2 Crónicas 4 - Bible in Tzotzil de Chenalhó with Deuterocanon

Sc'oplal c'usitic itun ta yut ch'ulna

¹ Laj yac' ta pasel noxtoc scajleb xchic'ubil smoton Dios ta bronce. Ja' baluneb metro snatil, baluneb metro sjamalil, o'lol yo'bal metro stayalil.

² La spas noxtoc jun muc'ta yavil vo' ta bronce; lec balbal la spas. Ja' o'lol yo'bal metro li sjamalil sti'e. Ja' chib metro xchi'uc cha'ch'ix xchi'uc oxc'ob li stayalile. Ja' o'lol xchanlajunebal metro li smuc'ule.

³ Ta yolon sti' yavil vo'e oy cha'coj sloc'obal vacaxetic. Ja' lajuneb ochem ta o'lol yoxch'ix snamal; ja' jech o ta joyob. Jmoj snitoj sba pasbil xchi'uc li yav vo'e.

⁴ Li yav vo'e nacal ta sba lajcha'cot vacax pasbil ta bronce. Li vacaxetique oxcot sq'ueloj batel ta norte, oxcot sq'ueloj batel ta sur, oxcot sq'ueloj batel ta sloq'ueb c'ac'al, oxcot sq'ueloj batel ta smaleb c'ac'al. Li yacanique ja' tic'ajtic batel ta yut. Ja' te chotol o li yavil vo'e.

⁵ Li yav vo'e jpach'lej li spimile. Li sti'e xelcantic sba jech chac c'u cha'al snacleb nichim. Ja' vaquib xchanvinic ta mil (66,000) litro xbelin.

⁶ La spas noxtoc yan lajuneb yav vo'etic. Vo'ob laj yac' ta stuq'uil bats'ic'ob, vo'ob ta stuq'uil ts'etc'ob. Ja' sventa tspoquic o li smoton Dios chaq'uique. Yan li muc'ta yavil vo'e ja' sventa te ch-atinic o li paleetique.

⁷ La spas noxtoc lajuneb candelero ta c'anal taq'uin; ja' co'ol la spas jech chac c'u cha'al ono'ox pasbile. Te laj yac' ta yut ch'ulna. Vo'ob laj yac' ta bats'ic'ob; vo'ob laj yac' ta ts'et.

⁸ La spas noxtoc lajuncot mexa; laj yac' ta yut ch'ulna noxtoc. Vo'ob laj yac' ta bats'ic'ob, vo'ob ta ts'et. La spas noxtoc vo'vinic (100) muc'tic tazaetic ta c'anal taq'uin.

⁹ La spas noxtoc amac' sventa paleetic, xchi'uc li muc'ta amac' sventa ch'ulnae, xchi'uc li smac sti'taque; la xpixan lec ta bronce.

¹⁰ Li muc'ta yav vo'e te la xvuchan ta sbats'i xocon ch'ulna ta xocon sur ta smaleb c'ac'al.

¹¹ Li Hirame ja' la spas ec li binetique, li palaetique, xchi'uc li muc'tic tazaetique. Jech ivu' yu'un Hiram li c'usitic la sc'an pasbel Salomón ta sventa li ch'ulna yu'un Diose.

¹² Scotol li abtel la spase ja' li chib natil oyetique, li st'ujumal sjol oyetique, li chajchajtaq'uinetic sventa smac li st'ujumal sjol oyetique,

¹³ xchi'uc li chanib ciento (400) ta bej caranatoetic sventa li chib chajchajtaq'uinetique. Ja' cha'chol caranatoetic laj yich' li jujun chajchajtaq'uine; ja' sventa tsmac o li svolvolil sjol chib oyetique.

¹⁴ La spasic noxtoc li lajuneb yavil vo'etique xchi'uc li lajuneb snaclebe,

¹⁵ li muc'ta yavil vo'e, li lajuncot vacaxetic snaclebinoje,

¹⁶ xchi'uc li binetique, li palaetique, li xluchubiltac ti'bole. Scotol li c'usitic la spas li jchanubtasvanej Hirame ja' ta puru ch'ulbil bronce la spas. Ja' la spasbe li Salomón ta sventa ch'ulna yu'un Muc'ul Diose.

¹⁷ Laj yunijes ta c'oc'; la stic' ta smorteal pasbil ta yi' te ta stenlejaltic ta uc'um Jordán ti cacal ta o'lol yu'un Sucot xchi'uc Seredatae.

¹⁸ Li Salomone bats'i ep c'usitic la spas ta bronce; mu xa albajuc c'u yalal bronce laj yich'.

¹⁹ Jech noxtoc laj yac' ta pasel scotol li c'usitic yan chtun te ta ch'ulnae: ja' li scajleb xchic'ubil pom pasbil ta c'anal taq'uine, li mexaetic sventa te chaq'uic o pan ta stojol Diose,

²⁰ li candeleroetique, xchi'uc sluzaltac pasbilic ta c'anal taq'uin te oy ta stuq'uil bats'i lequil ch'ul cuartoe. Yu'un ja' sventa tstsanic jech chac c'u cha'al albilic ono'oxe.

²¹ Ta lequil c'anal taq'uin la spasic noxtoc li xnichtaque, li sluzaltaque, xchi'uc li stsacubiltac c'usitic tstsaquique.

²² Jech noxtoc li xtuch'ubil sc'aq'uemal mechaetique, li muc'tic tazaetique, li muc'tic cucharaetique, li xchic'ubil pome, ta bats'i lequil c'anal taq'uin la spasic. Jech noxtoc li sti' ch'ulnae, li smac ti'naetic ta yute, li smac bats'i lequil ch'ul cuartoe, xchi'uc li smac mero ch'ulnae ta puru c'anal taq'uin la spasic.