2 Crónicas 5 - Bible in Tzotzil de Chenalhó with Deuterocanon

¹ C'alal ivu' yu'un scotol li abtel sventa ch'ulna yu'un Muc'ul Dios li Salomone, lic stic' ochel scotol li c'usitic voc'bil ono'ox ta stojol Dios yu'un stot, ja' li Davide. La stic' ochel ta yavil te ta ch'ulna yu'un Dios noxtoc li saquil taq'uin, c'anal taq'uin, xchi'uc scotol li c'usitic yan jtuneletique.

Li Salomone laj yich' jelovel ta ch'ulna li xcaxail smantal Diose

² Li Salomone lic stsob te ta Jerusalén scotol li banquilaletic yu'un israeletique, li banquilaletic ta jujuchop sts'unubalique, xchi'uc li banquilaletic ta jujuchop sbiique, yu'un chbat yich'ic jelovel tal li xcaxail smantal Muc'ul Dios te ta Sión, ja' li Lum yu'un Davide.

³ C'alal yorail muc'ta q'uin yu'unic ta svucubal ue, la stsob sbaic scotol li israeletique xchi'uc li ajvalil yu'unique.

^4-5 Ital scotol li banquilaletic yu'un israeletique. Li levietic xchi'uc paleetique la stsaquic li caxae; laj yich'ic jelovel xchi'uc li ch'ulna pasbil ta nucule xchi'uc scotol li c'usitic te chtune.

⁶ Li muc'ta ajvalil Salomone xchi'uc scotol li israeletic te tsobolique te laj yac' sbaic ta stuq'uil li caxae; la smilic ep chijetic, tot vacaxetic. Bats'i ep ta jyalel li smoton Dios la smilique; mu xa stac' atel c'u yepal.

⁷ Li paleetique la stiq'uic ochel ta yut ch'ulna li caxae; te laj yaq'uic ta bats'i lequil ch'ul cuarto ta yolon xic' li sloc'obal querubinetique.

⁸ Lec xlich'anoj xiq'uic ta sba li caxae, smacojic lec li caxae xchi'uc li xq'uechubiltaque.

⁹ Li xq'uechubiltaque nat spasojic; jelovenic jutuc ta jujujot xocon li caxae. Lec xvinaj li sjoljol ta lequil ch'ul cuarto. Ja' no'ox ti mu'yuc boch'o chil tal ta amaq'ue. Ja' jech oy o c'alal to tana.

¹⁰ Te ta yut caxae ja' no'ox te oy li cha'pech ton ti la stic' Moisés c'alal te oyic ta vits Horebe., Ja' li cha'pech ton yo' bu ts'ibabil li c'usi la xchapan Muc'ul Dios ta stojol israeletic c'alal iloq'uic tal ta Egiptoe.

¹¹ Li paleetique iloq'uic ta lequil ch'ul cuarto. Li yan paleetic te oyique yac'oj sbaic ta lecubtasel scotolic, ac'o me ma'uc to oy ta sventaic li abtele.

¹² Li jq'uejimol levietique, ja' li Asaf, Hemán, Jedutún, xchi'uc yalab xnich'nabique, xchi'uc li yantic yuts' yalaltaquique te va'ajtic ta xocon scajleb smoton Dios ta stuq'uil sloq'ueb c'ac'al, slapojic lec sc'u'ic pasbil ta lino no. Te yich'ojic sepsep taq'uin, muc'ta arpa, xchi'uc biq'uit arpa. Te xchi'inojic noxtoc vaxacvinic (160) paleetic tsjupanic oq'uesetic.

¹³ Jech scotolic jmoj lic sjupanic li oq'uesetique; tsots lic q'uejinicuc sventa chich'ic ta muc', tstojbeic ta vocol li Muc'ul Diose. La sjupanic li yoq'uesique, xchi'uc la stijic scotol li yabtejebic sventa sonetic c'alal ja'o jech chq'uejinique: “Albeic slequilal li Muc'ul Diose, yu'un ja' toj lec yo'nton, yu'un sbatel osil mu xlaj o li c'uxubinel yu'une”, xiic. Ta ora no'ox inoj ta toc li ch'ulna yu'un Muc'ul Diose.

¹⁴ Li paleetique mu xa xu' ch-abtejic ta scoj li toque, yu'un inoj ta xojobal Muc'ul Dios li ch'ulnae.