1 Samuel 30 - Bible in Tzotzil de Chenalhó with Deuterocanon

La stsal amalequetic li Davide

¹ C'alal ic'otic ta Siclag ta yoxibal c'ac'al li Davide, ja' to laj yilic ti te xa ochemic ta Néguev li amalequetique, xchi'uc ayem xa soquesic li lum Siclague; laj yac'beic comel sc'ac'al.

² La xchuquic batel scotol li antsetique; c'alal ta muc' ta biq'uit laj yiq'uic batel. Pero mu'yuc boch'o la smilic; tuc' no'ox laj yiq'uic batel.

³ C'alal ic'otic ta lum li David xchi'uc svinictaque, ja' to laj yilic ti c'aq'uem xa li lume, xchi'uc ti chucbilic xa batel li antsetique xchi'uc li squerem, stsebique.

⁴ Jech te lic oq'uicuc xchi'uc xchi'iltac li Davide, x'avetic no'ox ta oq'uel; te i'alub yo'ntonic ta scoj ti tsots i'oq'uique.

⁵ Te nabal ichucbat batel xchibal yajnil ec li Davide, ja' li Ahinoam liquem ta Jezreele xchi'uc li Abigail yajnil to'ox Nabal te ta Carmele.

⁶ Li Davide ep laj yat yo'nton, yu'un laj ya'ay ti tsc'an xa ch-ac'bat ton yu'un li svinictaque yu'un abul sba cha'yic ti ichucbatic batel xnich'nabique. Li Davide ja' xa no'ox la xch'un ti chcoltaat yu'un li Muc'ul Dios yu'une.

⁷ Jech laj yalbe li pale Abiatare, ja' li xnich'on Ahimeleque: —Avocoluc ich'bun tal li mocan c'u'ile —xut. Jech bat yac'be.

⁸ Li Davide ja' lic sjac'be o Muc'ul Dios c'usi xu' tspas: —¿Me xu' chbat jnuts li jtsob j'eleq'uetic le'e? ¿Me ta jta to xana'? —xut. Itac'ov li Muc'ul Diose: —Bat nutso. Ta to xata, xchi'uc te chacolta o tal li boch'otic chucbilic batele —xi.

⁹ Ja' yu'un li Davide ta ora ibatic xchi'uc li vaquib ciento (600) svinictaque; te ic'otic ta bevo' Besor. Ja' te icomic

¹⁰ chib ciento (200) viniquetic yu'un lubenic xa; mu xa xu' yu'unic xtuch'el li bevo'e. Yan li David xchi'uc chanib ciento (400) xchi'iltaque ibat ono'ox snutsic.

¹¹ Te la snupic ta be jun egipto vinic. Te laj yiq'uic batel ta stojol li Davide. Te laj yac'beic sve'el; laj yac'beic vo' yuch'.

¹² Laj yac'beic noxtoc juteb pan pasbil ta higo, xchi'uc chib pan pasbil ta taqui sat ts'usub. C'alal laj yo'nton ta ve'el li egipto vinique, itsatsub yo'nton, yu'un yoxibal xa c'ac'al mu'yuc c'usi la sve', mu'yuc c'usi laj yuch'.

¹³ Li Davide jech lic sjac'be: —¿Boch'o avajval? ¿Bu liquemot tal? —xut. Itac'ov: —Vu'un egipto vinicun. Vu'un smozoun jun Amalec vinic. Yoxibal xa c'ac'al li' la scomtsanun li cajvale yu'un li'ipaj.

¹⁴ Yu'un li'aycutic tal ta Néguev, ja' li yosilal ceretetic, judaetic, xchi'uc calebetique; ay quelc'anbecutic tal c'usitic oy yu'unic. Xchi'uc la jchic'cutic comel li lum Siclague —xi.

¹⁵ Li Davide jech la sjac'be: —¿Me xu' chavic'uncutic batel yo' bu oyic li j'eleq'uetique? —xut. Itac'ov li egipto vinique: —Me chavalbun ta jamal ta stojol Dios ti mu xamilicune xchi'uc ti mu xavac'un comel ta sc'ob li cajvale, xu' chaquic'oxuc batel —xi.

¹⁶ Jech laj yic' batel yo' bu oyic li j'eleq'uetique. Jun yo'nton te spucoj sbaic ta jamalaltic; te tsve'ic, chuch'ic, tspasic o q'uin xchi'uquic li c'usitic laj yelc'anic batel ta yosilal filistaetique xchi'uc ta yosilal Judae.

¹⁷ Li Davide lic smil scotol. Sob to'ox la sjapuic; te oyic o c'alal to imal c'ac'al. Solel laj yulesic scotol; ja' xa no'ox ivu' to yu'un ijatovic batel li chanib ciento (400) queremetic cajajtic ta scamelloique.

¹⁸ Li Davide la spoj sutel scotol li c'usitic yelc'anojic batele xchi'uc li chib yajnil ic'bil batele.

¹⁹ Chapal la spoj sutel scotol c'alal ta biq'uit ta muc'. Jech noxtoc me jcotuc olol, me junuc muc'ta cristiano mu'yuc ch'ojol ic'ot; lec chapal ic'ot yu'un scotol.

²⁰ Jech noxtoc la spojbe tal scotol li xchijique xchi'uc li xvacaxique. Li jmac-vacaxetique jech laj yalic: “Ja' yu'un ic'ot scotol li Davide”, xiic.

²¹ Li Davide te ic'otic yo' bu comenic li chib ciento (200) viniquetic ta bevo' Besor ta scoj ti ep lubenique, jech muc xu' yu'unic xchi'inel batel li Davide. C'alal laj yilic li David xchi'uc xchi'iltaque, iloc' snupic ta be. C'alal ivul li Davide, lec ivul sc'opanan.

²² Pero oy jayibuc xchi'iltac li Davide toj chopol yo'ntonic, jech laj yalic: “Ta sventa ti muc x'ay xchi'inutique, jech mu'yuc ta xcac'betic ec li c'usi la jpojtic tale. Ja' no'ox ac'o yiq'uic batel li yajnil xnich'nabic jujunique; ac'o xa baticuc”, xiic.

²³ Pero li Davide jech laj yal: —Jchi'iltac, mu xapasic jech ta sventa li c'usi laj yac'butic ta jc'obtic Muc'ul Diose. Yu'un ja' Muc'ul Dios la xchabiutic; ja' laj yac'butic ta jc'obtic li j'eleq'uetic ti ital scontrainutique.

²⁴ Mu'yuc boch'o lec cha'ay jech. Co'ol chich' pasel scotol. Ti c'u yepal chich' li boch'o i'ayic ta paspleitoe ja' jech yepal chich' ec li boch'o icom xchabi c'usi oy cu'untique —xi.

²⁵ (Ja' yorail jech lic spasic o scotol li israeletique; ja' jun mantal icom o yu'unic ti jech tspasique.)

²⁶ C'alal ic'ot ta Siclag li Davide, la stacbe batel smoton li banquilaletic ta Judae, ja' li boch'o lec sc'opan sba xchi'uque, jech laj yalbe batel: “Li' oy jutuc amotonic, ja' li c'usi la jpojbeic tal li yajcontratac Muc'ul Diose”, xut.

²⁷ Jech noxtoc la stacbe batel smoton li boch'otic te oyic ta Bet-el, ta Ramot te ta Néguev, ta Jatir,

²⁸ ta Aroer, ta Sifmot, ta Estemoa,

²⁹ ta Racal, xchi'uc li boch'otic te nacajtic ta lumetic ta Jerameel, xchi'uc ta lumetic yu'un quenetic,

³⁰ xchi'uc ta Horma, ta Corasán, ta Atac,

³¹ ta Hebrón, xchi'uc ta scotol ti butic ixanovic xchi'uc svinictac li Davide.