1 Samuel 26 - Bible in Tzotzil de Chenalhó with Deuterocanon

Li Davide muc smil noxtoc li Saule

¹ Li jnaclumetic ta Zife ibatic ta Gabaa, bat sq'uelic li Saule, jech laj yalbeic: “Li Davide te snac'oj sba ta Haquila ta yeloval xocol banamil”, xutic.

² Ja' yu'un li Saule ibat ta xocol banamil ta Sif. La xchi'in batel oxmil (3,000) israeletic ti lec xchanojic pleitoe, bat st'unic li Davide.

³ Te c'ot spas scarpanaic ta sjol unin vits ta Haquila ta nopol ti'be ta yeloval xocol banamil. Pero li Davide laj ya'ay ti te xa nopol oy batel li Saúl yo' bu oye.

⁴ Ja' yu'un la stac batel jayibuc viniquetic yu'un ac'o bat sq'uelic lec bu xa stuq'uil oy li Saule.

⁵ Li Davide ibat yo' bu oy scarpanaic li Saule; la sq'uel lec bu stuq'uil chvay li Saúl xchi'uc Abner, xnich'on Nere, ja' li banquilal jpasmantal yu'un scotol soldadoetique. Li Saule te chvay ta yut scarpana; te setubil yu'un li svinictaque.

⁶ Li Davide jech la sjac'be li Ahimelec heteo vinique xchi'uc li Abisaie, ja' li yol Sarvia, xchi'il ta voq'uel Joabe: —¿Boch'o xu' yu'un chyal batel jchi'in c'alal ta scarpana li Saule? —xut. —Vu'un chbat jchi'inot —xi li Abisaie.

⁷ Te no'ox ta yac'ubalil iyalic batel yo' bu oy li Saule. Li Saule jun yo'nton te vayem ta yut scarpana; te pajal ta banamil ta sjolinab li slanzae. Li Abner xchi'uc yajsoldadotaque te setel chvayic ta spat xocon.

⁸ Li Abisaie jech laj yalbe li Davide: —Li' ta orae laj yac'bot ta ac'ob avajcontra li Diose. Ac'bun jmil ta ora. Ta jpajbe ochel c'alal to ta banamil li slanza stuque; ta jmoj no'ox chcac'bee, lec xu' o —xut.

⁹ Pero li Davide jech laj yal: —Mu xamil, yu'un li boch'o tsmil jun ajvalil ti t'ujbil yu'un Muc'ul Diose persa tstoj smul.

¹⁰ Ja' stuc Muc'ul Dios ac'o spojbe loq'uel li xch'ulele. Me tsta to lec yorail chcham, o me chcham no'ox ta pleito, ja' Dios ac'o sventain stuc.

¹¹ Ja' no'ox Muc'ul Dios ac'o scoltaun ti mu me xcac' jc'ob ta stojol li ajvalil st'ujoje. Ja' no'ox tsacbo tal li slanza te pajal ta sjolinabe xchi'uc li yavil ya'ale; batic xa —xut.

¹² Ja' jech laj yich'beic o li slanzae xchi'uc li yavil ya'al te oy ta sjolinabe, jech ibatic o. Mu'yuc boch'o laj yil; mu'yuc boch'o laj ya'ay, yu'un scotolic lec vayemic. Yu'un i'otesbatic pim svayelic yu'un li Muc'ul Diose.

¹³ Li Davide ijelov batel ta jot vits; lec xa'ox nomnom jutuc xil sbaic. Te imuy ta mero jolvits.

¹⁴ Li Davide tsots lic yapta li Abner xchi'uc yajsoldadotaque: —Abner, ¿c'u yu'un ti mu xatac'bune? —xut. Itac'ov li Abnere: —¿Boch'oot ti chavapta li ajvalile? —xi.

¹⁵ Itac'ov li Davide: —¿Me muc vo'ocot ti atuc xa no'ox jech vinicot ta stojol li jchi'iltactic ta israelale? ¿C'u yu'un ti muc xu' avu'un xchabiel li ajvalile, ja' li avajvale? Yu'un oy jun jchi'iltic i'ay ochuc te, yu'un tsmil li ajvalile.

¹⁶ Mu lecuc li c'usi laj apase. Vu'un chacalbot ta stojol Dios ti ja' lec chavich'ic milele yu'un muc xchabij avu'unic li ajvalil t'ujbil yu'un Muc'ul Diose. ¡T'unbo quic slanza li ajvalile xchi'uc li yavil ya'al te yac'oj ta sjolinabe; jq'ueltiquic me xata! —xut.

¹⁷ C'alal laj ya'ibe ta snuc' David li Saule, jech laj yal: —Vo'ot chca'ay ti chac'opanune, cunin querem David —xi. Itac'ov li Davide: —Vu'un, ajvalil.

¹⁸ ¿C'u yu'un ti chacontrainun, vu'un li avajtunelune? ¿C'usi chopol la jpas? ¿C'usi jmul ta atojol?

¹⁹ Avocoluc a'ibun jc'op vu'un ti chitun avu'une: Me ja' Muc'ul Dios jech tsc'an ti chacontrainune, ac'o stsacboxuc li smoton chavac'beique. Pero me ja' no'ox jech tsc'an yo'nton cristianoe, ac'o ac'batuc stoj yu'un Muc'ul Dios. Yu'un laj xa anutsicun loq'uel, yu'un jech mu me xquich' li osil yac'oj Muc'ul Diose. Laj anet'icun loq'uel, yu'un chac'anic ti ac'o bat quich' ta muc' li c'usi mu ja'uc Diose.

²⁰ Vu'une mu jc'an ti nom to bu chmal jch'ich'al ta stojol li Muc'ul Diose. Pero li vo'ote, ajvalil, loq'uemot tal ta jt'unel jech chac c'u cha'al chich' sa'el jcot ch'ac. Anutsojun ta vitsetic jech chac c'u cha'al jcot x'ub —xut.

²¹ Itac'ov li Saule: —David, vo'ot ti xco'laj xchi'uc jnich'onote, laj xa jta jmul ta atojol. Mu'yuc lec c'usi ta jpas; ep xa jmul la jta. Xu' chasut batel; mu'yuc xa chajcontrainot, yu'un li' tanae, laj avac'bun quil ti mu'yuc ta avo'nton ac'o chamcune —xi.

²² Itac'ov li Davide: —Li' quich'oj li alanzae, ajvalil. Ac'o taluc junuc amozo; ac'o tal yich'.

²³ Dios ac'o yac'butic jtojoltic ta jujuntal ti c'u x'elan ta jpastic, xchi'uc ti c'u x'elan jtaleltique. Ac'o me laj yac'ot ta jc'ob li Muc'ul Diose, pero muc jc'an xajmilot, vo'ot li ajvalilot ti t'ujbilot yu'un Muc'ul Diose.

²⁴ Jech chac c'u cha'al la jc'uxubinot, ti muc xajmilote, ja' jech chixc'uxubinun ec li Muc'ul Diose; chiscoltaun ta sventa scotol jvocol —xut.

²⁵ Li Saule jech laj yal noxtoc: —David, ac'o yac'bot bendición li Diose. Xana' spasel li c'usi toj tsotsic ta pasele; lec chbat avu'un scotol —xi. C'alal ilaj yo'ntonique, li Davide la stam batel sbe; jech ec li Saule isut batel ta sna.