2 Crónicas 9 - Bible in Tzotzil de Chenalhó with Deuterocanon

Li Salomone ay vu'lanatuc yu'un jun ajvalil ants liquem tal ta Sabá

¹ Li ajvalil ants ta Sabae laj ya'ay c'u x'elan puquem sc'oplal li ajvalil Salomone, jech ibat ta Jerusalén, bat spasbe preva; oy ep c'usi tsotsic tsc'an tsjac'be. Bats'i ep xchi'iltac yic'oj batel. Bats'i ep perfumeetic xcuchojic batel ta camelloetic, xchi'uc ep c'anal taq'uinetic, xchi'uc tonetic lec c'upilic sba. C'alal ic'ot ta stojol li Salomone, c'ot sjac'be scotol li c'usi oy ta yo'ntone.

² Pero li Salomone la stac' scotol li c'usi ijac'bate; me jbeluc mu'yuc c'usi ti muc sna' staq'uele.

³ Li ajvalil antse laj yilbe c'u x'elan sbijil li Salomone, xchi'uc laj yil c'u yutsil li na spasoje,

⁴ xchi'uc li ve'liletic ta sba xmexae, xchi'uc snaic li xchi'iltac ta abtele, xchi'uc c'u x'elan li smozotaque, xchi'uc li sc'u' spoq'uique, xchi'uc c'u x'elan sc'u' spoc' li j'ac've'liletique, xchi'uc li tec'ubal sventa chmuyic ta ch'ulna yu'un Muc'ul Diose. Jech toj ch'ayel ic'ot yo'nton.

⁵ Jech laj yalbe li ajvalile: “Ja' melel ti c'u x'elan ca'yoj ac'oplal te ta jlumal ta sventa li avabtele xchi'uc ti c'u x'elan abijile.

⁶ Muc to'ox jch'un, pero tana ta jch'un, yu'un lital jq'uel ta jsat jtuc. Ti c'u yepal ca'yoj c'u x'elan abijile, bats'i mu sta o'lol, yu'un bats'i ep jeloven avu'un ti c'u yepal yalojbicune.

⁷ Toj xcuxet no'ox yo'ntonic li avinictaque xchi'uc li amozotac ti li' oyic ta ats'el scotol c'ac'al cha'yic ti c'u x'elan abijil chac'opoje.

⁸ Ac'o ich'atuc ta muc' li Muc'ul Dios avu'une, yu'un lec laj yilot, jech la xchotanot ta achotleb sventa ajvalilal. Xchi'uc toj lec sc'anoj li israeletique; tsc'an ti j'ech'el lec chcom o li jun ta lum israeletique, jech la stic'ot ta ajvalilal yu'unic, yu'un jech tuc' ac'o apas mantal, xchi'uc tuc' ac'o chapanvanan”, xut.

⁹ Li ajvalil antse lic yac'be ta sc'ob ajvalil Salomón oxmil xchi'uc baluneb ciento xchi'uc oxvinic (3,960) kilo c'anal taq'uin, xchi'uc epal perfumeetic, xchi'uc tonetic ti lec c'upilic sbae. Mu'yuc ono'ox jech yepal perfumeetic oy yu'un israeletic jech chac c'u cha'al yepal laj yac'be Salomón li ajvalil ants ta Sabae.

¹⁰ Jech noxtoc li j'abteletic yu'un Hiram xchi'uc li j'abteletic yu'un Salomón ti laj yich'ic tal ep c'anal taq'uine laj yich'ic tal noxtoc sándalo te'etic xchi'uc tonetic ti lec c'upilic sbae.

¹¹ Li sándalo te'etique ja' la stunes Salomón c'alal la spasbe stec'ubal li ch'ulna yu'un Muc'ul Diose xchi'uc li spasubmantal stuque. Xchi'uc ja' la spas o ta arpa, ta muc'tic arpa. Mu'yuc ono'ox bu xilic jech te' te ta Judá jech chac c'u cha'al li sándalo te'e.

¹² Li ajvalil Salomone laj yac'be ajvalil ants ec li c'usi la sc'ane, ti lec laj yile. Ja' slecoj o li spacol laj yac'be li c'usi i'ich'bat tale. Ts'acal isut batel ta yosilal li ajvalil antse xchi'uc scotol li xchi'iltaque.

Ipuc sc'oplal xchi'uc sc'ulejal li Salomone

¹³ Li c'anal taq'uin laj yich' jujun jabil li Salomone oy van chib xcha'vinic ta mil (22,000) kilo.

¹⁴ Ja' mu'yuc tsacal ta venta li spatan jmanulajeletic, jchonolajeletique, xchi'uc li jxanubaletique. Jech noxtoc li ajvaliletic ta Arabia banamil xchi'uc li yantic ajvaliletic ta jujun banamile, laj yich'beic tal ep c'anal taq'uin li Salomone.

¹⁵ Li ajvalil Salomone laj yac' ta pasel lajunvinic (200) muc'tic smacubbail soldadoetic ta c'anal taq'uin. Li jujune yich'oj vaquib kilo c'anal taq'uin, lec tenbil.

¹⁶ Jech noxtoc laj yac' ta pasel vo'lajunvinic (300) bic'tal macubbailetic; li jujune ech'em jutuc ta oxib kilo c'anal taq'uin yich'oj. Te laj yac' ta spasubmantal yo' bu “Toyolaltic ta Líbano” sbie.

¹⁷ Laj yac' ta pasel noxtoc jun muc'ta chotlebal pasbil ta ts'uts'up tsemen; la xpix lec ta c'anal taq'uin.

¹⁸ Li chotlebale oy vaccoj stec'ubal, xchi'uc jun stec'ub yacan ajvalil pasbil ta c'anal taq'uin, xchi'uc jujun scajleb sc'ob ta jujujot xocon. Te ta sts'el li scajleb sc'obe oy cha'cot sloc'obal leonetic te cotajtic.

¹⁹ Te ta vaccoj tec'ubale oy lajcha'cot sloc'obal leonetic, jujucot ta jujujot tec'ubal. Mu'yuc bu jech yantic ajvalil spasojic lequil chotlebal jech chac c'u cha'al la spas li Salomone.

²⁰ Scotol li vasoetic yu'un ajvalile pasbilic ta puru c'anal taq'uin. Jech noxtoc li vasoetic, li platoetic te ta spasubmantal “Toyolaltic ta Líbano” sbie pasbilic ta puru c'anal taq'uin noxtoc. Me junuc mu'yuc bu pasbil ta saquil taq'uin, yu'un c'alal yorail cuxul li Salomone, ma'uc epal taq'uin li saquil taq'uine.

²¹ Yu'un li ajvalile oy barcoetic yu'un ti yalel muyelic ta Tarsis xchi'uc svinictac li ajvalil Hirame. Jun velta ta ox-ox jabil tsutic batel. Chich'ic batel c'anal taq'uin, saquil taq'uin, sts'uts'up tsemen, maxetic, xchi'uc te'tical cotstuluq'uetic, chc'ot yac'beic li Salomone.

²² Li Salomone ja' toj muc' ic'ot yu'un scotol ajvaliletic ta banamil ta sventa li sc'ulejale xchi'uc li sbijile.

²³ Scotol li ajvaliletic ta banamile tsc'an tsq'uelbeic sat li Salomone, yu'un tsc'an cha'ibeic c'u x'elan li sbijil ac'bil yu'un Diose.

²⁴ Jech scotolic laj yich'beic batel smoton ta jujun jabil. C'usiuc no'ox laj yich'ic batel, me pasbil ta saquil taq'uin, ta c'anal taq'uin, me c'u'iletic, me abtejebaletic sventa pleito, me ja' li c'usi lec muic yiq'ue, me ca'etic, o me mulaetic.

Li Salomone la xchon ep caretaetic xchi'uc ca'etic

²⁵ Li Salomone oy chanmil yavil ca'etic, xchi'uc yavil caretaetic yu'un, xchi'uc oy lajcha'mil (12,000) yajsoldadotac sventa chcajiic ta ca'. Te laj yac'an ta lumetic ti ja' sventa oe, xchi'uc oy te icomic ta Jerusalén sventa chtun yu'un stuc li ajvalile.

²⁶ Li Salomone la sventain scotol li ajvaliletic xlic ta Éufrates c'alal to ta yosilal filistaetic, xchi'uc c'alal to ta sts'aquil yosilal Egiptoe.

²⁷ Li Salomone bats'i ep saquil taq'uin la stsob te ta Jerusalén, busul no'ox jech chac c'u cha'al ton. Xchi'uc bats'i ep ch'ut te'etic jech chac c'u cha'al te'tical higoetic ta stenlejaltic.

²⁸ Li ca'etic yu'un Salomone te liquemic tal ta Egipto xchi'uc ta yantic banamil.

Icham li Salomone

²⁹ Scotol c'usitic la spas li Salomón ta sliqueb xchi'uc c'alal to ta slajebe, te ts'ibabil comel ta svun li j'alc'op Natán, xchi'uc ta svun li j'alc'op Ahías liquem ta Siloe, xchi'uc ta svunal c'usitic ic'ot ta pasel ti laj yal li j'alc'op Iddo ta scontra li Jeroboam xnich'on Nabate.

³⁰ Li Salomone cha'vinic (40) jabil i'och ta ajvalilal ta stojol scotol li israeletique.

³¹ C'alal icham li Salomone, te bat yich' muquel ta Lum yu'un David, ja' li stote. Ja' i'och comel ta xq'uexol ec li xnich'one, Roboam sbi.