2 Crónicas 8 - Bible in Tzotzil de Chenalhó with Deuterocanon

Sc'oplal yantic abteletic la spas Salomón

¹ C'alal i'ech' xa'ox jtob (20) jabil svu'el yu'un Salomón li xch'ulna Muc'ul Diose xchi'uc li spasubmantal stuque,

² lic xcha'pas noxtoc li lumetic ti i'ac'bat ta sc'ob yu'un Hirame. Te laj yac' naquiicuc li israeletique.

³ Ts'acal to li Salomone bat spas pleito xchi'uc li lum Hamat xchi'uc Sobae, jech la sventain o.

⁴ La xcha'pas noxtoc li lum Tadmor te ta xocol banamile xchi'uc li yantic lumetic te ta yosilal lum Hamate, ja' ti bu to'ox la stsob ep ve'liletique.

⁵ La xcha'pas noxtoc li lum Bet-horón ta cajal xchi'uc Bet-horón ta olone. Ja' li lumetic ti lec tsotsic pasbile, ti lec setbilic ta coraltone, xchi'uc ti oy lec smac yich'oj lec tsatsal taq'uinetique.

⁶ La xcha'pas noxtoc li lum Baalat, xchi'uc li yantic lumetic ti bu to'ox la stsob ve'liletique, xchi'uc li lumetic sventa caretaetic sventa pleitoe, xchi'uc li lumetic yu'un soldadoetic ti cajajtic ta ca' chbatic ta pleitoe. La smeltsan scotol li c'usitic oy ta yo'nton tspas te ta Jerusalén, ta Líbano, xchi'uc ta scotol li banamil yich'oj ta ventae.

^7-8 Scotol li boch'otic muc ja'uc israeletique, ja' li hetetic, amorretic, ferezetic, hevetic, jebusetic, ti ja' xa smomnich'nabic li boch'otic icomic ta milel yu'un li israeletique, i'ac'bat spasic tsots abtel yu'un li ajvalil Salomone. Ja' jech oyic o c'alal to tana.

⁹ Yan li israeletique muc x'ac'bat yabtelic jech chac c'u cha'al mozo. Ja' no'ox i'ochic ta soldado, ta pasmantal, ta banquilal soldadoetic, ta sventainel caretaetic, ta sventainel li soldadoetic cajajtic ta ca' chbatic ta pleitoe.

¹⁰ Li jpasmantaletic sventa abtel yu'un Salomone ja' oy o'lol yoxibal ciento (250) ta scotol.

¹¹ Li Salomone laj yic' loq'uel li stseb faraón te ta Lum yu'un Davide. Te bat yac' ta sna ti bu la spasbee. Yu'un la snop ti mu xu' te chnaqui yajnil ta spasubmantal li Davide, ja' li anima ajvalil yu'un Israele. Yu'un ti c'u smuc'ul banamil smacoj yo' bu tiq'uil li xcaxail smantal Muc'ul Diose ja' ts'u'iltasbil yu'un li Diose.

¹² Li Salomone lic xchic'be smoton Muc'ul Dios te ta scajleb ti yac'oj ta pasel te ta stuq'uil stentenaile.

¹³ Ja' jech c'ac'al laj yac' ti c'usi ora yaloj comel li Moisese. Ja' ta sc'ac'alil cuxub o'ntonal, xchi'uc ta sq'uinal ch-uninaj u,, xchi'uc ta yorail oxcoj muc'tic q'uinetic ta jun jabil: ja' ti c'alal tsve'ic pan mu'yuc yich'oj svolesubile, xchi'uc c'alal tspasic li q'uin yu'un Xemunaetique, xchi'uc li q'uin sventa ch-ochic ta yaxnaetique.

¹⁴ Jech noxtoc ja' la stsac batel ti c'u ono'ox x'elan ch-abtejic, tsjelilan sbaic ta abtel li paleetique, jech chac c'u cha'al xchapanoj ono'ox comel li anima stote, ja' li Davide. Yu'un jech ac'o spas lec yabtelic li paleetique. Li levietique ja' yabtelic chalbeic slequilal li Diose xchi'uc tscoltaic li paleetic c'usi tsc'an pasel yu'unic ta jujun c'ac'ale. Jech noxtoc li jchabi ti'naetique ja' jech la sjelilan sbaic o jech chac c'u cha'al chapal ono'ox comel yu'un li anima Davide, ja' li yajtunel Diose.

¹⁵ Li mantaletic yaloj comel David ta sventa li paleetique, ta sventa li levietique, xchi'uc ta sventa li yaviltac taq'uine ja' la xch'unic o scotol.

¹⁶ Scotol li c'usi oy ta sventa Salomone ic'ot ta pasel yu'un scotol. Jmoj ilic c'alal la sliquesbeic yaq'uel snacleb li ch'ulnae xchi'uc c'alal to ivu' o. Ja' yu'un li ch'ulna yu'un Muc'ul Diose lec ts'acal ivu' scotol.

¹⁷ Ts'acal to, li Salomone ibat ta lum Ezión-geber, xchi'uc ta lum Elat ta ti'nab te ta yosilal edometic.

¹⁸ Li ajvalil Hirame laj yac'be batel ep barcoetic li j'abteletic yu'une, xchi'uc la stac batel boch'otic lec sna' x'abtejic ta nab, xchi'uc boch'otic lec xotquinic li nabe. Ja' la xchi'inbeic batel j'abteletic yu'un li Salomone; ibatic ta Ofir. Jutuc xa mu sta vo'lajunmil (15,000) kilo c'anal taq'uin laj yich'ic tal, ja' c'ot yac'beic li ajvalil Salomone.