1 Tesalonicenses 4 - Bible in Tzotzil de Chenalhó with Deuterocanon

Lec chil Dios me lec c'usi ta jpastique

¹ Quermanotac, oy to c'usi chacalboxuc tal. Ta jc'anboxuc vocol ta atojolic, ta jtaq'uioxuc ta sventa li Cajvaltic Jesuse, jech me xapasic o batel jech chac c'u cha'al laj achanic ta jventacutique, yu'un ja' no'ox jech tsc'an chapasic o, jech lec chil li Diose. Ech'em to jech tsc'an chapasic batel.

² Yu'un xana'ic lec c'usi chanubtasel laj calcutic comel ava'yic ta sventa li Cajvaltic Jesuse.

³ Yu'un li c'usi oy ta yo'nton Diose, ja' ti ac'o lecubanic batele, ti ac'o acomtsanic li mulivajele.

⁴ Jujunoxuc tsc'an ac'o ana'ic lec c'u x'elan chaventain abec'tal atuquic; tuc' xapasic ta stojol, ich'ic me ta muc'.

⁵ Mu me ja'uc no'ox xapas c'usi tsc'an abec'talic jech chac c'u cha'al tspasic li boch'otic mu xotquinic Diose.

⁶ Mu me boch'o xavac'beic svocol, mu me boch'o xalo'laic ta sventa li mulil le'e. Yu'un ta me spac sutel stuc li Cajvaltique jech chac c'u cha'al calojcutic xa ono'ox ava'yique.

⁷ Yu'un muc ic'biluticuc yu'un Dios sventa ac'o jpastic c'usi tsc'an jbec'taltic; ja' ic'bilutic sventa ac'o lecubcutic batel.

⁸ Me oy boch'o ja' no'ox tsna'le li mantal li'i, muc ja'uc cristiano tsna'le; ja' tsna'le li Dios ti laj yac'butic li Ch'ul Espiritue.

⁹ Ta sventa ti tsc'an chac'anan abaique, mu xa persauc ta jts'ibacutic tal ava'yic. Yu'un achanojic xa lec atuquic ta sventa Dios ti chac'anan abaique.

¹⁰ Xchi'uc ac'anojic noxtoc scotol li jch'unolajeletic ta scotol avosilalic ta Macedonia banamile. Pero ta jc'anboxuc vocol ta atojolic quermanotac, ti ech'em to jech ac'o apasic batele.

¹¹ Ja' me tsotsuc sc'oplal chava'yic ti jun avo'nton lamaloxuque. Ja' no'ox ac'beic yipal spasel li c'usi tsc'an pasel avu'unique. Abtejanic jech chac c'u cha'al laj calboxuc comele.

¹² Yu'un jech lec cha'ilatic yu'un yan cristianoetic, yu'un mu ja'uc chapat avo'ntonic ta stojol yan.

Sc'oplal chcha'tal Cajvaltic

¹³ Quermanotac, ta jc'ancutic noxtoc ti ac'o ana'ic c'usi chc'ot ta pasel ta stojol li boch'otic chamenic xae, yu'un jech mu xavat avo'ntonic jech chac c'u cha'al li boch'otic mu'yuc c'usi tsmalaique.

¹⁴ Yu'un me jch'unojtic ti icham li Jesuse xchi'uc ti icha'cuxie, ja' no'ox jech ec li boch'otic oyic ta stojol Jesús c'alal chchamique, ta x'ic'atic batel yu'un Dios c'alal chtal li Jesuse.

¹⁵ Ja' yu'un chcalcutic ava'yic c'usi laj yal li Cajvaltique: Vu'utic ti cuxulutic toe, me jech li' to cuxulutic o chvul stautic li Cajvaltique, muc vu'uticuc ba'yuc chijelovutic batel yu'un li jch'unolajeletic ti chamenic xae.

¹⁶ Yu'un c'alal chyal tal ta vinajel stuc li Cajvaltique, oy boch'o tsots ch-avan tal, tsots chal mantal. Tsots ch-avan tal li banquilal yaj'almantal Diose, xchi'uc chca'itic oq'ues noxtoc. Jech li boch'otic xch'unojic Cajvaltic c'alal chchamique, ja' ba'yuc ta xcha'cuxiic.

¹⁷ Me jech to cuxulutic chvul stautic o vu'utic ti comenutic toe, co'ol chijcuchat muyel ta toc jchi'uctic, yu'un jech co'ol chbat jtatic li Cajvaltic te ta toyole, jech te ta jchi'intic o sbatel osil.

¹⁸ Ja' yu'un muq'uibtasbo aba avo'ntonic ta sventa li c'op li'i.