2 Corintios 13 - Bible in Tzotzil de Chenalhó with Deuterocanon

¹ Li'i ja' xa yoxibal velta ti chtal jq'ueloxuque. Li c'op tsc'an chapanele, ta chib oxib testigo no'ox xu' chchapaj.

² Laj calboxuc ono'ox ava'yic c'usi chc'ot ta pasel, pero ta jts'ibaboxuc tal yan velta jech chac c'u cha'al laj ono'ox calboxuc c'alal ay jq'ueloxuc xchibal veltae. Jech laj calboxuc: “Li boch'otic oy ono'ox smulique xchi'uc li yantic ti chlic sa' smulique, me jech tspasic o c'alal chital yan veltae, mu'yuc xa ta jts'icbeic”, xacutoxuc.

³ Yu'un chac'an ono'ox chaq'uelic me ta melel ja' Cristo chc'opoj ta jventae. Pero li Cristoe mu c'unuc tspas ta atojolic; chac' ta ilel lec ta atojolic ti tsots svu'ele.

⁴ Ta melel mu'yuc stsatsal ti c'alal ijoc'anat ta cruze, pero tana cuxul ta sventa svu'el li Diose. Ja' no'ox jech ec li vu'uncutique mu'yuc jtsatsal chi'ilatcutic, pero ta sventa ti jun c'otemuncutic xchi'uque, co'ol cuxuluncutic ta sventa svu'el Dios ta atojolic.

⁵ Nopo lec ava'ay atuquic me jun avo'nton ach'unojique; a'yo lec aba ava'ay atuquic c'u xa'elanic. Tsc'an chana'ic me ta melel te oy ta atojolic li Cristoe, o me solel mu'yuc o.

⁶ Ta jch'un ti chlic ana'ic ti mu nacauc chcalcutic ti li' oy Cristo ta jtojolcutic li vu'uncutique.

⁷ Ta jc'opancutic Dios ta atojolic ti mu me xc'ot ta pasel c'usi chopol avu'unique. Yu'un ma'uc ta jc'an lec ac'o ilatcuncutic li vu'uncutique. Ja' ta jc'ancutic ti ac'o apasic c'usi lec li vo'oxuque, yu'un jech lec cha'ilatic, ac'o me vu'uncutic mu'yuc lec chi'ilatcutic.

⁸ Yu'un ti bu melel chbat chquilcutique, mu'yuc c'usi ta jpascutic sventa ta jcontraincutic. Ja' no'ox oy ta co'ntoncutic ta jtuq'uibtascutic batel ti bu mu meleluc chbate.

⁹ Jech xcuxet no'ox co'nton ti vu'uncutic mu'yuc jtsatsalcutique, yu'un vo'oxuc oy atsatsalic. Yo'to ta jc'opancutic Dios ta atojolic, yu'un ac'o lecubanic batel.

¹⁰ Ja' yu'un ba'yuc ta jts'ibaboxuc tal ta carta ti c'alal nom to oyune, yu'un jech mu me xc'ot jtunes ta atojolic stsatsal li cabtel quich'oje. Li cabtel yac'ojbun Cajvaltique ja' sventa ta jtsatsubtasoxuc; ma'uc sventa ta jsoquesoxuc.

Slajeb xa la staq'ui batel jch'unolajeletic li Pabloe

¹¹ Quermanotac, slajeb li c'usi chacalboxuc tale. Cuxetuc no'ox avo'ntonic, tuq'uibtaso abaic, patbo aba avo'ntonic, co'oluc c'usi chanop acotolic, junuc xa avo'ntonic. Li Dios ti stalel chc'anvane xchi'uc ti tsc'an jun no'ox co'ntontique, te chaxchi'inoxuc o.

¹² C'opano lec abaic ta jujuntal; ts'uts'o abaic ta sventa Cajvaltic.

¹³ Chabanuc xayalboxuc tal scotol li yu'untac Dios li'i.

¹⁴ Te ac'o comuc o ta atojolic li c'uxubinel yu'un Cajvaltic Jesucristoe, xchi'uc li c'anel yu'un Diose, xchi'uc li chi'inel yu'un Ch'ul Espiritue.