'un li boch'o “lec ti latale”, xute, ta smaquibe li c'usi chopol ta spase.

Slajeb c'op

¹² Oy to ep c'usitic ta jc'an ta xcalboxuc tal, pero mu jc'an ta jts'ibaboxuc tal, yu'un ta jc'an ta xtal jq'ueloxuc jtuc, jech xu' ta jc'opan jbatic lec ta quetic, yu'un jech xcuxet no'ox co'ntontic.

¹³ Chabanucot la xalic yalabtac avix ti t'ujbil yu'un Diose.