2 Crónicas 2 - Bible in Tzotzil de Chenalhó with Deuterocanon

Oy c'usi la xchapanic xchi'uc ajvalil Hiram li Salomone

¹ Li Salomone la snop ti chlic xa sva'an li ch'ulna yu'un Muc'ul Diose xchi'uc li spasubmantale.

² La st'uj lajuneb xchanvinic ta mil (70,000) viniquetic sventa ts-icatsinic, chanvinic ta mil (80,000) sventa chaanic ton ta te'tic, oxmil xchi'uc vaquib ciento (3,600) sventa chalic lec mantal.

³ Li Salomone jech laj yalbe batel li ajvalil Hiram te ta Tiroe: “C'uxubinun ec jech chac c'u cha'al laj apasbe li jtot Davide, yu'un laj atacbe tal ep ch'ut te'etic ti c'alal la sva'an li na bu chnaquie.

⁴ Yu'un li vu'une ja' ta jva'anbe xch'ulna li Muc'ul Dios cu'une. Ja' ch'ulna chcom o yu'un. Jech te ta jchic'becutic pom ta stojol, te ta jcholancutic o li pan ta stojole, xchi'uc ja' te ta jchic'becutic li smoton ta jujun sob, ta jujun mal c'ac'al, ta yorail ta jcux co'ntoncutic, ta yorail unin u, xchi'uc ta yorail muc'tic q'uinetic ta sventa Muc'ul Dios te ta Jerusalene, yu'un jech tsc'an ta jpascutic o vu'uncutic li israeluncutique.

⁵ Li Ch'ulna ti tsc'an ta jpase tsc'an lec muc', yu'un li Dios cu'uncutique ja' toj muc' yu'un scotol li yantic diosetique.

⁶ Mu'yuc boch'o xu' yu'un tsva'anbe sna li Diose, yu'un ta sbejel li vinajel ti toj muq'ue mu xu' chnaqui o. Li vu'une mu'yuc c'usi xu' cu'un ti ta jva'anbe snae; ja' no'ox ta jpas sventa te ta jchic'be o jutuc pom ta stojol sventa chquich' ta muc'.

⁷ Ja' yu'un tacbun tal junuc vinic ti lec sna' x'abtej ta c'anal taq'uin, ta saquil taq'uin, ta bronce, ta tsatsal taq'uinetic, ta poc' ic'ic'tic sba stsajal, ta bats'i tsajal poc', xchi'uc ta yax'elan poq'ue. Tsc'an ti lec sna' x'abtej jech chac c'u cha'al li jchanubtasvanejetic ch-abtejic cu'un ta Judá, xchi'uc li' ta Jerusalén ti la xchapan comel li jtot Davide.

⁸ Tacbun tal noxtoc li te'etic te ta Libanoe, ja' li ch'ut te'etique, li c'uc'tojetique, li sándalo te'etique. Yu'un li j'abteletic avu'une jna'oj ti sna'ic lec xtuch'el li te'etic ta Libanoe. Jech li' oyic ec li j'abteletic cu'une. Xu' tscolta sbaic,

⁹ yu'un jech ac'o xchapanbicun li epal te'etique. Yu'un li ch'ulna ta jpase tsc'an lec muc' xchi'uc bats'i lec c'upil sba.

¹⁰ Na'o me ti mu jechuc no'ox ch-abtejic cu'un li j'abteletic avu'une, li jtuch' te'etique. Ja' chcac'beic chanib millón xchi'uc chanib ciento ta mil (4,400,000) kilo trigo; ja' jech yepal chcac'beic noxtoc cebada, xchi'uc chcac'beic chanib ciento xchi'uc cha'vinic ta mil (440,000) litro ya'lel ts'usub, xchi'uc jech yepal chcac'beic aceite noxtoc”, xut.

¹¹ Li Hiram ajvalil ta Tiroe la stacbe batel jun carta li Salomone, jech laj yalbe batel: “Li Muc'ul Diose toj c'ux ta yo'nton li jteclum yu'une, ja' yu'un la stic'ot ta ajvalilal yu'unic”, xut.

¹² Jech to laj yal batel: “Ich'biluc ta muc' li Muc'ul Dios yu'un Israele, ja' ti la spas vinajel banamile, yu'un laj yac'be jun xnich'on li ajvalil Davide, lec bij, lec sna' snopel. Jech oy ta sventa tsva'anbe xch'ulna li Muc'ul Diose, xchi'uc li spasubmantal stuque.

¹³ Jech vu'un ta jtacbot tal jun vinic ti lec bije, ti lec sna' snopele; ja' Hiram-abi sbi.

¹⁴ Ja' yol jun ants liquem ta smomnich'nab Dan; ja' li' voq'uem ta Tiro. Ja' lec sna' x'abtej ta c'anal taq'uin, ta saquil taq'uin, ta bronce, ta tsatsal taq'uinetic, ta tonetic, ta te'etic, ta poq'uetic ic'ic'tic sba stsajal, ta yax'elantic sba, ta lino no, xchi'uc ta tsajal poc'. Jech noxtoc lec sna' sloc'tael c'usiuc no'ox, xchi'uc lec sna' spasbel senya scotol c'usiuc no'ox chc'anbat. Ac'o scolta sbaic xchi'uc li bijil viniquetic avu'une xchi'uc li bijil viniquetic yu'un atot Davide.

¹⁵ Ja' yu'un taco me tal li trigo, li cebada, li aceite, xchi'uc li ya'lel ts'usub laj avale.

¹⁶ Jech ec li vu'uncutique chbat jtuch'cutic te ta Líbano scotol li te'etic c'u yepal chtun avu'une. Ta xquich'cutic tal ta ba nab ta xcuchubil. Te chcac'cutic c'alal ta Jope. Vo'oxuc xa xtal avich'ic batel c'alal ta Jerusalén”, xut.

¹⁷ Li Salomone lic stsac ta vun c'u yepal li yanlum cristianoetic te nacajtic ta yosilal israeletique, ja'o ti c'alal stsacoj xa'ox ta vun ec li stote, ja' li Davide. Ja' la sta oxlajuneb xvaxacvinic ta mil xchi'uc vaquib ciento (153,600) ta scotol.

¹⁸ Ja' laj yac'be yabtel lajuneb xchanvinic ta mil (70,000) sventa ts-icatsinic, chanvinic ta mil (80,000) j'anaejtonetic, oxmil xchi'uc vaquib ciento (3,600) capuraletic sventa tsq'uel xchi'iltaquic.