2 Crónicas 10 - Bible in Tzotzil de Chenalhó with Deuterocanon

Ja' smelol c'alal la svoc' sbaic ta cha'voc' li israeletique

¹ Li Roboame ibat ta Siquem, yu'un ja' te tsobol scotol israeletic sventa chtic'at ta ajvalilal.

² Li Jeroboam xnich'on Nabat ti jatoven batel ta Egipto yu'un li Salomone, laj ya'ay li c'usi chc'ot ta pasele, jech isut tal ta Egipto.

³ La staquic ta iq'uel, jech ja' ibat xchi'inic scotol israeletic ta sc'opanel li Roboame. Jech c'ot yalbeic:

⁴ —Li atote toj tsots la smozoinuncutic. Ja' yu'un li' ta orae yochbuncutic jutuc cabtelcutic li vo'ote, jech xu' li' chituncutic o ta atojol ec, yu'un xco'laj xchi'uc alal icatsil ta cuchel chca'icutic li c'usi spasojbuncutic atote —xutic.

⁵ Itac'ov li Roboame: —Sutanic to batel; ja' to xatalic ta oxib c'ac'al —xut. Jech isutic batel.

⁶ Li Roboame lic sjac'be c'usi lec ta pasel li moletic ti itunic yu'un li anima stot c'alal cuxul to'oxe, jech la sjac'be: —¿Avocolicuc, coltaicun c'uxi ta jtac'be xana'ic li jchi'iltactic le'e? —xut.

⁷ Jech laj yalic: —Me lec chac'opan li viniquetic le'e, me chapasbe li c'usi lec cha'yique, xchi'uc me lec chatac'beique, jech jun yo'ntonic xu' chtunic o li' ta atojol —xiic.

⁸ Pero li Roboame muc xich'be ta muc' c'usi laj yalic li moletique. Jech ja' lic sjac'be li queremetic ti co'ol ich'iic xchi'uque, ti te chtunic yu'une.

⁹ Jech la sjac'be: —¿C'uxi ta jtac'be xana'ic li jchi'iltactic ti tsc'anic ta jsayubtasbe jutuc li yicatsic ac'bilic comel yu'un jtote? —xut.

¹⁰ Itac'ovic li queremetique: —Ja' jech xatac'be chac li'i: ‘Li jxut c'obe ja' xjelov syijil jech chac c'u cha'al yo' li jtote.

¹¹ Me toj ol avicatsic laj yac'boxuc li jtote, li vu'une xjelov to yalal chacac'boxuc. Me nucul no'ox laj yac'boxuc li jtote, li vu'une chacac'boxuc lec chicote ti oy lec staq'uinal sni'e’, uto —xiic.

¹² Ta yoxibal c'ac'al italic li Jeroboam xchi'uc scotol israeletique, yu'un jech ono'ox albilic yu'un li Roboame.

¹³ Pero li ajvalil Roboame toj tsots la stac'be; muc ja'uc laj yich'be ta muc' sc'opic li moletique.

¹⁴ Ja' laj yalbe jech chac c'u cha'al laj yalic li queremetique, jech laj yalbe: “Me ol avicatsic laj yac'boxuc li jtote, li vu'une xjelov to yalal chacac'boxuc. Me nucul laj yac'boxuc li jtote, chicote lec chacac'boxuc ti oy lec staq'uinal sni'e”, xut.

¹⁵ Li ajvalile muc xich'be ta muc' sc'opic li israeletique, yu'un jech la sc'an li Diose. Yu'un ac'o c'otuc ta pasel c'usi laj yal Muc'ul Dios ta sventa li Jeroboam xnich'on Nabat ti c'alal la xch'amanbe ye li Ahías silo vinique.

¹⁶ C'alal laj yil scotol israeletic ti muc x'ich'batic ta muc' sc'opic yu'un li ajvalile, jech laj yalbeic: “Me jutuc mu'yuc c'usi ta jna'becutic li Davide. Mu'yuc c'usi oy cu'untic te ta stojol xnich'on Isaí. Vu'utic li israelutique, sutcutic batel ta jnatic ta jujuntal. Ac'o sventain yalab xnich'nab stuc li Davide”, xiic. Jech ta ora isutic batel ta snaic scotol li israeletique.

¹⁷ Li yantic israeletic ti te nacajtic ta lumetic yu'un Judae ja' ajvalil icom yu'un li Roboame.

¹⁸ Li ajvalil Roboame la stac batel ta tijvinic li Adorame, yu'un ja' oy ta sventa li abtel ti persa chich' pasele. Pero li israeletique la smilic ta ton. Ja' yu'un li ajvalil Roboame imuy ta scareta ta ora; ijatov batel ta Jerusalén.

¹⁹ Ja' jech la svoc' sbaic o israeletic ta stojol li yalab xnich'nab Davide. Ja' jech oyic o c'alal to tana.