1 Samuel 9 - Bible in Tzotzil de Chenalhó with Deuterocanon

I'och ta ajvalilal li Saule

¹ Oy jun vinic liquem ta Benjamín, lec tsots yo'nton, Quis sbi. Ja' xnich'on Abiel; ja' smomnich'on Zeror. Li smuc'ta moltote ja' Becorat, xnich'on Afía. Li Quise lec ich'bil ta muc'.

² Oy jun xnich'on lec c'ac'al querem, Saúl sbi. Ta scotol li israeletique mu'yuc boch'o yan toj c'upil sba jech chac c'u cha'al li Saule. Me junuc xchi'iltac mu'yuc boch'o xjelov snatil; ta puru snecub no'ox xpaj scotolic.

³ Oy jun velta ich'ay sme' sburotac li Quise. Jech laj yalbe li xnich'one, ja' li Saule: —Ic'o batel junuc jmozotic, bat t'unic tal li sme' jburotique —xut.

⁴ Jech ibat li Saule. Ech' xtuch'ic li toyolaltic yu'un Efraine; te ijelovic batel ta yosilal Salisa, pero muc staic li sme' sburoique. Te ibatic noxtoc ta yosilal Saalim xchi'uc ta yosil Benjamín, pero muc staic te noxtoc.

⁵ C'alal ic'otic ta yosilal Sufe, li Saule jech laj yalbe li smozo te xchi'inoje: —Ja' lec sutcutic batel, yu'un li jtote oy yic'al toj ep chat yo'nton cu'untic jech chac c'u cha'al laj yat yo'nton ta sventa li me' buroetique —xut.

⁶ Itac'ov li smozoe: —Li' ta lume oy jun j'alc'op yu'un Dios lec ich'bil ta muc'. Scotol li c'usi chale persa chc'ot ta pasel yu'un. Bat jc'opantic; oy yic'al xu' chijyalbutic c'usi beal xu' ta jtamtic batel —xi.

⁷ Itac'ov li Saule: —Batic cha'e, pero ¿c'usi chquich'betic batel jutuc li vinique? Yu'un me junuc pan mu'yuc xa cu'untic; mu'yuc c'usi xu' ta jq'uelanbetic jutuc li j'alc'ope —xi.

⁸ Itac'ov li mozoe: —Oy cu'un jsep biq'uit saquil taq'uin. Xu' ja' chcac'betic li yaj'alc'op Diose yu'un jech ac'o stojobtasutic batel ta be —xi.

⁹ (Li israeletic ta vo'one c'alal oy c'usi chbat sjaq'uic ta stojol Diose, jech chalic: “Bat jq'ueltic li bijil vinique”, xiic. Yu'un ta vo'onee “bijil vinic”, xi sbi yu'unic li j'alc'op li' ta orae.)

¹⁰ Itac'ov li Saule: —Lec oy, bat jc'opantic —xi. Jech ibatic te ta lum yo' bu nacal li j'alc'op yu'un Diose.

¹¹ C'alal ja'o chmuyic batel ta muyeltic ta stuq'uil lume, te la snupic ta be tsebetic yu'un tal slup ya'alic, jech la sjac'beic: —¿Me ja' li' nacal ta lum li bijil vinique? —xutic.

¹² Itac'ovic: —Ja', pero le' to nacal ta jelovel lume. Ac'beic yipal batel yu'un yo' to te talem ta lum, yu'un ja' yorail tsmilbeic smoton Dios te ta ch'ulna.

¹³ C'alal cha'ochic ta lume, sa'ic ta ora ti c'alal mu'yuc to chbat ve'uc ta ch'ulnae. Yu'un li boch'otic te oyique, mu'yuc to chve'ic ja' to c'alal me ic'ot li vinique. Yu'un ja' oy ta sventa chac'be bendición ba'yuc li smoton Diose; ja' to xu' tsve'ic li boch'otic ic'bilique. Ja' yu'un ac'beic yipal batel ta ora; ja' yorail xu' te chataic —xiic.

¹⁴ Jech ibatic, imuyic batel ta stuq'uil li lume. C'alal te oyic ta yut lume, ja'o te iloc' tal ta stuq'uilic li Samuele yu'un chbat ta ch'ulna.

¹⁵ C'alal jun to'ox c'ac'al sc'an xc'ot li Saule, li Muc'ul Diose oy xa'ox c'usi laj yalbe li Samuele, jech laj yalbe:

¹⁶ “Oc'om jech ora chac li'i ta jtac tal jun vinic chlic tal ta yosilal Benjamín; ja' xamalbe aceite ta sjol yu'un ja' chlic spas mantal ta stojol li jteclumale, ja' li achi'iltac ta israelale. Ja' tscolta loq'uel ta sc'ob li filistaetique yu'un laj ca'ay ti ep chc'opojic ta jtojol li jteclum cu'une”, x'utat.

¹⁷ C'alal laj yil Saúl li Samuele, li Muc'ul Diose jech laj yalbe: “Li vinic li'i, ja' ti laj calbot sc'oplale. Ja' chlic sventain li jteclum cu'une”, xut.

¹⁸ C'alal te oy ta ti'lum li Samuele, li Saule inopaj batel bat sc'opan, jech laj yalbe: —Avocoluc albun bu oy sna li bijil vinique —xut.

¹⁹ Itac'ov li Samuele: —Vu'un li bijil vinicune. Muyanic tal li' ta ch'ulnae; la' chi'inicun ta ve'el. Oc'om chacalboxuc scotol li c'usi chac'an chajaq'uique, ja'o xu' chasutic batel.

²⁰ Li me' buroetic ch'ayem avu'unique, mu xavat avo'ntonic yu'un tabil xa. Jech noxtoc li boch'o toj lec c'anbil yu'un scotol israeletique, ja' vo'ot xchi'uc yalab xnich'nab atot —xut.

²¹ Itac'ov li Saule: —Pero vu'un liquemun ta jchop yu'un Benjamín, ja' li jchop toj biq'uit ta scotol jchi'iltactique. Xchi'uc vu'uncutic jchop jbicutic ti toj biq'uit ta scotol li yalab xnich'nab Benjamine. ¿C'u yu'un ti jech chavalbune? —xi.

²² Li Samuele laj yic' batel ta jun cuarto li Saúl xchi'uc smozoe. Ja' laj yac' chotluc ta ven lequil chotlebal; ja' mu sta jech xchotlebic li boch'otic te oyic ti oy van lajunebuc xcha'vinique.

²³ Li Samuele jech laj yalbe li jpasve'lile: —Ich'o tal li ti'bol laj cac'bot ac'o anaq'ue —xut.

²⁴ Li jpasve'lile ta ora laj yich' loq'uel tal sjeclijil snecub li vacaxe; te laj yac' ta stojol li Saule. Li Samuele jech laj yalbe: —Li' oy li ave'el ti voc'bil comele. Ich'o, ti'an, yu'un ja' avu'un la jvoc'bot comel li jun velta li'i. Yu'un jech ono'ox laj cal ti c'alal laj quic' scotol li jchi'iltactic li' ta lume —xut. Li Saule te ive' xchi'uc li Samuele.

²⁵ C'alal iyalic tal ta ch'ulnae, te ivulic ta lum. Te la xchapanic jun vaybal ta yamaq'uil jolna ta sventa li Saule.

²⁶ Li Saule te ivay. C'alal isacube, li Samuele laj yic' li Saúl te oy ta yamaq'uil jolnae, jech laj yalbe: —Lican me, tamo batel abe yan velta —xut. Li Saule ilic. Te iloq'uic batel ta xoral xchi'uc li Samuele.

²⁷ C'alal ja'o chyalic batel ta ti'iltic xae, li Samuele jech laj yalbe li Saule: —Ac'o jelovuc batel li amozoe. Li vo'ote malao to jliqueluc li'i, yu'un chacalbot ava'ay c'usi yalojbun li Diose —xut.