1 Samuel 31 - Bible in Tzotzil de Chenalhó with Deuterocanon

Li Saule ichamic ta pleito xchi'uc xnich'nab

¹ Li filistaetique lic spasic pleito xchi'uc li israeletique, pero li israeletique ijatovic batel, xchi'uc ep imilatic te ta vits Gilboa.

² Li filistaetique la snutsic batel li Saúl xchi'uc xnich'nabe. Te la smilic o li Jonatán, xchi'uc Abinadab, xchi'uc Malquisúa, ja' li xnich'nab Saule.

³ Bat yac'beic noxtoc li Saule. Ep ta moj laj yac'beic flecha, jech toj ep ixi' li Saule.

⁴ Jech laj yalbe li j'ich'-abtejebal yu'une: —Loq'ueso avespada; milun o, yu'un jech mu ja'uc xtal smilicun li yanlum cristianoetic le'e, yu'un jech mu me xiyuts'intaicun —xut. Pero li j'ich'-abtejebale muc sc'an spas, yu'un ep ta xi'. Ja' yu'un li Saule la smil sba ta yespada stuc.

⁵ C'alal laj yil j'ich'-abtejebal ti icham xa li ajvalil yu'une, la smil sba ta yespada stuc ec, jech co'ol te ichamic o.

⁶ Ja' jech ora icham li Saule, xchi'uc li oxib xnich'nabe, xchi'uc li j'ich'-abtejebal yu'une, xchi'uc li svinictaque.

⁷ Scotol li israeletic te nacajtic ta jot vitse xchi'uc ta stuq'uil sloq'ueb c'ac'al yu'un uc'um Jordane laj yilic ti ijatovic batel scotol li yan israeletique, xchi'uc ti ichamic xa xchi'uc oxib xnich'nab li Saule, jech ijatovic batel ec. La scomtsanic li lumetic bu nacalique. Te ic'otic li filistaetique; ja' te inaquiic o.

⁸ Ta yoc'omal c'alal tal yich'beic batel c'usi oy yu'un animaetic li filistaetique, ja' to laj yilic te telajtic ta vits Gilboa li Saúl xchi'uc oxib xnich'nabe.

⁹ La sc'ocbeic sjol, xchi'uc laj yich'beic batel yabtejeb. La staquic batel j'almantaletic ta scotol yosilalic, yu'un ac'o bat yalbe ya'yic scotol xchi'iltaquic li c'usi lec ic'ot ta pasele, xchi'uc bat yalic ta sna sloc'obal diosetic yu'unic.

¹⁰ Te la stiq'uic ta xch'ulna Astarot li yabtejeb Saule, xchi'uc te la sjoc'anbeic ta scoraltonal lum Bet-sán li sbec'tale.

¹¹ C'alal laj ya'yic jnaclumetic ta Jabes te ta Galaad c'usi la spasbeic Saúl li filistaetique,

¹² lic stsob sbaic scotol li viniquetic ti lec tsots yo'ntonique. Sbejel ac'ubal ixanovic batel, bat yich'beic tal sbec'tal li Saule xchi'uc li oxib xnich'nab te joc'ajtic ta coralton yu'un Bet-sane. Jech isutic tal ta Jabes; te ivul xchiq'uic.

¹³ Ti c'u yepal icom ta c'aq'uele, te la smuquic ta Jabes ta yolon jpets te'. Te lic yictaic ixim vucub c'ac'al.