1 Samuel 28 - Bible in Tzotzil de Chenalhó with Deuterocanon

¹ Ja'o yorail lic stsob sbaic scotol li filistaetique yu'un chbat scontrainic li israeletique, li Aquise jech laj yalbe li Davide: —Ana'oj xa ti persa chbat achi'inuncutic achi'uc avinictac ti bu chbat jpascutic pleitoe —xut.

² Itac'ov li Davide: —Lec oy. Tana chavil c'u x'elan xu' yu'un li avaj'abtele —xut. Li Aquise jech to laj yalbe li Davide: —Ta sventa ti lec xu' avu'une, vo'ot ta jtic'ot o ta jchabivanej cu'un jtuc ti jayib c'ac'al cuxulote —xut.

Li Saule bat sc'opan j'ic'ch'ulelal

³ C'alal ja'o jech ic'ot ta pasele, li Samuele chamen xa'ox. Scotol li israeletique ep laj yoc'taic. Te la smuquic ta Ramá, ja' li slumal bu ivoq'ue. Li Saule snutsoj xa ono'ox loq'uel ta yosilal li jt'unuletique xchi'uc li j'ic'ch'ulelaletique.

⁴ Li filistaetique la stsob sba scotolic; te bat spas scarpanaic ta Sunem. Li Saule la stsob scotol ec li israeletique; te bat spas scarpanaic ta Gilboa.

⁵ C'alal laj yilbe scarpanaic filistaetic li Saule, toj xi'el ic'ot; solel mu'yuc xa stsatsal yo'nton icom o.

⁶ Jech te lic sjac'be Muc'ul Dios c'usi tspas, pero muc xtac'bat. Me ja'uc ta xvayech, me ta Urim, me ta sventa j'alc'opetic muc xtac'bat.

⁷ Ja' yu'un jech laj yalbe li j'abteletic yu'une: —Bat t'unic junuc ants ti sna' yic'bel xch'ulel li boch'otic chamenique yu'un ja' chbat jac'be c'usi ta jpas —xut. Itac'ov li j'abteletic yu'une: —Oy jun ants te nacal ta Endor sna' ic'ch'ulelal —xiic.

⁸ Li Saule la sc'atajes sba batel; la slap batel yan sc'u' spoc'. La xchi'in batel chib viniquetic; ibatic ta ac'ubaltic, bat sc'opan li antse. Jech c'ot yalbe: —Ta jc'anbot vocol ti ac'o at'unbun ca'tic c'usi chtal ta jtojol, xchi'uc ac'o avic'bun tal xch'ulel li boch'o ta jc'an ta jc'opane —xut.

⁹ Itac'ov li antse: —Li vo'ote xana' lec c'usi la spasbuncutic li Saule. La snuts loq'uel scotol li jt'unuletic xchi'uc li j'ic'ch'ulelaletique. ¿C'u yu'un ti tal avac'bun jvocol yu'un jech xu' chimilat oe? —xut.

¹⁰ Pero li Saule la st'abbe sbi Muc'ul Dios, jech laj yal: —Chacalbot ta jamal ta stojol Muc'ul Dios ti mu'yuc c'usi chopol chc'ot ta pasel ta atojol ta sventa le'e —xut.

¹¹ Itac'ov li antse: —¿Boch'o ti chac'an chquic' tale? —xi. —Ja' ta jc'an chavic'bun tal li Samuele —xi li Saule.

¹² Li antse laj yil li Samuele, jech tsots i'avan; la sc'opan li Saule, jech laj yalbe: —¿C'u yu'un ti laj alo'laune? yu'un vo'ot li Saulote —xut.

¹³ Pero li ajvalile jech laj yal: —Mu xaxi'. ¿C'usi laj avil? —xut. —Ta xquil chloc' tal ta banamil xco'laj xchi'uc jun dios yilel —xi.

¹⁴ ¿C'u x'elanic yilel? —xi li Saule. —Ja' jun mol vinic xmochinoj xaquita —xi li antse. Li Saule la sna' ta ora ti ja' li Samuele, jech ta ora la spatan sba ta banamil, laj yich' ta muc'.

¹⁵ Li Samuele jech laj yalbe li Saule: —¿C'u yu'un ti ilbaj chavilun, ti lavic'un tal li'i? —xut. Itac'ov li Saule: —Yu'un toj ep chcat co'nton, yu'un te xa tsobol chiscontrainicun li filistaetique. Pero li Diose scomtsanojun xa; mu xa xistac'bun jc'op. Me ja'uc ta sventa j'alc'opetic, me ta jvayech mu xa xistac'bun. Ja' yu'un laj quic'ot, yu'un ta jc'an chavalbun c'usi xu' ta jpas —xut.

¹⁶ Itac'ov li Samuele: —¿C'u yu'un vu'un chajac'bun me comtsanbilot xa yu'un li Muc'ul Diose ti me avajcontra xa c'oteme?

¹⁷ Li Muc'ul Diose laj xa spasbot li c'usi laj ono'ox yalbot ti vu'un laj calbot ava'ye. Laj xa spojbot li avabtele; ja' xa laj yac'be li achi'il Davide.

¹⁸ Yu'un muc xach'unbe smantal li Muc'ul Diose, xchi'uc muc xamil scotol li amalequetic ti laj yalbot persa ac'o amile, ja' yu'un ti jech la spas ta atojole.

¹⁹ Jech noxtoc li Muc'ul Diose chayac'oxuc ta sc'ob filistaetic achi'uc scotol li israeletique. Oc'om li' xa jchi'uc jbatic ta muquinaltic achi'uc li anich'nabtaque. Jech noxtoc, li Muc'ul Diose chac' ta sc'ob filistaetic li israeletique —xut.

²⁰ Li Saule ta ora iyal ta lum; solel jeche' sloset ic'ot o. Ep ixi' yu'un sc'op li Samuele. Solel aluben icom, yu'un sbejel c'ac'al sbejel ac'ubal mu'yuc ve'em o.

²¹ Li antse laj yil ti solel ch'ayem yo'nton o li Saule, jech laj yalbe: —Li vu'une la jtuc'ulanbot li ac'ope. La jcuts'inta jba; la jch'un li c'usi laj avalbune.

²² Ja' yu'un ta jc'an ac'o ach'unbun ec li c'usi chacalbote. Ta xcac'bot jutuc ve'lil yu'un ac'o ave', jech ta x'ayin atsatsal jech xu' chabat —xut.

²³ Li Saule mu sc'an xve'. Pero li antse xchi'uc li j'abteletic yu'un Saule la sujic, jech te la xch'un ta vocol. Te itots, bat chotluc ta vaybal.

²⁴ Li antse oy jcot ch'ium vacax yu'un te ta sna, lec juben; ja' la smil. La svots' ta ora arina; la spas jayibuc pan mu'yuc svolesubil.

²⁵ C'alal imeltsaj yu'une, laj yich'be batel li Saule xchi'uc li xchi'iltaque. C'alal laj yo'ntonic ta ve'ele, ic'opojic comel; te no'ox ta yac'ubalil ibatic.