1 Samuel 4 - Bible in Tzotzil de Chenalhó with Deuterocanon

¹ Li Samuele laj yalbe scotol israeletic c'usi i'albat yu'un li Muc'ul Diose. Ja'o yorail italic li filistaetique, tal spasic pleito xchi'uc li israeletique. Jech iloq'uic batel ec li israeletique, bat spas scarpanaic ta Eben-ezer. Li filistaetique te la spas scarpanaic ta Afec.

Laj yich'beic batel xcaxail smantal Dios li filistaetique

² Jech lic spasic pleito xchi'uc israeletic li filistaetique. C'alal sbats'ilic pleitoe, ja' itsalatic li israeletique; imilatic chanmil (4,000) viniquetic te ta pasub pleito.

³ C'alal isutic ta scarpanaic li israeletique, li banquilaletic yu'unique jech laj yalic: “¿C'u yu'un laj yac'utic ta milel yu'un filistaetic li Muc'ul Diose? Ja' lec bat quich'tic tal li xcaxail smantal Muc'ul Dios te ta Siloe yu'un li' ac'o oyuc ta jtojoltic, jech xu' chiscoltautic loq'uel ta sc'ob li cajcontratique”, xiic.

⁴ Jech la staquic batel viniquetic ta Silo yu'un bat yich'beic tal xcaxail smantal li Muc'ul Dios ti tspas ta mantal scotol te ta vinajele, ti te nacal ta o'lol yu'unic li chib sloc'obal querubinetique., Li chib xnich'nab Elie, ja' li Ofni xchi'uc Fineese, te xchi'inojic batel li xcaxail smantal Muc'ul Diose.

⁵ C'alal ic'ot yu'unic xcaxail smantal Muc'ul Dios yo' bu scarpanaique, tsots i'avan scotol li israeletique; xnic to li banamil yu'unique, yu'un toj xcuxet no'ox yo'ntonic.

⁶ C'alal laj ya'yic filistaetic ti tsots i'avanique, jech laj yalic: “¿C'u yu'un toj xcuxet no'ox yo'nton ch-avanic te ta scarpanaic li hebreoetique?”, xiic. Ts'acal laj ya'yic ti yu'un laj xa yich'ic tal li xcaxail smantal Muc'ul Diose.

⁷ Jech lic xi'icuc, jech laj yalic: “Ital xa Dios te ta scarpanaic li israeletique. Toj abul jbatic, yu'un mu'yuc ono'ox baq'uin jech xc'ot ta pasel.

⁸ Toj abul jbatic. ¿Boch'o xu' chiscoltautic loq'uel ta sc'ob li Dios ti ech'em stsatsale? Yu'un ja' li Dios ti la smil ta tsatsal chamel li egiptoetic te ta xocol banamile.

⁹ Filistaetic, ich'o me lec avabtejebic cha'e. Tsots me vinic xapas abaic; ma'uc me xijcom ta smozo li hebreoetic jech chac c'u cha'al laj to'ox jmozointique. Batic, bat jpastic pleito”, xiic.

¹⁰ Li filistaetique lic spasic pleito; ja' itsalatic li israeletique. Ta jujuntal ijatovic sutel ta scarpanaic. Bats'i ep ilajic ta milel; ichamic lajuneb xcha'vinic ta mil (30,000) li israeletique.

¹¹ Xchi'uc laj yich'beic batel noxtoc li xcaxail smantal Diose, xchi'uc ichamic noxtoc li chib xnich'nab Elie, ja' li Ofni xchi'uc Fineese.

¹² Oy jun vinic liquem ta Efraín icol to batel. Ibat ta anil ta Silo; ic'ot ta jun no'ox sc'ac'alil. Sli'oj xa batel sc'u', yac'oj ep lum ta sjol.

¹³ C'alal ic'ote, li Elie te chotol ta ts'el ti'na tsmala me oy chc'ot a'yej ta stojol, yu'un ep chlo'ilaj yo'nton ta sventa li xcaxail smantal Diose. C'alal ic'ot ta lum li vinique, c'ot yal scotol li c'usi ic'ot ta pasele. Tsots i'avan scotolic.

¹⁴ C'alal laj ya'ay Elí ti tsots i'avanique, jech la sjac': —¿C'u yu'un ti tsots ch-avanique? —xi. Li vinique ital yalbe ta anil Elí li c'usi ic'ot ta pasele.

¹⁵ Li Elie yich'oj xa'ox vaxaclajuneb yo'vinic (98) jabil. Maquem xa'ox sat.

¹⁶ Jech vul yalbe: —Ja' to no'ox livul ta paspleito. Colel xa licol tal ta milel —xut. —¿C'usi ic'ot ta pasel un, totil? —xi li Elie.

¹⁷ Itac'ov li vinique: —Li jchi'iltactique ijatovic xa batel yu'un li filistaetique, xchi'uc bats'i ep xa ichamic ta jyalel. Ichamic xa ec li chib anich'nab, ja' li Ofni xchi'uc Fineese. Li xcaxail smantal Diose laj xa yich'ic batel noxtoc —xi.

¹⁸ C'alal laj yalbe sc'oplal xcaxail smantal Dios li vinique, li Elie ta javal ibalch'uj yalel ta xchotleb te ta xocon ti'na; toj c'asel ic'ot snuc', jech icham o, yu'un toj mol xa'ox xchi'uc toj juben. Cha'vinic (40) xa'ox jabil la sventain li israeletique.

¹⁹ Li yalibe, ja' li yajnil Fineese, oy xch'ut; po'ot xa'ox sc'an xcux. C'alal laj ya'ay ti laj yich'ic xa batel li xcaxail smantal Diose, xchi'uc ti icham xa li smol'alib xchi'uc smalale, te ilic o xc'uxul li xch'ute; ivoc' li yole.

²⁰ C'alal laj yilic boch'otic te oyic ti ta xa xcham li antse, jech laj yalbeic: “Mu xaxi'; laj xa avoq'ues jun querem”, xutic. Pero muc xa xtac'ov; muc xa stuc'ulan.

^21-22 Icabod laj yac'be sbi li quereme, jech laj yal: “Li israeletique mu'yuc ich'bil ta muc' icomic, yu'un laj xa yich'ic batel li xcaxail smantal Diose”, xi. Ti jech laj yale, ja' ta scoj ti ibat o li xcaxail smantal Diose, xchi'uc ti icham li smol'alib xchi'uc smalale.