1 Samuel 8 - Bible in Tzotzil de Chenalhó with Deuterocanon

Li israeletique la sc'anic jun ajvalil yu'unic

¹ C'alal mol xa'ox li Samuele, ja' la stic' ta jchapanvanej yu'un israeletic li xnich'nabe.

² Li sba xnich'one Joel sbi. Li xchibale Abías sbi. Ja' jchapanvanejetic te ta Beerseba.

³ Pero li xnich'nabe muc xchanic jech chac c'u cha'al la spas li stotique. Ibat yo'ntonic yu'un taq'uin; muc xa tuc'uc xchapanvanic o ta scoj ti la xch'amic taq'uine.

⁴ Jech lic stsob sbaic scotol li banquilaletic yu'un israeletique, bat sc'opanic li Samuel te ta Ramae.

⁵ Jech c'ot yalbeic: “Li vo'ote molot xa. Pero li anich'nabe mu jechuc tspasic jech chac c'u cha'al chapase. Ja' yu'un va'anbuncutic junuc ajvalil cu'uncutic jech chac c'u cha'al oy ajvalil yu'un scotol li lumetique”, xutic.

⁶ Pero li Samuele muc lecuc laj ya'ay ti la sc'anic jun ajvalil yu'unique, jech te lic sc'opan li Muc'ul Diose.

⁷ Jech itac'bat yu'un li Muc'ul Diose: “A'ibo c'usi chasc'anbicot li achi'iltaque. Muc vo'cot ti chasbajicote; ja' vu'un chisbajicun, yu'un jech mu xa teuc ta jpas mantal ta stojolic.

⁸ Yu'un ja' ono'ox jech yabtelic o ti c'alal la jloq'uesic tal ta Egiptoe. Laj ono'ox scomtsanicun; ja' bat yich'ic ta muc' yan diosetic. Ja' yu'un jech chaspasbicot ec li vo'ote.

⁹ Ja' yu'un a'ibo me li sc'opique. Pero jamal xavalbe ya'yic ba'yuc c'usi tsc'an tspasic ta stojol li ajvalil yu'unic ti chlic ventainaticuque”, xi.

¹⁰ Li Samuele lic yalbe ya'yic scotol c'usi laj yal Muc'ul Dios li boch'otic tsc'anic ajvalil yu'unique.

¹¹ Jech laj yalbe: —Ja' jech chataic yu'un li ajvalil avu'unic ti chasventainoxuque: Chayic'boxuc li aqueremique; oy chac' batel ta ba'yucbe yu'un li caretaetic sventa pleitoe. Oy chac' cajiicuc batel ta ca'etic, xchi'uc oy tstic' ta jchabivanejetic yu'un stuc.

¹² Oy tstic' ta banquilal yu'un jmil (1,000) soldadoetic; oy tstic' ta banquilal yu'un lajuneb yoxvinic (50) soldadoetic. Li vo'oxuque chlic yac' alocbeic yosil, chlic atuch'beic strigo. Oy chlic ameltsanbeic yabtejeb xchi'uc c'usitic jtuneletic sventa scaretatac.

¹³ Chlic smozoinic ta abtel atsebetic noxtoc yu'un ja' ac'o ac'batuc sperfume, ac'o meltsanbatuc sve'el, ac'o ochuc ta paspan yu'un.

¹⁴ Ja' chich' scotol li lequil osiletic avu'unique, xchi'uc li ts'usubtic avu'unic ti ven lequique, xchi'uc li olivaetic avu'unique. Ja' chac'be ta sc'ob li j'abteletic yu'une.

¹⁵ Ja' chayich'boxuc li jujun ta lajlajuneb atrigoique xchi'uc li ts'usubetic avu'unique, yu'un ja' chac'be li j'abteletic yu'une xchi'uc li smozotaque.

¹⁶ Jech noxtoc chaspojboxuc li amozoic, li aquiaraique, xchi'uc ti bu toj lequic aburoic xchi'uc avacaxique; yu'un ja' chac' abtejicuc yu'un.

¹⁷ Ja' chich' scotol li jujun ta lajlajuneb achijique, xchi'uc c'alal ta vo'oxuc chlic smozoinoxuc.

¹⁸ Ta to xlic oc'anic ta stojol Muc'ul Dios ta yan c'ac'al ta scoj li ajvalil avu'unic chat'ujique, pero li Muc'ul Diose mu'yuc chaya'iboxuc ac'opic —xut.

¹⁹ Pero li israeletique muc xich'beic ta muc' c'usi laj yal li Samuele, jech laj yalic: —Jechuc. Li c'usi ta jc'ancutique ja' ti ac'o oyuc junuc ajvalil cu'uncutic

²⁰ jech chac c'u cha'al li yantic lumetique. Ja' ac'o sventainuncutic; ja' ac'o spasuncutic ta mantal; ja' ac'o yic'uncutic batel ta pleito —xiic.

²¹ C'alal laj ya'ay Samuel c'usi laj yalique, lic sc'opan Muc'ul Dios yan velta.

²² Jech itac'bat yu'un li Muc'ul Diose: —Ac'bo li c'usi chasc'anboxuque; t'ujbo junuc ajvalil yu'unic —x'utat. Ja' yu'un li Samuele laj yalbe ti ac'o suticuc batel ta slumalic jujunique.