1 Samuel 27 - Bible in Tzotzil de Chenalhó with Deuterocanon

Li Davide bat snac' sba ta yosilal filistaetic

¹ Pero li Davide jech la snop: “Oy yic'al ta ono'ox xismilun c'usi ora li Saule. Ja' lec chbat jnac' jba ta yosilal filistaetic, yu'un jech mu xa xistaun, xchi'uc jech mu xa xist'unun ta scotol yosilal li israeletique. Jech chicol o loq'uel ta sc'ob”, xi.

² Ja' yu'un ibatic xchi'uc li vaquib ciento (600) xchi'iltaque, bat yac' sbaic ta ventainel yu'un li Aquis, xnich'on Maoc, xchi'uc li ajvalil te ta lum Gate.

³ Li David xchi'uc xchi'iltac xchi'uc yuts' yalaltaque te inaquiic ta lum Gat; te la xchi'inic li Aquise. Te yic'oj batel xchibal li yajnile, ja' li Ahinoam liquem ta Jezreele xchi'uc li Abigail, yajnil to'ox Nabal te nacalic ta Carmele.

⁴ C'alal laj ya'ay Saúl ti te xa bat snac' sba ta lum Gat li Davide, mu'yuc xa xbat st'un.

⁵ Li Davide jech laj yalbe li Aquise: —Me ta melel lec chavilune, ja' lec ac'bun jutuc bu xu' chinaqui li' ta avosilal. Yu'un mu smeloluc chca'ay ti li' jchi'inojot ta naclej ta lum bu chapas mantal vo'ot li ajvalilote —xut.

⁶ Li Aquise ta ora no'ox laj yac' naclicuc te ta lum Siclag. Ja' yu'un li lum Siclague ja' ventainbil icom yu'un Judá c'alal to tana.

⁷ Li Davide te inaqui jun jabil xchi'uc chanib u ta yosilal li filistaetique.

⁸ Li David xchi'uc svinictaque ibatic ta lum Gesur, ta lum Gezer, xchi'uc ta lum Amalec, bat spojbeic c'usitic oy yu'unic. Yu'un li cristianoetic le'e vo'one xa snaclejic te. Li banamil bu nacalique te xlic ta stuq'uil Shur c'alal to ta yosilal Egipto.

⁹ La spojic scotol li banamil le'e; me junuc vinic ants mu'yuc cuxul icom yu'unic. Jech noxtoc laj yiq'uic batel scotol li chijetique, li vacaxetique, li buroetique, li camelloetique, xchi'uc c'alal ta c'u'il pac'al. Ts'acal isutic batel yo' bu oy li Aquise.

¹⁰ Li Aquise jech la sjac': “¿C'usi lumal ay atsalic naxe?”, xut. Itac'ov li Davide: “Ja' ay jtsalcutic li lum te xcom ta stuq'uil sur yu'un Judae xchi'uc li lum te xcom ta stuq'uil sur yu'un Jerameele, ja' ti te xcom noxtoc ta stuq'uil sur yu'un li yosilal quenetique”, xut.

¹¹ Me junuc vinic, o me ants, mu'yuc cuxul la scomtsan li Davide. Yu'un ja' mu sc'an me oy boch'o chbat yal ta lum Gat c'usi ay spas li Davide. Ja' jech la spas o ti jayib jabil te inaqui ta yosilal filistaetique.

¹² Li Aquise la spat yo'nton yu'un li Davide. Jech la snop: “Li Davide oy yic'al chopol xa ch-ilat o yu'un li xchi'iltac ta israelale. Ja' lec li' xa chcom o ta abtel cu'un”, xi.