1 Samuel 23 - Bible in Tzotzil de Chenalhó with Deuterocanon

Li Davide la scolta lum Keila

¹ Oy jun c'ac'al jech ital albatuc li Davide: —Li filistaetique ital xa ochicuc ta lum Keila; chelc'anic batel li trigo ti ach' to la smajique —xutic.

² Li Davide lic sjac'be Muc'ul Dios c'usi xu' tspas, jech laj yalbe: —¿Me chavac' chbat cac'be ya'yic li filistaetique? —xut. Itac'ov li Muc'ul Diose: —Xu' chabat. Bat coltao li lum Keilae —xi.

³ Pero li svinictac Davide jech laj yalic: —Q'uelavil, ep chijxi'utic ti li' oyutic ta Judae. C'u to x'elan xi'el me lijbat ta Keila, bat jtsactic ta pleito li filista soldadoetique —xiic.

⁴ Ja' yu'un li Davide lic sjac'be Muc'ul Dios yan velta c'usi xu' tspas. Jech itac'bat yu'un li Muc'ul Diose: —Xanovanic xa batel; batanic ta Keila. Vu'un chacac'bot ta ac'ob li filistaetique —x'utat.

⁵ Jech ibatic ta Keila xchi'uc svinictac li Davide; lic spasic pleito xchi'uc li filistaetique. La stsalic scotol; laj yich'beic comel li xvacaxique. Jech icol o yu'unic li jnaclumetic ta lum Keilae.

⁶ Li Abiatar, xnich'on Ahimeleque, ibat ta anil bat sta li David te ta Keilae; te slicoj batel ta sc'ob li mocan c'u'ile.

⁷ Oy boch'o bat yalbe Saúl ti te oy ta Keila li Davide. Ja' yu'un li Saule jech la snop: “Laj xa yac'bun ta jc'ob li Diose yu'un te xa ochem ta yut lum ti oy lec smaque, ti lec bajbile. Jech te xa no'ox macal chcom o”, xi.

⁸ Ja' yu'un ta ora la stsob scotol li svinictaque; iyalic batel ta Keila yu'un chbat smaquic li David xchi'uc svinictaque.

⁹ Pero li Davide laj ya'ay ti ta xa xtal milaticuc yu'un li Saule, ja' yu'un jech laj yalbe li Abiatare: “Ich'o tal li mocan c'u'ile”, xut.

¹⁰ Li Davide jech laj yalbe li Diose: —Muc'ul Dios, vo'ot Diosot yu'un li Israele. Li Saule laj xa ca'ay ti tsc'an chtal svuq'uesic lum Keila ta jcoj vu'un li avajtunelune.

¹¹ ¿Me chiyaq'uic ta sc'ob Saúl li jnaclumetic li' ta lum Keilae? ¿Me ta ono'ox xtal sa'un li Saúl jech chac c'u cha'al ca'yoje? Muc'ul Dios, Dios yu'un Israel, avocoluc albun ca'ay vu'un li avajtunelune —xut. Itac'ov li Muc'ul Diose: —Ta melel ta xtal li Saule —xi.

¹² Jech lic sjac' noxtoc li Davide: —¿Me chiyac'uncutic ta sc'ob Saúl xchi'uc jvinictac xana' li jnaclumetic li' ta Keilae? —xut. Itac'ov li Muc'ul Diose: —Tana —xi.

¹³ Ja' yu'un li David xchi'uc svinictac ti oy van vaquibuc ciento ta scotolique iloq'uic batel ta Keila; vovil xanubal no'ox la spasic batel. C'alal laj ya'ay Saúl ti jatoven xa loq'uel ta Keila li Davide, jech te muc xbatic o ta sa'el.

La snac' sba ta xocol banamil li Davide

¹⁴ Li Davide te la snac' sba o ta jun vits ta xocol banamil Sif. Lec tsatsal ch'en la sta li snac'ubbaile. Li Saule scotol c'ac'al la sa'ilan li Davide, pero li Diose muc xac'be ta sc'ob.

¹⁵ Li Davide ta xi' yu'un li Saule yu'un t'unbil xa o sventa chmilat. Jech te icom o ta Hores te ta xocol banamil Sif.

¹⁶ Li Jonatán, xnich'on Saule, oy jun c'ac'al bat sq'uel li David te ta Horese, bat stsatsubtasbe yo'nton ta sventa Dios.

¹⁷ Jech laj yalbe: —Mu xaxi'. Yu'un li jtotique mu xastaot ta t'unel. Persa ono'ox vo'ot chlic ochan ta ajvalilal yu'un li jchi'iltactique. Vu'une xchibal jpasmantal chic'ot avu'un ec. Li jtotique sna'oj ti jech chc'ot ta pasele —xut.

¹⁸ Jech xchibalic oy c'usi la xchapanic ta stojol li Muc'ul Diose. Li Davide te icom ta Hores; yan li Jonatane isut batel ta sna.

¹⁹ Pero li jnaclumetic te ta Sife ibatic ta Gabaa, bat sc'opanic li Saule, jech laj yalbeic: —Li Davide te snac'oj sba ta cosilalcutic ta jun tsatsal ch'entic te ta vits yu'un Haquila ta Hores te ta stuq'uil sur yu'un xocol banamil.

²⁰ Ja' yu'un li c'usi ora chac'an chabate, ajvalil, xu' chabat; vu'uncutic ta xcac'cutic ta ac'ob —xutic.

²¹ Itac'ov li Saule: —Ac'o yac'boxuc ep bendición Muc'ul Dios ta sventa ti laj ac'uxubinicune.

²² Xu' chasutic batel. Avocolicuc bat sa'ic, bat q'uelic lec ti bu snac'oj sbae, xchi'uc jaq'uic lec li boch'o yiloj bu oye. Yu'un yalojbicun ti toj manya c'u x'elan ta snaq'uilan sbae.

²³ Sa'beic lec scotol li snac'ubbailtaque. Ts'acal xtal avalbicun ca'ay ti me laj avilic lec bu oye, vu'un chajchi'inoxuc batel. Me ta melel ja' te oy ta banamil le'e, lec xquechet ta jsa' ta c'unc'un ta jujuchop sbiic li judaetique —xi.

²⁴ Jech iloq'uic batel ta stojol li Saule; isutic batel ta Sif. Li David xchi'uc svinictaque te oyic ta xocol banamil ta Maón ta Arabá ta stuq'uil sur yu'un li xocol banamile.

²⁵ Li Saule ibat xchi'uc svinictac, bat st'unic li Davide. Pero li Davide oy boch'o i'albat yu'un, jech te iyal batel ta ch'entic ta xocol banamil ta Maón. C'alal laj ya'ay li Saule, te iyal batel ta xocol banamil ta Maón, bat st'un li Davide.

²⁶ Li Saule ta jot ch'ut vits oyic batel xchi'uc svinictac. Jech ta yan jot vits oyic batel xchi'uc svinictac ec li Davide. Yac'ojbeic yipal yu'un mu me xtaatic yu'un li Saule. Pero li Saúl xchi'uc svinictaque ta xa'ox staic ta be li David xchi'uc svinictaque; te xa'ox ta setuic sventa tsmilic o.

²⁷ Ja'o ic'ot jun j'almantal, jech laj yalbe li Saule: —Ajvalil, sutan batel ta ora. Yu'un li filistaetique i'ochic xa tal ta cosilaltic —xut.

²⁸ Jech li Saule isut tal ta snutsel li Davide; ja' bat spasic pleito xchi'uc li filistaetique. Ja' yu'un la sa'beic sbi li banamile, ja' “Ch'entic sventa Voc'ubbail”, xi sbi icom.

²⁹ Li Davide te ibat nacluc ta tsatsal ch'entic ta En-gadi.