1 Samuel 29 - Bible in Tzotzil de Chenalhó with Deuterocanon

Li filistaetique lic lo'ilajuc yo'ntonic yu'un li Davide

¹ Li filistaetique la stsob sbaic scotolic te ta Afec. Jech ec li israeletique la stsob sbaic te ta nio' ta Jezreel.

² C'alal la sq'uel sviniquic ta jujutsob li banquilaletic yu'un filistaetique, li Davide te chbatic xchi'uc svinictac ta ts'acalpat; ja' xchi'uquic batel li Aquise.

³ Jech laj yalic li banquilaletic yu'un filistaetique: —¿C'usi tspasic ec li hebreo viniquetic li' oyique? —xiic. Itac'ov li Aquise: —Le'e ja' li Davide, ja' li yaj'abtel to'ox ajvalil yu'un israeletique, ja' li Saule. Oy xa sjayibal jabil li' la xchi'inicun, pero me jutuc mu'yuc jtaojbe o smul c'alal to tana —xi.

⁴ Pero li banquilaletic yu'un filistaetique i'ilinic ta stojol li Aquise, jech laj yalbeic: —Ja' lec albo ti ac'o suticuc batel ta yosilic bu avac'ojbee. Mu me li'uc xixchi'inutic ta pleito yu'un naca me li' c'atajuc ta cajcontratic ta yorail pleito cu'untic. Oy yic'al chlic smilbutic cajsoldadotic sventa chich'be batel sjolic ta stojol li Saule yu'un jech lec chlic ilatuc.

⁵ Me mu ja'uc li David ti jech ono'ox laj yich' q'uejintaele: ‘Ja' yu jmil (1,000) la smil li Saule; ja' lajunmil (10,000) la smil li Davide’, ti xiique —xiic.

⁶ Li Aquise laj yic' li Davide, jech laj yalbe: —Ta stojol cuxul Muc'ul Dios chacalbot, ta melel vo'ot tuq'uil vinicot. Toj lec chquil c'u x'elan laj apas aba te ta carpanaetic cu'uncutic. Ti sjayibal xa c'ac'al lavul ta jtojole, me jutuc mu'yuc c'usi chopol jtaojbot. Pero li banquilaletic yu'un jchi'iltaque mu lecuc chayiloxuc.

⁷ Ja' lec sutanic batel; junuc avo'nton yu'un jech mu chopoluc chayilot li banquilaletique —xut.

⁸ Itac'ov li Davide: —¿C'usi chopol la jpas? ¿Me yu'un oy c'usi chopol laj atabun ti sjayibal c'ac'al la jchi'inot yo' ti mu xu' chbat jchi'inot ta scontrainel li avajcontrae? —xut.

⁹ Itac'ov li Aquise: —Ta melel vo'ot lequil vinicot jech chac c'u cha'al jun yaj'almantal Dios. Pero li banquilaletic yu'un jchi'iltaque laj xa yalic ti mu sc'anic chachi'inuncutic ta pleitoe.

¹⁰ Ja' yu'un oc'om c'alal tsacub osile, xu' chasutic batel achi'uc li achi'iltac ti laj achi'in tale —xut.

¹¹ Ja' yu'un ta yoc'omal sob ilic li David xchi'uc xchi'iltaque; isutic batel ta yosilal li filistaetique. Yan li filistaetique ibatic ta Jezreel.