1 Samuel 24 - Bible in Tzotzil de Chenalhó with Deuterocanon

Li Davide la xc'uxubin li Saule

¹ C'alal isut tal ta snutsel filistaetic li Saule, laj ya'ay ti te xa oy ta xocol banamil En-gadi li Davide.

² Li Saule lic st'uj oxmil (3,000) viniquetic te ta stojol israeletic; ibat st'unic ta joljol vitsetic, ta japjap ch'entic li David xchi'uc svinictaque.

³ C'alal ic'otic ta scoralil chijetic li Saule, te i'och tsa'anuc ta yut nailch'en yo' bu snac'oj sbaic li David xchi'uc svinictaque.

⁴ Jech i'albat yu'un svinictac li Davide: —Tana li'i ic'ot xa ta pasel ti yalojbot ono'ox Muc'ul Dios chayac'bot ta ac'ob li avajcontrae; xu' xa chapasbe li c'usi chac'ane —xutic. Li Davide itots batel; c'unc'un ibat xtuch'be juteb yoc snatilc'u' li Saule.

⁵ C'alal laj xa'ox spas jech li Davide, lic lo'ilajuc yo'nton.

⁶ Jech laj yalbe li svinictaque: —Li Muc'ul Diose muc xac' jpasbe c'usi tsc'an co'nton li ajvalile yu'un ja' st'ujoj. Jech muc xcac' jc'ob ta stojol, yu'un ja' t'ujbil yu'un Muc'ul Dios —xi.

⁷ Ja' jech ipaj o yu'un svinictac li Davide; muc smilic o li Saule. Li Saule iloc' ta nailch'en; la stam batel sbe yan velta.

⁸ Pero li Davide te nabal loq'uel ta spat li Saule, tsots laj yapta: —Ajvalil —xut. Li Saule la sq'uel sutel spat. Li Davide la snijan sba c'alal ta banamil yu'un chich' ta muc'.

⁹ Jech laj yalbe: —¿C'u yu'un chach'unbe ya'yejic li boch'otic chalic ti chopol co'nton ta atojole?

¹⁰ Q'uelavil ta asat atuc ti laj xa yac'ot ta jc'ob li' ta nailch'en li Muc'ul Diose. Laj yalbicun jvinictac ti ac'o jmilote, pero muc jpas jech, yu'un jech la jnop: “Ja' lec mu xcac' jc'ob ta stojol li cajvale, yu'un ja' t'ujbil yu'un Muc'ul Dios ti ochem ta ajvalilale”, xichi.

¹¹ “Ajvalil, q'uelo lec avil. Li' quich'oj juteb yoc ac'u', la jc'ocbot loq'uel, pero muc xajmilot. Q'uelo lec avil ti ta melel mu'yuc c'usi chopol ta jc'an ta jpasbote. Mu'yuc c'usi ta mucul ta jc'an ta jpasbot, xchi'uc mu'yuc jmul ta atojol. Ja' no'ox vo'ot ti mu xlaj avo'nton ta jt'unel yu'un chac'an chamilune.

¹² Ja' ac'o xchapanutic jchibaltic stuc li Muc'ul Diose. Ac'o spacbun stuc Dios ti me chopol c'usi chajpasbote. Pero mu'yuc ta co'nton ti chcac' jc'ob ta atojole.

¹³ Xana' ti jech chalic li moletic ta vo'onee: ‘Li c'usi chopole te chlic tal ta chopol cristianoetic’, xiic. Ja' yu'un li vu'une mu'yuc jnopoj chcac' jc'ob ta atojol.

¹⁴ ¿Boch'o tal at'un, vo'ot li ajvalilot yu'un israeletique? ¿Boch'o tal acontrain? ¿Me yu'un xico'laj xchi'uc jcot chamen ts'i', o me jcot ch'ac chavilun?

¹⁵ Ja' yu'un Muc'ul Dios ac'o yal stuc; ac'o xchapanutic stuc jchibaltic. Ja' ac'o sq'uel c'u xi'elan. Xchi'uc ja' chispojun loq'uel ta ac'ob”, xut.

¹⁶ C'alal laj yo'nton ta lo'il li Davide, li Saule jech laj yal: —David, ta melel vo'ot ti chac'opanune —xut. Te lic oc'uc.

¹⁷ Jech laj yal: —Li vo'ote toj lec avo'nton ta jtojol; li vu'une mu jechuc co'nton. Yu'un lec c'usi laj apasbun; vu'un ti chopol c'usi ta jc'an ta jpasbote.

¹⁸ Laj xa avac' ta ilel ti lec c'usi laj apasbune. Ac'o me laj yac'un ta ac'ob li Muc'ul Diose, pero muc xamilun.

¹⁹ Ta melel mu'yuc boch'o jech tspas ti cuxul, ti lec tsut yu'un yajcontra me la snup ta bee. Muc'ul Dios chastojot, chayac'bot c'usitic lec ta sventa ti lec c'usi laj apasbun eq'ue.

²⁰ Li' ta orae laj xa jna' ti vo'ot chlic ochan ta ajvalilale, xchi'uc ti vo'ot ta aventa lec chbat scotol li jchi'iltactic ta israelale.

²¹ Ja' yu'un albun ca'ay ta stojol Muc'ul Dios ti mu xavulesbun jts'unubal c'alal me licham xa'oxe, xchi'uc ti mu'yuc chatu'pbun o jbi ta stojol li cuts' calaltaque —xut.

²² Li Davide te lic yalbe ta stojol Dios ti mu jechuc ta spase. Ja' yu'un li Saule isut batel ta spasubmantal; jech ec li David xchi'uc xchi'iltaque isutic ta nailch'en.