2 Crónicas 12 - Bible in Tzotzil de Chenalhó with Deuterocanon

La spoj Judá li Sisaque

¹ C'alal laj yil ti inaqui o lec ta yabtel li Roboame, xchi'uc ti lec xu' yu'un laj ya'ye, la scomtsan xch'unbel smantal li Muc'ul Diose. Ja' jech la spas scotolic ec li israeletique.

² Ta sventa ti stoyoj sbaic ta stojol li Muc'ul Diose, jech ilic li Sisac ajvalil ta Egiptoe, tal scontrain li lum Jerusalene; ja' ta yo'bal jabil yochel ta ajvalilal li Roboame.

³ Ital xchi'uc jmil xchi'uc chib ciento (1,200) careta, oxvinic ta mil (60,000) soldadoetic cajajtic ta ca', xchi'uc bats'i ep yantic xchi'iltac iliquic tal ta Egipto. Ja' libiaetic, suquienetic, xchi'uc etiopiaetic. Mu stac' atel c'u yepal italic.

⁴ I'och ta sc'ob li lumetic ti lec tsotsic te ta yosilal Judae; ibat c'alal ta Jerusalén.

⁵ Li j'alc'op Semaiase ital sc'opan li Roboame xchi'uc li banquilaletic te ta Judae, yu'un ja'o te stsoboj sbaic ta Jerusalén ta scoj li Sisaque, jech c'ot yalbe: —Li Muc'ul Diose jech chayalboxuc: ‘Ta sventa ti laj acomtsanicune, jech ec li vu'une la jcomtsanoxuc ec; laj cac'oxuc ta sc'ob li Sisaque’, xi li Muc'ul Diose —xut.

⁶ Li banquilaletic yu'un israeletique xchi'uc li ajvalile la sbic'tajes sbaic, jech laj yalic: —Ja' melel c'usi chal li Muc'ul Diose —xiic.

⁷ C'alal laj yil Muc'ul Dios ti la sbic'tajes sbaique, la sc'opan yan velta li Semaiase, jech laj yalbe: “Ta sventa ti la sbic'tajes sbaique, mu'yuc ta xcaq'uic o ta ulesel; jutuc sc'an xlic jcoltaic. Mu'yuc ta jtunes li Sisac sventa chcac'be stoj smul li lum Jerusalene.

⁸ Pero chcomic ono'ox ta smozo yu'un ac'o abtejicuc yu'un, jech ac'o ya'yic c'u x'elan sjeloj sba li abtel cu'un xchi'uc li mozoinel yu'un ajvaliletic ta yantic banamiletique”, x'utat yu'un Muc'ul Dios li Semaiase.

⁹ I'och ta Jerusalén li Sisac ajvalil ta Egiptoe. Laj yich'be scotol li sc'ulejal xch'ulna Muc'ul Diose xchi'uc li sc'ulejal spasubmantal ajvalile; scotol laj yich' batel. Laj yich' batel noxtoc li macubbailetic pasbilic ta c'anal taq'uin yu'un Salomone.

¹⁰ Li ajvalil Roboame laj yac' ta pasel yan xq'uexol li macubbailetique; ja' pasbilic xa ta bronce. Ja' laj yac'be xchabi li soldadoetic ti chchabibeic sti' spasubmantal ajvalile.

¹¹ C'alal chbat ta ch'ulna jujun velta li ajvalile, chi'inbil batel yu'un li boch'o chchabibe sti' spasubmantale, xchi'uc chiq'uic sutel noxtoc te ta snail li soldadoetique.

¹² Ta sventa ti la sbic'tajes sba li Roboame, jech ilaj sc'ac'al yo'nton ta stojol li Muc'ul Diose, jech muc x'ulesat o ta j'ech'el. Jech noxtoc te ta Judae lec ibat li c'usitic la spasique.

¹³ Li Roboame laj yich' lec stsatsal te ta Jerusalén; jech la stsac o batel li yabtel ta ajvalilale. Yich'oj xa'ox jun yoxvinic (41) jabil ti c'alal lic stsac yabtele. Vuclajuneb (17) jabil i'och ta ajvalilal ta Jerusalén, ja' li jun lum la st'uj Muc'ul Dios ta stojol scotol jaychop israeletique, yu'un ja' yavil icom o ti bu xu' ch-ich'at ta muq'ue. Li sme' Roboame Naama sbi; liquem ta Amón.

¹⁴ Li Roboame chopol yabtel. Muc ja'uc laj yac' yo'nton sa'el li Muc'ul Diose.

¹⁵ Scotol c'usitic la spas li Roboam ta sliqueb c'alal ta slajebe te ts'ibabil ta svun li j'alc'op Semaiase xchi'uc ta svun j'alc'op Iddo yo' bu ts'ibabil ta jujuchop sbiique. Li Roboam xchi'uc Jeroboame scotol c'ac'al oy pleito yu'unic o.

¹⁶ La sta yorail icham li Roboame; te bat yich' muquel yo' bu Lum yu'un David xi sbie. Ts'acal ja' i'och ta xq'uexol li xnich'on Abiase.