1 Samuel 7 - Bible in Tzotzil de Chenalhó with Deuterocanon

¹ Jech ibatic li jnaclumetic ta Quiriat-jearime, bat yich'ic tal li xcaxail smantal Muc'ul Diose; te c'ot stiq'uic ta sna Abinadab ti luchul jutuc ta vitse. Laj yac'beic yabtel xnich'on li Abinadabe, Eleazar sbi, ja' la xchabi li caxae.

I'och ta jchapanvanej yu'un israeletic li Samuele

² C'alal i'ech' xa'ox jtob (20) jabil sc'otel ta Quiriat-jearim li caxae, scotol israeletic lic oq'uicuc ta sa'el li Muc'ul Diose.

³ Ja' yu'un li Samuele jech laj yalbe scotol li israeletique: “Me ta melel scotol avo'nton chasutic tal yan velta ta stojol li Muc'ul Diose, loq'uesic ta atojolic li yantic diosetic avu'unique xchi'uc li sloc'obaltac Astarote. Ja' no'ox ac'o avo'ntonic ta stojol li Muc'ul Diose; ja' no'ox stuc xavich'ic ta muc', jech chascoltaoxuc loq'uel ta sc'ob li filistaetique”, xut.

⁴ Ja' yu'un li israeletique la sloq'uesic li sdiosic Baaletic xchi'uc Astarote; ja' no'ox lic tunicuc yu'un li Muc'ul Diose.

⁵ Li Samuele jech lic yal: “Tsobo abaic acotolic te ta Mizpa. Vu'un ta jc'anbe vocol Muc'ul Dios ta atojolic”, xut.

⁶ Jech lic stsob sbaic te ta Mizpa. Te la slupic loq'uel vo'; la smalic ta stojol Muc'ul Dios. Laj yictaic ixim, jech laj yalic: “Laj xa jta jmulcutic ta stojol li Muc'ul Diose”, xiic. Ja' te ta Mizpa i'och ta jchapanvanej yu'un israeletic li Samuele.

⁷ C'alal laj ya'yic filistaetic ti te stsoboj sbaic ta Mizpa li israeletique, li banquilaletique ital scontrainic li israeletique. C'alal laj ya'yic li israeletique, ixi'ic.

⁸ Jech lic yalbeic li Samuele: “Mu me xacomtsan sc'anbel vocol Muc'ul Dios ta jtojolcutic, yu'un jech ac'o scoltauncutic loq'uel ta sc'ob li filistaetique”, xutic.

⁹ Li Samuele la stsac jcot unin chij ti ta to xchu'une; scotlijil la xchic'be smotonin li Muc'ul Diose. La sc'anbe vocol Muc'ul Dios noxtoc ta sventa li israeletique, i'aybat sc'op yu'un li Muc'ul Diose.

¹⁰ C'alal te chchic'be smoton Dios li Samuele, ja'o ic'otic li filistaetique, c'ot stsaquic ta pleito li israeletique. Pero li Diose laj yac' t'omuc chauc ta stojol li filistaetique jech ixi'ic; te tsalbil ic'otic o yu'un li israeletique.

¹¹ Iloq'uic batel ta Mizpa li israeletique; la snutsic batel li filistaetique; te to c'ot smilic ta yolon Bet-car.

¹² Li Samuele la stam ton; te la sva'an ta o'lol yu'un li Mizpa xchi'uc Sene. Li tone Eben-ezer laj yac'be sbi, yu'un jech laj yal: “Ja' to lic scoltautic yan velta li Muc'ul Diose”, xi.

¹³ Jech tsalbil icomic o li filistaetique; muc xa xbat ochicuc yan velta ta yosilal li israeletique. Ti jayib c'ac'al cuxul li Samuele, li Muc'ul Diose te ono'ox la scontrain o li filistaetique.

¹⁴ Li lumetic yu'un israeletic ti la spojic li filistaetique, xlic ta Ecrón c'alal to ta Gate, lic yu'uninic yan velta li israeletique. La spojic sutel scotol li yosilalic ti yich'ojic to'ox filistaetique. Xchi'uc ipaj pleito yu'unic li amorretic xchi'uc israeletique.

¹⁵ Ti jayib c'ac'al cuxul li Samuele, ja' jchapanvanej o yu'unic li israeletique.

¹⁶ Li Samuele scotol jabil ibat yaq'uilan velta ta Betel, ta Gilgal xchi'uc, ta Mizpa, yu'un bat xchapan c'opetic yu'un li israeletic te ta lumetique.

¹⁷ Te isutilan batel ta Ramá yu'un ja' te nacal. La xchapan noxtoc li israeletic te ta Ramae. Te la spasbe jun scajleb smoton Muc'ul Dios.