2 Crónicas 3 - Bible in Tzotzil de Chenalhó with Deuterocanon

Lic sva'an ch'ulna li Salomone

¹ Li Salomone lic sjapu spasel li ch'ulna yu'un Muc'ul Dios te ta Jerusalén ta vits Moria ti bu ac'bil yil yu'un Dios li stote ja' li Davide. Ja' ti bu chapanbil xa ono'ox yu'un li David te ta yav smajubil strigo Ornán jebuseo vinique.

² Ja' la sliques spasel ta xchibal c'ac'al yochel xchibal u ta xchanibal jabil yochel ta ajvalilal.

³ Li snaclebtac ch'ulna laj yac' Salomone ja' jech chac li'i: vucub xcha'vinic (27) metro snatil, baluneb metro sjamalil.

⁴ Li stentenail ta ochebal yu'un ch'ulnae ja' baluneb metro snatil jech chac c'u cha'al sjamalil li ch'ulnae. Li stayalile ja' baluneb metro noxtoc. La smaquic ta bats'i c'anal taq'uin li yut xchi'uc ta spate.

⁵ Li yut ch'ul cuartoetique la smaquic lec ta tenalte' pasbil ta c'uc'tojetic; la xpixic lec ta lequil c'anal taq'uin, xchi'uc te la sloc'taic xanetic xchi'uc cadenaetic.

⁶ Li yut ch'ulnae la smaquic ta lequil tonetic ti lec c'upilic sbae. Li c'anal taq'uin la stunesique te liquem tal ta Parvaim.

⁷ Li ch'ulnae la xpixbeic ta c'anal taq'uin li sts'amte'ale, li yantic ste'eltaque, li spac'benale, xchi'uc li ti'naetique. Ta spac'benale puru sloc'obal querubinetic te la sloc'taic.

⁸ Jech noxtoc li yut bats'i lequil ch'ul cuartoe ja' baluneb metro snatil jech chac c'u cha'al sjamalil li ch'ulnae, xchi'uc baluneb metro sjamalil. Ts'acal la smac lec ta lequil c'anal taq'uin; ja' nopol jtob ta mil (20,000) kilo laj yich' ta scotol.

⁹ Li lavuxetic laj yac'beique ja' o'lol svaquibal cien (550) gramo yalal jujuch'ix. Li toyol luchlebale la smaquic lec ta c'anal taq'uin noxtoc.

¹⁰ Ta yut li bats'i lequil ch'ul cuartoe laj yac' ta loc'tael chib sloc'obal querubinetic pasbil ta te', pixbil lec ta c'anal taq'uin.

^11-12 Ti c'u snatil xiq'uic ta xchibalique ja' baluneb metro. Yu'un li jujun xiq'uique oy chib metro xchi'uc cha'ch'ix xchi'uc oxc'ob snatil. Li jujun xiq'uique t'ixemic ta jujujot pac'benal na; li yan jujun xiq'uique jmoj snupoj sba.

¹³ Li chib sloc'obal querubinetique lec lich'ajtic li xiq'uique; ja' baluneb metro ta scotol. Lec va'ajtic sq'uelojic li o'lol yut nae.

¹⁴ Laj yac' ta pasel noxtoc li veloe. Ja' yax'elantic sba, ic'ic'tic sba stsajal, bats'i tsoj, xchi'uc pasbil ta lino no. Te sloc'taojic sloc'obal querubinetic noxtoc.

Sc'oplal chib yoyal ti'ch'ulna

¹⁵ Ta ti'ch'ulnae la spasbeic chib yoyal; jutuc mu sta vaclajuneb (16) metro snatil jujun. Ja' sventa xlechlechil sjol li ch'ulnae. Li oyetique laj yac'beic st'ujumal ta sjol; ja' chib metro xchi'uc cha'ch'ix xchi'uc oxc'ob imuy yu'unic.

¹⁶ La spasic noxtoc cadenaetic sventa tsjoc'anic ta sjol li oyetique, xchi'uc la spasic sloc'obal caranatoetic; te la st'uyananic ta cadenaetic.

¹⁷ La sva'anic muyel li yoyal sjol ch'ulnae, jun ta ts'et, jun ta bats'ic'ob. Ta bats'ic'obe Jaquín laj yac'be sbi. Ta ts'ete Boaz laj yac'be sbi.