1 Samuel 3 - Bible in Tzotzil de Chenalhó with Deuterocanon

Ic'opanat yu'un Dios li Samuele

¹ Li querem Samuele te ch-abtej ta stojol Muc'ul Dios; ja' ventainbil yu'un li Elie. Ja'o yorail ti baq'uintic xa no'ox chc'opanatic yu'un Muc'ul Diose; mu'yuc xa boch'o c'usi ch-ac'bat lec yil ta xvayech.

² Oy jun c'ac'al c'alal chmac xa sat li Elie, ja'o te vayem ta yut sna.

³ Yan li Samuele te vayem ta xch'ulna Muc'ul Dios yo' bu oy li xcaxail smantale. Tsanal to'ox li candile.

⁴ Li Muc'ul Diose la sc'opan li Samuele: —Samuel —xut. —Li' oyune —xi li Samuele.

⁵ Ibat ta anil yo' bu oy li Elie, jech c'ot yalbe: —Lital xa. ¿C'usi chaval? —xut. Itac'ov li Elie: —Mu'yuc bu xaquic'ot. Sutan, bat vayan —xut. Jech ibat vayuc yan velta.

⁶ Li Muc'ul Diose la sc'opan yan velta li Samuele: —Samuel —xut. Li Samuele ibat yo' bu oy li Elie, jech c'ot yalbe: —Li' oyune. ¿C'usi chaval? —xut. Itac'ov li Elie: —Unin olol, mu'yuc bu xaquic'ot; sutan batel, bat vayan —xut.

⁷ Li Samuele mu'yuc to bu yotquinoj li Muc'ul Diose, xchi'uc mu'yuc to bu ya'yoj jtenuc c'u x'elan chc'opoj.

⁸ Ic'opanat yoxibal velta yu'un Muc'ul Dios li Samuele, jech ibat yan velta yo' bu oy li Elie, jech c'ot yalbe: —Li' oyune. ¿C'usi chaval? —xut. Li Elie lic sna' ti ja' Muc'ul Dios chc'opoj ta stojol li Samuele.

⁹ Jech laj yalbe: —Bat xa vayan. Me chasc'opanot yan veltae, jech xatac'be: ‘C'opojan, Cajval, ta xca'ay c'usi chaval, vu'un avajtunelun’, uto —xut. Jech isut batel li Samuele, bat vayuc.

¹⁰ Ital noxtoc li Muc'ul Diose; te va'al ivul ta sts'el. La sc'opan yan velta jech chac c'u cha'al ono'oxe: —Samuel, Samuel —xut. —C'opojan, ta xca'ay c'usi chaval, vu'un li avajtunelune —xi.

¹¹ Li Muc'ul Diose jech laj yalbe: —Oy c'usi tsots ta jpas ta stojol li israeletique. Toj c'ux ta a'yel cha'yic li boch'otic ta xa'yique.

¹² Ja' xa yorail ta xcac' c'otuc ta pasel ta stojol Elí scotol li c'usi laj cal ta jpas ta stojol yalab xnich'nabe.

¹³ Calojbe xa ti j'ech'el ta xcac'be o stoj smulic xchi'uc yalab xnich'nab ta scoj ti chopol c'usi la spasique. La sna' ti chopol c'usi tspasic li xnich'nabe, pero mu'yuc la staq'ui.

¹⁴ Ja' yu'un laj xa cal ta jamal ti j'ech'el mu'yuc ta jtu'pbe o smulic li yalab xnich'nab Elie, ac'o me tsmilbicun jmoton, o me yantic matanaletic —x'utat.

¹⁵ Li Samuele ivay yan velta. Ja' to ilic ta sob yoc'omal; la sjamanbe li sti' ch'ulnae. Pero li Samuele ta xi' ta yalbel Elí li c'usi i'albat yu'un Muc'ul Diose.

¹⁶ Li Elie laj yic' li Samuele, jech laj yalbe: —Cunin querem Samuel —xut. Itac'ov li Samuele: —Li' oyune —xi.

¹⁷ Li Elie jech la sjac': —¿C'usi laj yalbot li Muc'ul Diose? Avocoluc jamal xavalbun; mu me xamuc ta avo'nton. Me chamuc ta avo'nton jaybeluque, tsots ac'o yac'bot atoj li Diose —xut.

¹⁸ Li Samuele lic yalbe Elí li c'usi i'albate, me jbeluc mu'yuc la snac'. C'alal laj ya'ay li Elie, jech laj yal: —Ac'o spas li c'usi tsc'ane yu'un ja' Muc'ul Dios stuc —xi.

¹⁹ Li Samuele ich'i; lec chi'inbil yu'un Muc'ul Dios. Persa laj yac' c'otuc ta pasel c'usi laj yalbe Samuel li Muc'ul Diose.

²⁰ Scotol li israeletic xlic ta Dan c'alal to ta Beersebae la sna'ic ti ja' lequil j'alc'op yu'un Muc'ul Dios ta melel li Samuele.

²¹ Li Muc'ul Diose laj yac' sba ta ilel yan velta ta Silo, yu'un ja' ono'ox te ic'opanat yu'un Muc'ul Dios li Samuele.